2 Pita, echî 3
3
Ofú Ńtâ Jisos a kə́ bha
1Atem í ḿbə́ŋé, na ńnyi nâ osúí nwet ébháe nnyi ń seŋ ên. Ka nwet nnyí ébháe ń nok bəre ń nyíŋi ên bəre ó fôn ên ḿbə́ŋé jáé ka etirím ên achot mmá. 2N kí wom o tirá ên achot mma akará-otîp Obhasi á sə́re ên ta ebhú áji. Tirâ ên fə́ne ebhín í Ntûfâm owəré Jisos nnyo á yimá êt e sémá. Ebhín njí nâ ágbán í Jisos á káre ên. 3Ndaŋa-mbá ejûm nji o fonê ên ka eməŋə́m é rî sê, ka nsígha-njə̂m ebhú ane tîk á jóe mba á kí tua Obhasi, á tobha echâk ekpin ábho.#Jʉt 18. Á kí chorâ 4sê, “To Jisos a chimî se yê a kí kpo bha, yê maná? Ta ka eróghá-ndə́p í ngun, ta é si égyé, ásé abhə́ré á kpo á ji, nji é yóŋe cháŋ.” 5Á wóma á gyíni sê ta ka eróghá-ndə́p Obhasi a kóe eyum í nnyo ejê a yîm ósô na nsi. Ngun a dʉ ka ayép. Obhasi a kóe ḿmáne, a yîm ngun.#Eróghá 1.6-9. 6A ri na ayép fə́ne mma á móbhe ngun nâ Obhasi a kóe a bhíbhi ngun éməné.#Eróghá 7.11. 7Kən na eyum í nnyo ejê, Obhasi a kî ósô na nsi se yê a bhíbhí na ngûn. Á kik áno se ta ebhú á taŋ ane abhí, a bhíbhi mân a kpê na ábho.
8Atem í ḿbə́ŋé, o kâ gyíni ên sê ka ochî Ńtâ Obhasi ofú bhə́t na nsam i nyâ ka nyâ á ka chíŋí atem. Yê á kok se ejûm jə́t.#Nkôn 90.4. 9Obhasi á bhó bhibhi ebhú ka eyimím nji-nji yê a chimî noŋ ane etat á kéra. A ri nsôn nâ á yimá yê áno a kə́bhá ḿbə́ŋé. Echî aŋ? Á ka wóm se kpe nne yót a kpó a tán. A wóme se chénchén nne a kpíghí njəm a karé obhí obhê.
10Kən Ofú Ńtâ Jisos ó kə́ bha noŋ nnyágha-ejʉ̂. Ka ofú ábhi, ósô ó kí tan na ekpatə́m ejok, iyîm chénchén ka ósô í kí rik í kpô. Ngun fə́ne na chénchén nji é rî ka ńnyə́ne a kí tan.#Mat 24.43; Luk 12.39; 1 Tes 5.2; Ndem 16.15. 11-12Ájoé nâ noŋ á kí bhibhi chénchén iyîm, bhaghé ekpin mân nâ ên o ri ó fôn ên? Nji ó chighá ên nná sê Ofú Obhasi ábhi ó sí, o ri ó káre ên biji mbâ Obhasi, ekpin ejə́né é kâ fôn akôp. Gorê ên fə́ne sê ofú mbí ó bhá babhap. Na ofú mbí ósô ó kí rik, iyîm ósô chénchén í kí sare, ka efû nji é kí gbo. 13Kən êt e kí chik ejûm nji Obhasi a chimî. A chimî ósô mbi fê, ngun nnyi fê. A ri ekpin ka nnyen-i-mbá nâ é fóne ngun i mfê nnyí.#Asa 65.17; 66.22; Ndem 21.1.
14Atem í ḿbə́ŋé, nâ mân nji ó chighá ên sê ofú ábhi ó sí, nok ên o kâ fôn ên akôp ka ochî Obhasi, á kâ yên kpe ejûm ebhí jə́t á kpée na ên. Deê ó nôk ên ó jóe ka ekone na Obhasi. 15Yuŋ ên amə̂t kêp okə́bhá-ḿbə́ŋé Ńtâ Jisos owəré nji a kí toŋe ó sém. É rî noŋ ntem i ḿbə́ŋé owəré, Pol, a séŋe ên ka ekpak aron mma Obhasi a karê yê. 16Ekpak aron mmá nâ á kok a séŋá chénchén onwet obhê mbi ó kpée na achot mmá. Iyîm í rî mbi í kí yuŋi eməŋə́m echî ka onwet obhê. Ka obhô mbí, ane etat mba á ká məŋé á kí bhiŋâ á səra echî ekpak etat noŋ fə́ne á yíma na iyîm etat mbi á séŋe ka nwet Obhasi. Eyimím ábho njí é kə́bha ábho na ekʉ̂.
17Kən atem í ḿbə́ŋé, ên ó raŋ ên mbá ó məŋe ên iyîm mbí. Gyími ên mân ibhábhé ane mba á bhó jighi ebhín Obhasi á kâ yîm ên ó tán mbá, ó mághe ngyím eyəné nnyi na Obhasi. 18Deê ó kə́t ên o kúá ka onobhá-eji na eməŋə́m nji o məŋê Ntûfâm owəré Jisos Krayis, nnyo á yimá êt e sémá.
Deê ejík é jóe é káre yê mfá-mfá na ka ótúm-ótúm. Áno.
Ejagham New Testament © Bible Society of Nigeria and Bible Society of Cameroon, 1996.