Etûm ágbán~í jisos, echî 11

Pita a sə́re ane ekpak ejen ejê é chíŋi

1Ágbán í Jisos na chénchén atem-abhon-í-nnyen ka Judiya ndə́m á yûk sê ajéné eróŋ á kam na nchot Obhasi. 2Nji Pita a kpo bhá ka Jerusarem, atem-ane Jus mba á kíi ḿbə́ŋé na Jisos kən á fî fə́ne nchot ebhín í nkîm á yə̂m yê okpóŋe sê, 3“We ó jen ó gye njû ane mba nkîm á bhó kim, o dík édî na ábho, áno asík a?”

4Pita a róghe mân esə́rə́m ábho jə́t na jə́t ekpak é fábhe. 5Se, “Ofú bhə́t, n di ka eték í Jopa, n kí goré Obhasi. N yên ndem. Éfô etat nji á bhóbhe obhóp ka nkûk eye énî, é kí bhət é bhak ka ósô. Éfô njí é bhə̂t é sî nsi kpít na mme. 6N yûŋ amə̂t n kêp ńjə́ne nyamḿ, n yên ka etím mkpak onyam a mân, mbi ó jéna na akát, mbi ó tʉ̂k ngaŋ, mbi ó fə́bha ofəbhé. 7N yúghá eyum é bhiŋ se, ‘Pita, duî ngyím, yúi dî.’

8“Kən n táme se, ‘Cháa, Ńtâ Obhasi! Ń ka nok odí ejûm kpe jə́t nji ebhín é fíi sê a ri ejûm akôp.’

9“Eyum njí é kpô chot nnyi ósô ka osúí ntə̂m ébháe se, ‘Ejûm nji Obhasi á ko se é ká fon akôp, nne a kâ sə́re se é rî na akôp.’ 10Ejûm njí é yími áno ntə̂m ésá kən éfô njí é gyʉ́t é jî nnyi ósô.

11“Ka nkúbhi ebhú njí, ane ásá á bhak mba á dʉ̂ nnyi Sesariya, á bhak ka njû nnyi n sʉ́i nná. Á bháe sê á bhá kó ə̂m.

12“Nji ane mbá á bháe á gyím ka éré, Obhasi Ebhare Ntʉgantʉ a sə́re ə̂m se, ‘Ka táŋe ejiím na ábho.’ Atem-abhon-í-nnyen mbá aságasá mba á dʉ̂ Jopa á tôp ə̂m fə́ne ta e sî Sesariya, e jî gyê njû Konerus. 13Konerus a sə́re êt fə́ne ekpak nji yê a yéne énjel ka njû eye. Énjel nnyó a sə́re yê se a túm nne a bhá bhiŋ ə̂m ka Jopa, 14mme ḿ fon nchot nnyi n kí səre yê, Konerus. Nchot nnyi a kí yim yê na ndə́p-i-njû eye ndə́m á sém.

15“Eróghóm nji n dóghe nná echoróm na Konerus, Obhasi Ebhare Ntʉgantʉ a bhák fə́ne mbâ ábho noŋ a bháe mbâ eyəré ta ka eróghá-ndə́p. 16N tît mân nchot i Ńtâ Jisos a chorê se, ‘Jon a kóe ayép a fûk ane ayép, kən tîk á sû êt na Obhasi Ebhare Ntʉgantʉ.’#Etûm 1.5. 17M bâ mə́ŋe mân bəre Obhasi a kí karé ajéné ekpak ekəp jə́t nji a karê êt ka ebhú e yúŋi ḿbə́ŋé e kî na Ńtâ Jisos Krayis. Mme a ri énê mân nnyo n kí gbʉi Obhasi a kâ yîm nji a wóme a yim?”

18Pita a kpô bhúp chénchén a sə́re ábho, é gyébhe mân ábho. Á róghe Obhasi nkat ekarám se a kâm fə́ne, se kpe ajéné á yóŋe ḿbə́ŋé, á mághe obhí ábho, á fôn ekpin.

Echəme ane Obhasi é roghe ka Antiyok

19Nchot i Stibhen nnyi ta á yúi yê nná, a bhák na ekpatə́m í nchot mbâ atóbhá Jisos. Ka echî njí, á bê á jak ka nték i Fonesiya, Sayiprus na Antiyok. Á jená ka ngûm nnyí á səra otîp ogyebhá-ḿbə́ŋé mbâ ane Jus átíŋ.#Etûm 8.1-4. 20Kən etʉ̂ ábho mba á dʉ̂ Sayiprus na Sirin á jak Antiyok á jî róghe ekubhúm na ajéné, á sə́re ábho otîp ogyebhá-ḿbə́ŋé Ńtâ Jisos. 21Ńtâ Jisos yê ḿfoné a kaghá ábho obhô, ane etî-etî fə́ne á kî ḿbə́ŋé á chə́bhe atóbhá abhê.

22Echəme atóbhá Jisos ka Jerusarem á yûk nchot nnyí, á tûm Banabas ágo nnyi Antiyok. 23Nji Banabas a jiî, a yên yê ḿfoné se Obhasi a tóŋe onobhá-eji na ábho, é gyébhe yê kpe-eji. A kâk ábho ḿbə́ŋé á gyími na Ńtâ Jisos na osoná-ḿbə́ŋé. 24Banabas ngá a ri a re nne nnyo ekpin ejê é rî ka nnyen-i-mbá, Obhasi Ebhare Ntʉgantʉ a súi yê ka biji. A kíi fə́ne ḿbə́ŋé na Jisos tə́mé-tə́mé. Ane etî-etî á yóŋe á chə́bhe atóbhá Jisos.

25A yə̂p mân a jak nnyi Tasus a jí ko Sol. 26A wôm yê a yên. A kô mân yê a bhák nnyi Antiyok. Yê na Sol á kâ áfo eyâ ndə́m na echəme atóbhá Jisos, á kpik ane etî-etî. A ri ka eték í Antiyok nâ á róghe atóbhá Jisos ebhiŋím sê Atem-ane Krayis.

27Kən akará-otîp Obhasi etat á bhak nnyi Antiyok. Á dʉ̂ Jerusarem. 28Yót nnyo á kamá se Agabus, ka ikom Obhasi Ebhare Ntʉgantʉ, a sə́re se ekpatə́m í njaé tîk a bhák ka ngûn ndə́m. Njaé nnyí fə́ne a bhák kən kpe otúi Krodiyus nnyo Ntûfâm i Rom ó sí ntə̂m.#Etûm 21.10. 29Ka nchot i njaé nnyí, atóbhá Jisos á kére sê kpe nnyón nne, a túp ntí ka ekpak nji yê a fonê, á nyáŋé atem ka Judiya. 30Á tûp, á kô ntí mmí á tûm mbâ ane-echî ka echəme atóbhá Jisos ka Jerusarem. Banabas na Sol nâ á kóe ntí mmí á jak.

Currently Selected:

Etûm ágbán~í jisos, echî 11: ETUNT

Highlight

Compare

Copy