Ane rom, echî 16

Ekûp ejámé

1N kí wom ó mə́ŋe ên ntem-mmon-i-nnyen owəré nnyo nne-nkáé nnyo á kamá se Fibhi. Yê á yimá etûm a kará ane echəme atóbhá Jisos ka eték í Kenkriya. 2Deê ó fî ên yê ka mbiŋ i Ntûfâm owəré Jisos Krayis noŋ ane Obhasi á fóne ka eyimím. Nyáŋe ên yê kpe ka jen nji a wóme, ka yê fə́ne a nyáŋe ane etî-etî. A nyáŋe ə̂m eróŋ.

3N kí tum ekûp mbâ Prisiriya na Akira, atem-ayimá-etûm í Jisos Krayis ábháe,#Etûm 18.2. 4mba á káme ekʉ̂ ka obhô obhámé. Kpe mme átíŋ asík n kí kup ábho. Chénchén bichəme atóbhá Jisos ka nték ajéné mba á kí top Obhasi á kí kup ábho eróŋ. 5N kí kup fə́ne atóbhá Jisos mba á chə́ma ka njû ábho.

Karê ên ekûp ejámé mbâ ntem i ḿbə́ŋé omé Epayenetus nnyo a ri ndaŋa-mbá nne ka ebhát í Esiya nnyo a kíi ḿbə́ŋé na Jisos Krayis. 6N kí kup Meri nnyo a yimî etûm kpe-eji ka obhô obhə́né. 7N kí kup atem-ane eték abhámé mbá ábháe, Andronikus na Juniyas mba á gyée ókúmí ebhú jə́t na mme ka achot Obhasi. Atem mbá nâ á ráŋe mbá á kî ḿbə́ŋé na Jisos kən mme ḿ bá kí. Kpe ágbán í Jisos á mə́ŋe ábho nono.

8N kí kup Ampriyatus nnyo ntem i ḿbə́ŋé omé ka Jisos Krayis. 9N kí kup ntem-nne etûm omé ka Jisos Krayis nnyo á kamá se Rubanus, na ntem i ḿbə́ŋé omé Stakus. 10N kí kup Aperes nnyo á gae ka mbá Jisos Krayis á yen sê a bhîk. Kup ên efun í Aristoburus fép. 11N kí kup ntem-nne eték omé Erodiyon. N kí kup efun í Nasisus chénchén mba á rî na Ńtâ Jisos Krayis.

12N kí kup ane-akáé mbá ábháe, Trifayena na Trifosa, mba á yim etûm á káre Ńtâ Jisos Krayis. N kí kup ntem i ḿbə́ŋé omé fə́ne nnyo nne-nkáé, Pesis, nnyo a yîm ekpatə́m etûm mbâ Ńtâ Jisos Krayis. 13N kí kup Rufus nnyo a kíi echî a chîŋ ochíŋ ka etûm í Jisos Krayis. N kí kup fə́ne nnyen owe nnyo a fiî ə̂m eróŋ noŋ mmon owe.#Mak 15.21. 14N kí kup Asinkritus na Fregon na Emes na Patrobas na Emas na chénchén atem-abhon-í-nnyen mba á rî na ábho. 15N kí kup Firorogus na Juriya na Nereyus é kpê na mmon-i-nnyen owe nnyo nne-nkáé. N kí kup Orimpas na chénchén ane Obhasi mba á rî na ábho.

16Kup ên atem-abhon-í-nnyen ágo ka echî ka echî, o tamá ên ábho ngaŋ ka mbiŋ Obhasi. Chénchén bichəme atóbhá Jisos ngá á kí tum ên fə́ne ekûp.

Ejeghé etí etáám

17Atem-abhon-í-nnyen, n kí goré ên bəre ó kó ên ebhú na ane mba á túbha nchot, á bhó kam na achot Obhasi mma á kpíi ên. Ntʉ́ghi ane mbá á bhâk na achât, á yimá ane á gbok. Ka chə̂m ên na ábho. 18Echî é rî sê, ntʉ́ghi ane mbá á bhó yim etûm mbâ Ntûfâm owəré Jisos Krayis. Á yíma ka obhô ekot ábho. Na ogyebhé eyum í nchot ábho, á bhik erirím ane mba á ká məŋé nchot obhí.

19Ngun ndə́m á yuk ekpak nji o kóe ên biji o káre mbâ Jisos Krayis. Ejûm njí é gyebhe ə̂m kpe-eji. N kí goré bəre deê ó fôn ên aron ó mə́ŋe ên ono, nne a kâ mə́ŋe kpe ejûm a kpe na obhí. 20Obhasi owəré nnyo á kará enare, tîk a yîm ên mân o chêm ên Satan, o sə́ne ka akát mkpât ebhú.

Deê onobhá-eji Ntûfâm owəré Jisos Krayis ó jóe na ên.

21Timoti nnyo á yimá etûm na mme a kí tum ekûp. Atem-ane eték abhámé eróŋ, Lusiyus, Jesu na Sosipata á kí kup ên.#Etûm 16.1.

22Mme, Tetiyus, nnyo Pol a kóe se ń séŋ yê nwet nnyí, n kí kup ên ka mbiŋ i Jisos Krayis.

23Gayus fə́ne nnyo mme Pol n sʉ́i ka njû eye nnyi atóbhá Jisos á chə́ma, se ń kúp ên. Erastus nnyo nkígha-ntí eték na ntem-mmon-i-nnyen owəré Katus á kí tum ên ekûp.#Etûm 19.29; 1 Korin 1.14; 2 Tim 4.20.

[ 24Deê onobhá-eji ntûfâm owəré ó jóe na ên fép. Áno.]

Ejeghé osêŋ

25Ekûp na ejík é jóe é káre Obhasi nnyo a kí yim akát á sî ên nsi ó fôn ên ekpin ka ekpak otîp ogyebhá-ḿbə́ŋé mbi ń səre ḿ fare. Otîp mbí ó rî ó kpê na Jisos Krayis, kən á kíi ka ebhə̂t éməné. 26Kən mfá-mfá ó chəbhe jáé ka achot mma akará-otîp Obhasi á séŋe. A ri Obhasi nnyo a fonê ekpin ótúm-ótúm nâ a karê ikom se achot mmá á jên á fáre nték i ngun fép, ngun á kí ḿbə́ŋé, á kó biji ábho á káre yê.

27Deê é káre ên ekûp na ejík mbâ Obhasi ka ótúm-ótúm. Yê átíŋ nâ a ri oməŋá-ejûm. Deê é káre ên yê ekûp na ejík ka obhô Jisos Krayis. Áno.

Currently Selected:

Ane rom, echî 16: ETUNT

Highlight

Compare

Copy