Tushimpi 4
4
Bulumbu bwa Busongo
1Amuteelele, nu banangu, kulemanina kwaka ushenu,
amupupulalishe, kwaamba mukwate kuteelelesha,
2ukuti ndamupa milazho mibotu,
mutasanikizha injiisho yangu.
3Lelyo indakaakuli mwana mushoonto utaata,
muhwanda, ichenana mu menso aka baama,
4Taata wakanjiisha u kuŋambila ati,
“Monzo wako waakwatishe mazwi angu,
sunga malailile angu, ube mumi.”
5Yana busongo; yana kuteelelesha,
utaluba, utachinduluka kuhwa ku mazwi a mulomo wangu.
6Utasanikizha busongo, bulakakusunga,
bufhune, bulakukwabilila.
7“Busongo nchichikandosha. Yana busongo;
kufhumbwa nchuuyana, yana kuteelelesha.
8Lemeka busongo, bulakakusumpula,
kuti na wabukumbata, bulakakupa bulemu.
9Bulakakusamika mushini wa choolwe,
bulakakupa mushini wa bweebeshi.”
10Teelela, mwanangu, tambula mazwi angu,
kwaamba myaka ya bumi bwako ihule.
11Ndakuyiisha inzhila ya busongo,
ndakusololela munzhila shisuumene.
12Lelyo weenda, intaamuko yako teekapilingani,
kuti na walukanka, tukalifhumpuli.
13Kwatilila kulemaninwa, utakulekezha,
kweembele, nkaambo mbubumi bwako.
14Utanjili munzhila ya basofhweele,
uteenda munzhila ya babiyabi.
15Utachichiti, utayi alinchicho,
chileye, chiitilile.
16Nkaambo taboona chita bachita chibiyabi;
balakakilwa koona chita bafhumpuzhe umwi.
17Ukuti balalya chinkwa cha busofhwaazhi,
balanwa waini wa bulwati.
18Pele inzhila ya bululami ili ukoya mumuni wa kumanchela,
wezo uuya bumunikisha kushikila akalendebwe.
19Inzhila ya basofhweele ili ukoya mushinze ushiya mbii,
tabachizhibi chibafhumpula.
20Mwanangu, pupulalisha mazwi angu,
teya kutwi kwako ku twaambyo twangu.
21Shitakuhwi kubushu bwako,
shisunge mu monzo wako.
22Nkaambo mbumi kulibabo baayana,
mbumi bubotu ku mubili wabo woonse.
23Bamba monzo wako cha bunkutwe,
nkaambo momo mumuhwa bumi.
24Kusha kuhwa kwako iŋambilo ipilingene,
sakanya iŋambilo ya luchengo.
25Menso ako atongomwene kumbele,
menso ako asuumane kumbele lyako.
26 #
Bahi 12:13
Bambashika inzhila ya matende ako,
inzhila shako shoonse shilashitikizhiwa.
27Utaleyi ku chilyo na ku chimonsho,
chindulula itende lyako kuhwa ku bubiyabi.
Bible Society of Zambia