Myeelwe 6
6
Injiisho sha Bananzili
1Yaahwe wakaambila Mozesi ati, 2“Amba ku bantu ba Izilaili ati, ‘Lelyo mulombwana na mukaintu naapanga chishomezho, chishomezho cha Munanzili, kulikusha kuba wa Yaahwe, 3#Lk 1:15ulakalikasha kunwa waini u chakunwa chikola. Atakanwi viniga mupange kuhwa ku waini na chimwi chikola. Ulimwi atakanwi mushinza wa masaansa nikuba kulya masaansa, mateke na mazumu. 4Oonse mazuba a chishomezho chakwe, atakalyi chintu chihwa mwisamu lya masaansa, inseke na mapapa.
5“‘Ku mazuba oonse a chishomezho chakwe, kwiina kambeli kati kakaite mu mutwi wakwe, kushikila chiindi nchaakalyaaba kwa Yaahwe chikamane, ubobo ulakaakusalala. Ulakaleka isusu lili amutwi wakwe kwaamba likalampe. 6Kwa mazuba oonse akulyaaba kwakwe kwa Yaahwe, atakayi kufhwaafhwi u mutunta. 7Nuuba mutunta waka ushi na baina na munina mulombwana na mukaintu, kuti bafhwa, atakaleka kusalala, nkaambo kulyaaba kwakwe kwa Yaahwe kuli amutwi wakwe. 8Ulasalala kwa Yaahwe kwa mazuba oonse akulyaaba kwakwe.
9“‘Kuti na mulombwana wafhwa lufhu lwa kwaanzuka afhwaafhwi ngaabele, ubobo mutwi wakwe munanike ulakaleka kusalala, lelyo ulakasakula mutwi wakwe mu buzuba bwa kulisalazha; mu buzuba bwa chiloba ulakoosakula. 10Mu buzuba bwa lusele (8) ulakaleta inzhiba shobile (2) na inkwilimba shobile (2) ku mupaizhi kumulyango wetente lya kuswaanganina. 11Iinzho mupaizhi ulakapa yomwi kuba chipaizho cha chibi, ayo yezho imwi chipaizho chakutenta, kwaamba alekelekelwe chibi chakwe, nkaambo wakachita chibi kwiita mu mutunta. Mu buzuba bobo mbubona, ulakoosalazha mutwi wakwe ulimwi. 12Ulakalikusha kwa Yaahwe kwa mazuba a kulilyaaba kwakwe. Ulakaleta mwanaambelele muchende ukwete mwaka womwi (1) wa kuzhalwa, kwaamba chikabe chipaizho cha kuhumina mulandu. Pele chiindi cha kutaanguna tachikabalwa linji nkaambo kulyaaba kwakwe kwa kasofhwaala.
13 #
Inc 21:23, 24 “‘Yezhi njinjiisho ya Munanzili, lelyo chiindi chakulyaaba chakwe nichamana: Ulakaletwa kumulyango wetente lya kuswaanganina. 14Ulakaleta chipo chakwe kwa Yaahwe, muchende mwanaambelele ukwete mwaka womwi (1) wa kuzhalwa wiina butongo kuba chipaizho chakutenta, imbelele inzhazhi, yiina butongo, ikwete mwaka womwi (1) wa kuzhalwa, kuba chipaizho cha chibi, ulimwi u muchende wambelele wiina butongo, kuba chipaizho cha luumuno 15u chinzuma cha chinkwa chiina bumena, shinkwa sha bufhu bwa wiiti bulamushi buhwelelwe mafhuta, shinkwa shipampamene shiina bumena, shinanike mafhuta, chipo cha maila chabo u chipo chakunwa chabo. 16Mupaizhi ulakashileta kumbele lya Yaahwe u kupa chipaizho cha chibi chakwe u chipaizho chakutenta chakwe. 17Ulakapa muchende wambelele bu chipaizho cha luumuno kwa Yaahwe, antoomwi u chinzuma cha chinkwa chiina bumena. Ulimwi mupaizhi ulakapa chipaizho cha maila u chipaizho chakunwa. 18Iinzho Munanzili ulakoosakula mutwi wakwe munanike kumulyango wetente lya kuswaanganina. Ulakabweza masusu akaahwa ku mutwi wakwe munanike a mulilo uli kunshi kwa chipaizho cha luumuno. 19Ngoona mupaizh ulakabweza mweendo wa chamba cha muchende wambelele, lelyo waikwa, chinkwa chiina bumena chomwi, chinkwa chipampamene chiina bumena chomwi. Sheshi ulakashibika mu matashi a Munanzili amana kulisakula isusu lya kunanikwa. 20Mupaizhi ulakashizumbaanya bu chipaizho cha kuzumbaanya kumbele lya Yaahwe. Sheshi nshipanzha shisalala sha mupaizhi, antoomwi yiinsanda yezho yazumbaanyiwa u mweendo wa matako wezo ngwaapewa. Kwamana bobo, Munanzili ulakonzha kunwa waini.
21“‘Yezhi njinjiisho ya Munanzili. Pele kuti washomezha chipo kwa Yaahwe, ezeulu a chishomezho cha Bunanzaleta, mbubona mbwaalozha, kwiingaina u chishomezho checho nchaachita, checho ulakachita kuzungila anjiisho ya Bunanzaleta.’”
Kulongezha kwa Bapaizhi
22Yaahwe wakaambila Mozesi ati, 23“Ambila Aloni u banakwe ati, Mbubolya mbumukaalongezha bantu ba Izilaili, mukabaambile ati,
24“‘“Yaahwe amulongezhe u kumubamba;
25Yaahwe amweshe bushu bwakwe alyuuwe u kukufhwila luse luteeli;
26Yaahwe akatule bushu bwakwe alyuuwe u kukupa luumuno.”’
27“Ubobo balakabika izhina lyangu abantu ba Izilaili, ngoona ndakabalongezha.”
Bible Society of Zambia