Tushimpi 2
2
Bubotu bwa luzhibo
1Mwanangu, kuti na waatambula mazwi angu,
u kuzobola malailile yangu,
2kuteya kutwi kwako ku busongo,
u kusukamika monzo wako ku kuteelelesha,
3eeya, kuti na woompolola kuteelelesha
wapozomoka kulomba kuteelelesha,
4kuti na washikapula ukoya siluva,
ukushiweza ukoya lubono luseseke,
5ndilelyo nuukaateelelesha kutiya Yaahwe,
u kuyana luzhibo lwa Leza.
6Ukuti Yaahwe ulapa busongo,
ku mulomo wakwe nkukuhwa luzhibo u kuteelelesha.
7Ulazobolela basuumene busongo buzwile,
njiintobo yabo beenda mu bwini-bwini,
8kukwabilila inzhila sha bubeteshi bubotu
u kweembela inzhila ya bashiluse luteeli bakwe.
9Iinzho mulakateelelesha bululami u bubeteshi bubotu
u bwini-bwini bwiingaine yiinzhila imbotu yoonse.
10Ukuti busongo bulakeza mu monzo wako,
luzhibo lulakabota ku bumi bwako.
11Bushichamba bulakakweembela,
kuteelelesha kulakakusunga,
12kukuhuna kuhwa kunzhila ya bubiyabi,
kuhwa ku bantu baamba shipilingene,
13babo basanikizha inzhila shisuumene
beenda munzhila shoomushinze,
14batangalila mukuchita chibiyabi,
basapwa mu bupilingane bwa chibiyabi,
15bantu banzhila shipilingene,
banyongene mu shiyanza shabo.
16Ubobo ulakahunwa kuhwa ku mukaintu muhwamashi ukala akati kenu,
kuhwa ku muhwamashi wa mazwi aainya-inya,
17wezo usanikizha mweenzhiina wa kubunakalindu bwakwe
uluba chihuminano cha Leza wakwe,
18ukuti iŋanda yakwe ilaloba ku lufhu,
inzhila shakwe ku bashikazwa.
19Kwiina naaba womwi uuya kwakwe upiluka,
naaba uzhokoloka kunzhila sha bumi.
20Ubobo ulakeenda munzhila sha bubotu,
kubamba inzhila sha baluleme.
21Ukuti basuumene balakakala munshi,
beni-beni balakakalilila mulinjiyo,
22pele basofhweele balakakushiwa munshi,
bashiluchengo balakazhulwa kuhwa mo.
Bible Society of Zambia