Etûm ágbán~í jisos, echî 10

Pita na Konerus

1Nne-ndûm yót a ri ka Sesariya a kamá se Konerus. A ri ntûfâm ane-enok ka Rom mba á bhíŋa sê Ekam Itariya. 2A ri nne nnyo á korá achot Obhasi. Yê na ndə́p-i-njû eye fép á jígha Obhasi kpe-eji. A kí noghâ nnyen enoghóm se yê a nyáŋé ane Jus mba á rî ka eket, á gorá fə́ne Obhasi chénchén ebhú.

3Nchên yə́t, ńkánínká a sî kpe ésá, nne-ndûm nnyó a yên ejûm noŋ ndem. A yên énjel jáé noŋ a bháe a bhîŋ yê se, “Konerus.”

4A yûŋ amə̂t a kí kep énjel nnyó na efup. A bhə̂p yê se, “Ńsé, jen?”

Énjel nnyó a táme se, “Obhasi a yûk agore amâ, a yên ntûm onyáŋá-ane eya, a tît wâ. 5Tûm mân ane á jî Jopa á jí bhîŋ nne etat a ri ágo a kamá se Simun Pita. 6A ri ka njû Simun nnyo nyima-etûm agu-onyam, kpít na mkpe aya.”

7Nji énjel nnyó a chorê a jak, Konerus a bhîŋ ágbán abhê ábháe a kpê na nne-enok yót ka mba á rî ka óséré obhê. Nne-enok nnyó a korê nchot Obhasi eróŋ kpe-eji. 8A sə́re ábho nji é fábhe na yê, a tûm mân ábho nnyi Jopa.

Ndem nnyi Pita a yéne

9Ntem-ofú na nchên, ejûm bəre ńkánínká ófó na ébháe, ane mbá á nyə́ne ka mbá, kən mbá á ka kpó rap, á si Jopa. Na nchên ányi, Simun Pita a gyʉ̂t a jak ka ósô njû se yê a jí goré Obhasi. 10Njaé a kí yam yê a róghe ekérém nji a kí di. Kən nji édî é nyə́ne ka ngûn, a yên ndem na efín. 11A yên ósô ó rəbhe, ekpatə́m éfô etat á táŋe otáŋ ka nkûk eye énî é kí bhət é bhak nnyi nsi. 12Ka etím éfô njí, kpe bhaghé nnyam a ri, onyam mbi ó jéna na akát oo, mbi ó jéna na ngaŋ oo, mbi ó fə́bha ofəbhé oo. 13A yúghá eyum é chot se, “Pita, duî ngyím, yúi dî.”

14Kən Pita se, “Ntûfâm ḿ bó di, ka ń ka nok odí ejûm kpe jə́t nji ebhín é tóe sê é fôn akôp.”

15Eyum njí é kpô chot, é sə́re yê, “Ejûm nji Obhasi a kô se é ká fon akôp, o kâ sə́re se é rî na akôp.” 16Ejûm njí é yími ntə̂m ésá kən éfô njí é chə́bhe njəm nnyi ósô.

17Pita a kére echî ndem nnyí é chíŋi yê. Ńga ane mba Konerus a túmi á wom njû nnyi Pita a sʉ́i, á bha ta á si nnyo-mbá. 18Ane mbá á bhîŋ á bhə̂p ájoé Simun nnyo á kamá se Pita a ri. 19Pita ngá a nyə́ne a kérá nchot nnyí, kən Obhasi Ebhare Ntʉgantʉ a sə́re yê se, “Ńgyê, ane etat ásá á kí kep wâ, 20bhət kpúghi ábho babhap. Ka táŋe se ó bhó ji na ábho. Mme nâ n túmi ábho bəre á bhá.”

21Pita a bhə̂t a jak, a bhə̂p ábho se, “Mme a ri nne nnyo ó woma ên. O bháe ên jen?”

22Á táme sê, “Konerus, nnyo ntûfâm ane-enok, nâ a túmi êt mbâ eya. Yê a ri nne nnyo ekpin ejê é rî ka nnyen-i-mbá, á jigha Obhasi kpe-eji. Kpe nne Jus fə́ne nnyo á bhó jighi yê cháŋ. Énjel Obhasi nâ a sére yê se a túm wâ ó bhá ka njû eye, a yúk nji-nji o fonê ka esə́rə́m yê.” 23Pita a kô fə́ne ane mbá ka njû. Á kâ áfo na yê ta ó chê.

Pita a jî mbâ Konerus

Ofú ó kpó to ó ché, Pita a tʉ́ri biji a jak na ane mbá. Etʉ̂ atem-abhon-í-nnyen ka Jopa á tôp ábho á jak. 24Á kâ ka mbá, ntem-ofú á ka Sesariya. Konerus a ri ori a chighá ábho. A sə́re ndə́p-i-njû eye na atem abhê se á chîk na yê.

25Nji á yéne Pita a kə́ bha ogyé njû, Konerus a bhéne a jî gbô yê ka ochî. 26Kən Pita a fî yê se a ruí ngyím. A sə́re yê se, “Duî ngyím, mme a ri ntem-nne áno eróŋ, ń ka joé ekpak etat.” 27Konerus a rúi fə́ne ngyím á kí ji ka njû, Pita a kubhá na yê a jak.

Ane etî-etî á rî ágo ka njû á chighá ábho. Nji Pita a gyée njû, a kpúghi ekam ane njí. 28A sə́re ábho se, “Ó məŋe ên, ên áfoné, sê e fonê ebhín sê nne Jus a kâ chə̂m biji na ajéné, kpe ejen mbâ ábho a kâ jî. Kən Obhasi a tóŋe ə̂m jáé se n kâ bhîŋ kpe nne yót bəre nne akôp. 29Nâ ejûm é yími ə̂m m bák kpe áfírí ń ka fírí. Sə́re ên ə̂m ejûm nji é yími kən o tûm á bhá bhîŋ ə̂m.”

30Konerus se, “Mfín a chîŋ énî égyé. Ka nkúbhi ebhú njí n di n kí goré Obhasi ka njû amé. Ńkánínká a sî kpe ésá na nchên ányi, ḿ kpó yenâ nne na ábháré ḿfô ka biji kpóŋ a fâp ə̂m ka ochî chák. 31A chôt se, ‘Konerus, Obhasi a yûk agore amâ, a yên ntûm onyáŋá-ane eya. 32Tûm nne a ji Jopa a jí bhiŋ nne etat nnyo á bhíŋa sê Simun Pita. A sʉ́i ka njû Simun nnyo nyima-etûm agu-onyam, kpít na mkpe aya.’ 33Nâ ńjə́ne é yími n tûm áno ane ebhú jə́t. Ó nop fə́ne ḿbə́ŋé ó bha. Yên êt e ri mfá chénchén ka ochî Obhasi, sə́re êt nji Obhasi a karê wâ se ó sə́ré êt.”

Nchot nnyi Pita a sə́re Konerus na ndə́p-i-njû eye

34Pita a róghe fə́ne echoróm se, “Ka etʉri, ń yen bəre Obhasi á bhó ko ńnyo nne se owe, ńnyô se owe asík.#Otira 10.17. 35Kən kpe ka bhaghé eték, kpe énê nnyo a kí jighi Obhasi a yimá iyîm ka nnyen-i-mbá, Obhasi a kí kam na ntʉ́ghi nne nnyó. 36Ó məŋe ên otîp ogyebhá-ḿbə́ŋé obhê, na otîp ekone obhê mbi a túmi na Jisos Krayis, mbâ ane Isrel. Jisos Krayis a ri ntûfâm nnyo a chíŋi ochíŋ. 37Otîp mbí nâ á sə́re nná ka Judiya ndə́m, é róghé ka Gariri ka ebhú nchot ofúgha-ayép Obhasi mbi Jon á chorá nná. 38Kən Obhasi a karê Jisos nnyo nne Nasaret nnyó, Ebhare Ntʉgantʉ na ikom. Jisos nnyó á jená ka ngûm a yimá ono, a yimá ane chénchén mba Satan á seŋá á soná, ka Obhasi a ri na yê.

39“Êt a ri atî-isê ka chénchén iyîm mbi a yimî ka nték i Jus na ka Jerusarem. Á kûm yê ka ego, a kpô. 40Kən ka osúí mfín ésá, Obhasi a yîm yê a nyə́me ka ekʉ̂. A tóŋe yê mbâ ane 41mba yê a sáŋe se á gyímí noŋ atî-isê, á ka tóŋé mbâ ane chénchén. Nji a chəbhê njəm ka ekpin, e dî, e gwô na yê. 42A káre êt mân ikom se é sə́ré otîp ogyebhá-ḿbə́ŋé Obhasi mbâ ane, é sə́ré noŋ atî-isê, sê yê nâ Obhasi a sáŋe se a joé ntáŋa-achot mbâ ane chénchén, mba á kpóe okpó na mba á rî mbít. 43Akará-otîp chénchén á chôt á kpê na Jisos nnyó. Á sə́re sê kpe énê nnyo a kíi ḿbə́ŋé na Jisos nnyó, á kí ri nsôn á sû obhí obhê ka ikom í mbiŋ eye.”

Ane mba Jus asík á fon Obhasi Ebhare Ntʉgantʉ

44Nji Pita á chorá áno, Obhasi Ebhare Ntʉgantʉ a bhák mbâ ane chénchén mba á yúgha nchot eye. 45Ane Jus mba á kíi ḿbə́ŋé na Jisos, mba á bháe na Pita nnyi Jopa, é mân ábho biji kpe-eji nji á yéne sê Obhasi a kə̂p Ebhare Ntʉgantʉ mbâ ajéné eróŋ. 46Echî nji á mə́ŋe sê Obhasi a káre ábho Obhasi Ebhare Ntʉgantʉ a ri nji á yúghi ane mbá á chə́bhe á chorá ka nyum i nték etat nnyi ábho á ká məŋé, á kará ejík mbâ Obhasi.

Pita a bhə̂p se, 47“Obhasi a káre ane mbá Ebhare Ntʉgantʉ noŋ a karê êt eróŋ. Nji é kí kpo gbʉi ábho á kâ fûk ayép a ri jen?” 48A káre mân ikom se á fúk ábho ayép ka mbiŋ i Jisos Krayis. Ane mbá á sə́re Pita sê a ká na ábho mfín kpe áno.

Currently Selected:

Etûm ágbán~í jisos, echî 10: ETUNT

Highlight

Compare

Copy