2 Pita, echî 2
2
Obhô etûm ane áfúbhí
1Éməné akará-otîp mba áfúbhí á rî. Ka ekpak njí jə́t, ane áfúbhí tîk á fâp ka ekam ejə́né mba tîk á kpik ane achot áfúbhí. Á kə́ bha ka ebhə̂t na okpígha-ejûm áfúbhí na ekʉ̂. Á kí taŋé kpe na Ńsé nnyo a yimî ábho á sêm. Ńji nâ é kə́ bha ábho na ekʉ̂ ka ngyím ányi. 2Kpe noŋ é rî áno, ane etî-etî tîk á tôp achot akôp ane áfúbhí mbá. Ka iyîm mbi ane áfúbhí mbá á kí yim, ane tîk á chôt achot abhí á kpê na Mbá mfoné nchot Obhasi. 3Ka ntuŋ ábho akpíghá-ane achot áfúbhí mbá á kí yim orʉrí etî-etî ka achot mma á púi opu á səra ane. Nne nnyo a kí taŋ ábho ta a tʉ́ri biji kpúú, yê nnyo a kí bhibhi ábho a ri mbít, a kí yen ábho.
4Baénjel mba á yími obhí, Obhasi á ka maghé ábho, a tûp ábho ka ngun ekpatə́m oseŋe. Á fîn ábho ágo na ejírim á chígha ofú Obhasi a kí taŋ ngun. 5Nji ngun éməné á yími obhí, Obhasi á ka maghé ábho, a tûm ayép á bhâ bhíbhi ngun obhí ányi. A yíghi təm Nowa nnyo á səra ane se á fôn ekpin ka nnyen-i-mbá, é kpê na ane anígisá mba tat.#Eróghá 6.1—7.24. 6Obhasi a bhíbhi nték i Sodom na Gomora na ngûn se á jóe noŋ eriŋ ane á yén ekpak é kí fap na ábho nji á bhó fon ekpin ka ekpak nji yê a wóme.#Eróghá 19.24. 7-8Nji ane abhí mbá á yíma echâk ekpin, é ka gyebhé Lot ka ḿbə́ŋé. Yê Lot a fonê nnyen erû, a kâ na ane mbá, ofú na ofú a yên, a yûk achot mma ábho á yíma. Ḿbə́ŋé eye á ka gyebhé ka etím. Obhasi fə́ne a yíghi yê ka ofiná-ḿbə́ŋé mbí.#Eróghá 19.1-16. 9-10Məŋê ên mân sê Obhasi a mə́ŋe ekpak a kí yighí ane mba á fóna ekpin ka ekpak nji yê á woma ka egaé nji-nji á gáe ábho. A mə́ŋe fə́ne ekpak nji a kí kpəré ane abhí tata ofú mbi yê a kí taŋ ngun ó si, títí mba á kí tobhâ echâk ekpin ábho na ekot ábho, á taŋá sê ábho cháŋ ka óséré Obhasi.
Ofaŋá-ḿbə́ŋé na owághá ka nnyo mbi ó rî ane áfúbhí mbá ó chiŋi obhô ka eji á bhó jighi baénjel Ósô á tuk ábho a ri atû. 11Kpe baénjel mbá mba á chíŋi ochíŋ, á fon ikom á chiŋi ane áfúbhí mbá, á bhó bhibhi obhiŋ ane mbá na kpe á tú ábho atû ka ochî Ńtâ Obhasi. 12Kən ane mbá á yíma iyîm noŋ ichóe noŋ onyam-etə́m mbi á jíi sê ane á yua á dik. Ejûm-ejûm nji á rô məŋé echî, á tû otú. Tîk á kpô fə́ne noŋ onyam etə́m.
13Ka ekpak ábho á kára oseŋe mbâ ane etat nâ noŋ fə́ne Obhasi a kí karé ábho. Íkíkéré etat á fóna cháŋ a ri mfi obhí eyimím jáé, nsôn á bhó yim ábho. A ri ekpatə́m etû na ísonê ka efonóm ane ntʉ́ghi mbá á chə̂m na ên á dí édî echəme atóbhá Jisos. Á gyébha a ri ḿbə́ŋé na ekpin áfúbhí ábho. 14Eji etat amə̂t ábho á gbôk cháŋ a ri ka biji nne-nkáé. Mbâ ábho, ekot obhí eyimím, é bhó kimi bhúghí-bhúghí. Ó ro son nná, á chóa o gbô ka obhí. Nji tat á kéra ka ḿbə́ŋé cháŋ a ri sê á fôn á kpée okpe kpe nan kpe nan. É bhip ábho kpe ebho cháŋ ocháŋ. 15Á maghe mfoné mbá, á tan, á chəbhe á tobha mbá mmi Beram, nnyo mmon i Beyo. Beram nnyó a ri nne nnyo á foná ogyebhá-ḿbə́ŋé ka eyimím obhí, a foná ntí.#Mfana 22.4-35. 16A yimî ekpin njí ta Obhasi a tóŋe yê indəré. Nji é fábhe a ri sê mfoŋ echóé eye a fáme yê noŋ kpe nne. A yîm yê a mághe ekpin í nnyam-ńnyâm ejê.
17Ane mbá á rî noŋ abhon ayép mba á kut. Á rî noŋ átʉ́k í ngurobhú mma ekpatə́m í mfêp a sûm. Obhasi a kî ábho eji ka ejírim nji é chíŋi obhô. 18Á bhak ochot nkat-ńkât, kən kpe nji á chóra ochot cháŋ. Á kí ko achot í ngun obhí nnyí mma ane á kóra, á rirá ane mba á nok ta á kə́ bha ofáp ka ekpin obhí, á chə́bhe njəm ka ńjə́ne. 19Á kí chimí sê ábho tîk á yîm ane mbá á sêm, ńga ábho áfoné á gbo osʉ́ŋ á karé ekpin nji é kí yui ábho oyúí. Echî aŋ? Kpe énê a kí gbo osʉ́ŋ a káre kpe bhaghé ejûm nji sê é chiŋi yê. 20Nji nne a məŋê Ńtâ Jisos Krayis, nnyo á yimá êt e sémá, a sêm ka achot abhí ngun nnyí. Kən nne á kam á ríri yê a chə́bhe njəm ka ḿmáne, é kí bhip yê é chíŋi ndaŋa-mbá kən a bhá məŋé Jisos Krayis. 21É nóbhe kə́n ane ntʉ́ghi mbá á kâ mə́ŋe nchot ekpin ka nnyen-i-mbá, na nji á məŋe á kpô chəp njəm á kare ebhín Obhasi nji á káre ábho. 22Nâ é fap na ábho noŋ ngan nnyi á túbhi sê, “Njô a chə́bhe njəm a dî nkʉ eye. O fî akûk o yúmi ayép, a chə́bhe njəm a nóme ka otop.”#Ngan 26.11.
Ejagham New Testament © Bible Society of Nigeria and Bible Society of Cameroon, 1996.