Jeremias 8
8
1“Sa panahon na iyan, an mga tolang kan mga hade saka mga opisyal nin Juda, an mga tolang kan mga padi asin kan mga propeta, patin kan mga tawong nag-erok sa Jerusalem, hahaleon sa saindang mga lulubngan. 2Embes na tiponon saka ilubong, an saindang mga tolang garo ati na papabayaan sa daga. Iwawarak iyan tanganing masaldangan kan aldaw, maliwanagan kan bulan asin kan mga bitoon na namotan, pinaglingkodan, hinapot saka sinamba kan mga tawong iyan. 3Para sa matatada sa makasalan na nasyon na ini na nag-eerok sa mga lugar na winarakan sa sainda, mas marahay pa an magadan ki sa padagos na mabuhay. Ako, an Kagurangnan nin mga hukbo, an nagtaram.”
Kasalan asin Padusa
4Tinaraman ako nin Kagurangnan na magsabi sa saiyang banwaan, “Kun natutumba an siisay man, bakong minabangon siya giraray? Kun nasasala nin dalan an siisay man, bakong minabalik siya giraray? 5Banwaan ko, tadaw ta minatalikod kamo sako dangan dai na minabalik? Namugol kamo sa saindong mga dios-dios asin habo kamong magbalik sako. 6Hininanyog ko kamo nin marahay alagad dai kamo nagsabi kan totoo. Mayo maski saro saindo nin nagsosolsol kan saiyang katampalasanan; mayo saindo nin naghahapot, ‘Anong kasalan an sakong ginibo?’ An lambang saro padagos sa sadiri niyang dalan, arog sa kabayo na pasiring sa ralaban. 7Maski an lapay nakakaaram kun nuarin siya dapat magbalik; an agbaan, an balinsayawan saka an talaod nakakaaram kan tamang panahon nin pagbago nin erokan. Alagad, kamong sakong banwaan, dai nindo naaaraman an sakong mga pagboot. 8Paano nindo nasasabi na madonong kamo saka naaaraman nindo an mga katogonan ko? Alagad an mga togon binago kan mga madayang eskriba. 9Napapasopog an mga madonong nindang tawo; nariribong sinda saka nasisiod. Isinikwal ninda an mga tataramon ko; anong kadonongan an yaon pa sainda ngunyan? 10Kaya itatao ko sa ibang lalaki an saindang mga agom, siring man an saindang mga oma. An lambang saro, poon sa kasaradayan sagkod sa haralangkaw na tawo, nandadaya tanganing yumaman; nandadaya maski an mga propeta saka mga padi. 11Para sainda, an mga lugad kan sakong banwaan mga kamros sana. Minasabi sinda na igwa nin katoninongan maski mayo man nin katoninongan. 12Banwaan ko, nasopog daw kamo kan gibohon nindo an makauuyam na mga bagay na ini? Dai nanggad kamo nasopog; dai na ngani kamo namumula sa pagkasopog! Kaya mabagsak kamo arog kan iba; iyan an magigin kataposan nindo kun padusahan ko na kamo. Ako, an Kagurangnan, an nagtaram.
13“Boot kong tiponon an sakong banwaan, arog sa tawong nagtitipon kan saiyang mga ani; alagad garo sinda balagon nin ubas na mayo nin bunga, garo kahoy na higera na mayo nin pakinabang, na maski an mga dahon aralang na. Kaya tinugotan ko an mga taga luwas na sakopon an daga.”
14“Tadaw ta nagtutukaw kita asin dai naghihiro?” an hapot kan banwaan nin Dios. “Madya, magduruman kita sa pinapusog na mga syudad dangan duman kita magpagadan. Hinukoman na kita nin Kagurangnan na satong Dios tanganing magadan; itinao na niya an tubig na may hudong tanganing inomon nyato huli ta nagkasala kita saiya. 15Naghanap kita nin katoninongan, alagad mayo nin nangyari, asin nin aldaw nin pagpaomay, alagad an nag-abot katakotan. 16An satong mga kaiwal yaon na sa syudad nin Dan; madadangog hale duman an sinogrot kan saindang mga kabayo. Sa hinirihiri kan saindang mga kabayo, nagtatakig an bilog na daga. Huli ta nag-abot na an mga kaiwal na maraot kan satong daga, na magaba kan satong syudad asin magadan kan mga nag-eerok diyan.”
17“Magmaan kamo!” an sabi nin Kagurangnan. “Mapadara ako nin mga halas, mga rimoranon na dai mapapagaro, asin kakagaton ninda kamo.”
An Kamondoan ni Jeremias para sa Saiyang Banwaan
18An sakong kamondoan dai mabobolong,
an kulog sa sakong puso sakong namamatean.
19Dangoga! Sa bilog na daga
nadadangog an kinurahaw kan sakong banwaan,
“Mayo na daw sa Sion an Kagurangnan?
Mayo na daw duman an hade nin Sion?”
An Kagurangnan, an saindang hade nagsimbag,
“Tadaw ta pinapaanggot nindo ako sa paagi kan pagsamba sa mga ladawan
asin sa pagluhod sa mga dios-dios na dai nindo midbid saka mayo nin halaga?”
20Nagkurahaw an banwaan,
“Nag-agi na an tig-init, tapos na man an tig-ani,
alagad dai kami ikinaligtas.”
21Garo maronot an sakong puso
huli ta ronot na an sakong banwaan!
Nagmomondo ako; nanluluya nanggad an sakong boot.
22Mayo na daw nin mga bolong sa Gilead?#8:22 GILEAD: Sarong rehiyon sa sirangan nin Jordan, na bantog huli kan mga tinanom na ginamit sa pagbolong.
Mayo na daw nin mga parabolong duman?
Tadaw ta dai naoomayan an sakong banwaan?
Currently Selected:
Jeremias 8: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
