Isaias 61
61
An Marahay na Bareta nin Kaligtasan
1Nasa sako an espiritu kan Kagurangnan Dios,
huli ta linahidan niya ako
sa pagdara kan marahay na bareta sa mga dukha.
Sinugo niya ako sa pagbolong kan mga nakukulogan an puso,
sa pagpahayag nin katalingkasan sa mga bihag
asin sa mga nasa bilanggoan.
2Sinugo niya ako tanganing ipagrukyaw
na duminatong na an panahon
kan pagligtas nin Kagurangnan sa saiyang banwaan,
asin kan pagkadaog kan saindang mga kaiwal.
Sinugo niya ako tanganing rangahon an mga nagmomondo,
3tanganing tawan an mga nagmomondo sa Sion
nin kaogmahan saka kagayagayahan embes na kamondoan,
nin sarong awit nin pag-omaw embes na sarong panambitan.
Makakaagid sinda sa mga kahoy
na itinanom mismo nin Kagurangnan.
Gigibohon ninda an tama,
asin oomawon an Dios huli kan saiyang ginibohan.
4Papakarhayon ninda an mga syudad na haloy nang nagkararaot.
5Banwaan ko, paglilingkodan ka nin mga dayuhan.
An saindong mga hayop, sinda an mag-aataman
asin sinda an mag-ooma kan saindong daga saka magbabantay kan saindong mga ubasan.
6Mimidbidon kamo bilang mga padi kan Kagurangnan,
an mga sorogoon kan satong Dios.
Magkikinabang kamo sa kayamanan kan mga nasyon
asin mag-oorgulyo na iyan sadiri nindo.
7Tapos na an saindong kasosopgan asin an pagkawara nin onra.
Mag-eerok kamo sa sadiri nindong daga,
asin madodoble an saindong kayamanan;
an saindong kaogmahan magdadanay sagkod lamang.
8Nagsasabi an Kagurangnan,
“An hustisya sakong namomotan asin an panghabon saka karatan sakong naoongisan.
Maimbod kong babalosan an sakong banwaan
asin magibo ako sainda nin mayong tapos na tipan.
9Magigin bantog sinda sa tahaw nin mga nasyon;
an gabos na makahiling sainda makakaaram
na sinda an banwaan na sakong benendisyonan.”
10Nag-oogma an Jerusalem huli kan ginibo nin Kagurangnan.
Nakakaagid siya sa sarong nobya na nakagubing nin pangkasal.
Ginubingan siya nin Dios nin gubing nin kaligtasan saka kapangganahan.
11Siring na mabuswak saka matalubo an banhi,
siring man an pagligtas nin Kagurangnan Dios sa saiyang banwaan,
asin oomawon siya kan gabos na nasyon.
Currently Selected:
Isaias 61: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
