Lute 3
3
Lute Woona ku Matende aka Bowazi
1Iinzho Naomi bainazhala Lute wakamwaambila ati, “Mwanangu, sa indatakukapulila kwa kulyookezhezha kwaamba chibe kabotu kwako? 2Sa tali Bowazi musazhinokwesu, wezo mukamwini batumwale mbuusebeza abo? Bona, ubwasunu mashiku nguuwululula kwakuumina maila a bale u wiiti. 3Samba, nana mafhuta, sama chisani chibotu, wamana uye, ukunkuluke kuya kwakuumina maila a bale u wiiti, pele utalitondezha kwakwe, kushikila walo amane kulya u kunwa. 4Mbwaakaila bulyo ukoona, uwe waalangishe abusena awo ngaati awone. Wamana uye umuhumbule kumatende akwe u koona ko, kuhwaawo walo mukamwini ulakushimwina cha kuchita.” 5Ngoonaawo Lute wakaingula ati, “Shoonse shesho nshuwaamba ume ndashichita.”
6Ngoonaawo wakakunkuluka ukuya kwakuumina maila a bale u wiiti, u kuchita umbona mbuli bainazhala mbwakamulailila. 7Bowazi naakamana kulya u kunwa, kabotelelwe mu monzo wakwe. Amane wakaya koona ku mamanino a mulwi wa maila. Ngoonaawo Lute wakaya kashobele u kumuhumbula kumatende akwe u koona ko. 8Akati ka mashiku, Bowazi wakatilimuka u kwaampa-ampa, wakazhingwa kuyana mukaintu wuulele kumatende akwe! 9Wakamubuzha ati, “Ndiweni uwe?!” Ngoonaawo wakaingula ati, “Ndime Lute, mutwanga wako. Zala mababa ako a mutwanga wako, nkaambo uwe ndiwe shikulyeezhina.” 10Aze wakamwiingula ati, “Ulilongezhelwe kwa Yaahwe, mwanangu! Lolu luse luteeli nduwatondezha kumamanino ndukando kubaala lwa kumakankilo, nkaambo wiina kutaanguna kuzanda balombwana bakubushi, bapushi na bahubi. 11Iinzho, mwanangu, utatiyi. Ume ndakuchitila shesho shoonse nshiwalomba, nkaambo boonse bakando ba kumanjililo a munzhi mukando balizhi ati uwe uli mukaintu mwini-mwini ulimwi mulemu. 12#Lute 2:20Chilishinizhe ati ume ndime shikulyeezhina. Pele kumbele lyangu, kulyuumwi shikulyeezhina uli kufhwaafhwiisha kubaala ume. 13Ona awa ngoona cha mashiku ano, pele chifhumo-fhumo, na ulakakunununa, ati mbubo; naakachite bobo. Pele kuti na akakake ukunununa, kufhumbwa kuti Yaahwe mbwaali mumi, ati ume ndimwini ndakabotelwa kukunununa. Ona awo kushikila buche.”
14Ngoona wakoona kumatende akwe kushikila chifhumo-fhumo, pele wakabuka kaachishiya a matashi, lelya bantu nibatakonzha kutelaika kuzhibana. Wakamulailila ati, “Chitazhibwa ati kwakuumina maila a bale u wiiti kakulele mukaintu.” 15Katana kuya, wakamwita ati, “Leta chisani checho nchuusamine u chikwate kabotu.” Lute wakachita bobo, amane wakamupimina intumba chisambomwi#3:15 intumba chisambomwi na tu galoni tone sha bale u kumupa. Ngoonaawo wakabweela ku munzhi mukando. 16Naakashika kwa bainazhala, Naomi wakamubuzha Lute ati, “Sheenda buti shintu mwanangu?” Ngoonaawo wakapandulula shoonse shesho nshaakamuchitila, 17u kwaamba ati, “Sheshi intumba chisambomwi a bale, wampa u nkwinta ati, ‘Utabweela chinkambaminwe kwa banokozhala.’ ” 18Naomi wakaingula ati, “Lindila, mwanangu, kushikila waateelele makani mbwati aende, nkaambo welya mulombwana takashitikila kushikila amaninzhe makani aza bwasunu.”
Bible Society of Zambia