Isaias 62
62
1Magtataram ako tanganing pakosogon an boot kan Jerusalem;
dai ako magkakaalo sagkod na ligtas na siya,
asin nagliliwanag an saiyang kapangganahan siring sa sarong karaba sa pagkabanggi.
2Jerusalem, mahihiling kan mga nasyon an saimong kapangganahan!
Mahihiling kan saindang mga hade an saimong kamurawayan.
Aapodon ka ninda sa bagong ngaran,
sarong ngaran na itinao saimo nin Kagurangnan.
3Makakaagid ka sa sarong magayon na korona para sa Kagurangnan.
4Dai ka na nanggad aapodon “Pinabayaan,”
o aapodon an saimong daga na “Babaeng Sinuhayan.”
“An Dios Nawiwili Saiya,” an saimong magigin bagong ngaran.
An saimong daga aapodon “Maogmang Pag-inagoman,”
huli ta nawilihan ka nin Kagurangnan
asin makakaagid siya sa agom na lalaki kan saimong daga.
5Siring sa sarong hoben na lalaking minaagom nin sarong birhen,
aagomon ka kan naglalang saimo.
Siring na naoogma an lalaki sa saiyang agom,
maoogma man an Dios sa saimo.
6Sa ibabaw nin saimong mga kudal, O Jerusalem,
nagbugtak ako nin mga bantay;
kaipuhan na dai nanggad sinda mag-alo banggi man o aldaw.
Kaipuhan ipagiromdom ninda sa Kagurangnan an saiyang ginibong mga panuga
asin dai sinda magtugot na malingawan niya an mga iyan.
7Kaipuhan na dai ninda siya pagtawan nin kapahingaloan sagkod na makabalik sa dati an Jerusalem—
sarong syudad na inoomaw kan bilog na kinaban.
8An Kagurangnan naggibo nin banal na panuga,
asin gigibohon niya iyan huli kan saiyang kapangyarihan:
“An saimong inani dai na nanggad magigin pagkakan kan saimong mga kaiwal,
asin an saimong arak dai na nanggad iinomon kan mga dayuhan.
9Alagad kamong nagtanom saka nag-ani
iyo an magkakakan kan tinapay asin mag-oomaw sa Kagurangnan.
Kamong nag-ataman dangan nagtipon kan mga ubas
iyo an mag-iinom kan arak sa mga patyo kan sakong Templo.”
10Mga namamanwaan nin Jerusalem, lumuwas kamo sa syudad
asin gumibo nin tinampo para sa saindong nagbabalik na kahimanwa!
Andama nindo an sarong tinampo; haralea nindo an mga gapo!
Magbugtak kamo nin sarong tanda nganing an mga nasyon makaaram
11na an Kagurangnan nagpapahayag sa bilog na kinaban:
“Sabihi nindo an banwaan nin Jerusalem
na an Kagurangnan madatong tanganing iligtas siya,
kaibahan niya an ilinigtas niyang mga tawo.”
12Aapodon kang “An Banal na Banwaan nin Dios,”
“An Banwaan na Ilinigtas nin Kagurangnan.”
An Jerusalem aapodon “An Syudad na Namomotan nin Dios,”
“An Syudad na Dai Pinabayaan nin Dios.”
Currently Selected:
Isaias 62: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
