Lute 2
2
Lute u Bowazi Baswaangana ku Muunda
1Iinzho Naomi kakwete musazhiina mulumyaakwe, wakaakuli inkalakata ya mulombwana, ulimwi muntu mulemu ulimwi muhubi, wa luhubo lwa Elimeleki, izhina lyakwe kali Bowazi. 2#Bale 19:9, 10; Chiz 24:19Lute Mumowabu wakamwaambila Naomi ati, “Ndakumbila nduukuya, ambweni ndakakwata choolwe kubamukamwini myuunda, nkapupule bale#2:2 bale mushobo wa mucheme welya ushaala, ngu bashiya basebezhi.” Ngoonaawo wakamwiingula ati, “Koya, mwanangu.” 3Lute wakazhimuka u kuya kupupula mu myuunda, kaya buchilila batebuzhi, kushikila limwina, mu choolwe wakashika ku muunda waka Bowazi, wa luhubo lwa Elimeleki. 4Nchichona checho chiindi aze Bowazi wakashika kuhwa ku Betelehemu. Wakabaambila batebuzhi ati, “Yaahwe abe amwe!” Abo bakaingula ati, “Aze umbona, Yaahwe akulongezhe!” 5Amane Bowazi wakabuzha mwana mukubushi, mweendelezhi wa batebuzhi ati, “Anu wezu kamwale ngwakani?” 6Mwana mukubushi mweendelezhi wa batebuzhi mu myuunda wakaingula ati, “Ngu kamwale Mumowabu, wezo wakazhiza u Naomi kuhwa ku chishi cha Mowabu. 7Waamba ati, ‘Ndakumbila ati ndukuya buchilila batebula kwaamba ndukupupula mu mile ya bale imwi.’ Ubobo weza, wapupula kuhwa chifhumo-fhumo kushikila ucheno chiindi, chita bulyo kaindi kashoonto nkaalyoochezha.”
8Ngoonaawo Bowazi wakamwaambila Lute ati, “Iinzho, teelela mwanangu, utamuhwi mono pe, utayi ku muunda unji kuya kupupula bale, pele kakatila kupupula afhwaafhwi u batumwale bangu. 9Kulangilila bulyo mu muunda mu batebula, kwaamba aze wuukubachilile. Ndakabalailila bana beembezhi bangu ati batakushupa pe. Ulimwi na kuti wafhwa inyotwa, uye ku shingomo u kunwa meenzhi alya ngubateka kale bana beembezhi.” 10Ngoonaawo Lute wakahuntama u kumwaambila Bowazi ati, “Anu mbuti mbundayana choolwe ku bushu bwako, kwaamba uwe umbone u kunzhiba ume ndi muhwamashi?” 11Pele Bowazi wakamwiingula ati, “shesho shoonse shiwachitila banokozhala kuhwa niwakafhwilwa mulumyaako, bakanshimwina, umbuwakasanikizha uso u banoko, lunungu lwako u chishi chakwenu, ukwiza ku bantu babo mbuwataakwizhi. 12Yaahwe akupe bulumbu buzulile ku shintu shoonse nshiwachita. Yaahwe, Leza wa Izilaili, wezo nguweza kulishisha mu mababa akwe, akupe shoonse shikweelele!” 13Ngoonaawo walo wakaamba ati, “Ume ndayana choolwe ku bushu bwako, shimatwangaangu, nkaambo nikuba ati ume nshili wa muŋanda yako, uwe wambona ulimwi wankalika chamba u kuŋumbulizha ku mazwi a luse luteeli nguwaŋambila.”
14Chiindi chakulya nichakashika, Bowazi wakamwita Lute ati, “Kweza kono, swena afhwaafhwi, aze ulye chinkwa ulimwi wuukubwenga mukusu wako mu waini ulula.” Ngoonaawo Lute wakakala kumbali u batebuzhi, pele walo wakamutambika bale mukange. Ubobo wakalya kushikila limwi wekuta u kulamwa, wakashinzha umwi. 15Naakazhimuka kwaamba ulimwi akanke kupupula, Bowazi wakabalailila bana beembezhi bakwe ati, “Amumuleke apupule mu mile ya bale yaangilwe kale, mutamusampuli pe. 16Ulimwi muukukusha makunka mu mile yenu njimwabweza, ukwaleka kwaamba akubwezelela, mutamulemanina na kumusanikizha pe.”
17Ngoonaawo Lute kapupula mu muunda momo kushikila mangolezha. Naakewuuma bale njaakapupula, wakazuzha chikokooko. #2:17 chikokooko tu galoni tobile 18Wakazemuna bale wakwe u kuya ku munzhi mukando. Bainazhala wakabona bale ngwaakapupula wakahula. Ulimwi Lute wakakusha bale welya mukange ngwaakashinzha kulya, naakekuta. 19Bainazhala wakamwita ati, “Anu wapupulila kwi bwasunu? Nkukwi nkuwasebezela? Ulilongezhelwe kwa Yaahwe muntu wezo wakuzhiba uku kufhwila luse luteeli.” Ngoonaawo Lute wakamushimwina bainazhala muntu wezo ngwaakasebezela ati, “Izhina lya muntu ngundasebezela bwasunu ngu Bowazi.” 20#Bale 25:25Ngoonaawo Naomi wakamwita kufhwaafhwi mukamwanakwe ati, “Ulilongezhelwe kwa Yaahwe wezo shiluse luteeli utasanikizha bachikwete bumi u bafhwile!” Ulimwi Naomi wakamwaambila ati, “Wezo mulombwana musazhinokwesu, ulimwi ngu shikulyeezhina wesu.”
21Lute Mumowabu wakaamba ati, “Ulimwi, ume wenta ati, ‘kakatila kusebezela afhwaafhwi u bana beembezhi bangu kushikila bakamaninzhe kutebula.’” 22Ngoonaawo Naomi wakamwita Lute, mukamwanakwe ati, “Chabota, mwanangu, kwaamba ati ukusebeza u basebezhi bakwe batumwale, nkaambo mu muunda unji balaba nibakuchisa.” 23Kuhwaawo Lute wakakakatila kusebezela afhwaafhwi u batumwale baka Bowazi, ukupupula bale kushikila chiindi cha kutebula bale u wiiti#2:23 wiiti maila amwi akupanzha chinkwa nichakamana. Lute wakakala u bainazhala.
Bible Society of Zambia