Luka 6:27-49

“Pele ndaamwambila umwe noonse numuteelele ati, amubafwune ba shinkondonokwenu, amubacitile kabotu bamuswile, amubalonjezhe babo bamutuka, amubakombele bamupenzha. Kuti muntu wakuuma kwitama, cinduluka akuume ukwitama limwi. Ulimwi na umwi wakunanga icanshi, umuleke abweze ucikobelo. Ubape boonse bakumbila kwako, wezo ubweza lubono lwako, umulecele ataluzhola pe. Mbubona mbumuzanda kwaamba bantu bamucitile, amwe noombacitile mbubona. “Kuti mwaakufwini bulyo babo bamufwini, sa mulyeelele kulumbwa? Kayi abo ba shishibi balacita umbona bobo. Ulimwi kuti mwaakucitila kabotu babo bamucitila kabotu, sa mulyeelele kulumbwa? Kayi u bataluleme balacita shibotu. Kuti mwaakukweletesha bulyo bantu mbumutelaicila kwaamba balakamuzholela, no mulalumbwa buti? Kayi abo ba shishibi mbubacita bobo, balakweletesha ba shishibi nokwabo ulimwi balalanjila kutambula bweelele. Pele nombafwune ba shinkondonokwenu, ulimwi mubacitile kabotu. Amukweleteshe cakutalanjila kuzholelwa niciba comwi, ubulumbu bwenu bulakakomena, ulimwi mulakaba banakwe Leza Keemba Mutalabala. Nkaambo walo ngushimanga ukuli babo batalumba ubalifwini. Amube bashiluse umbona Ushenu mbwaali shiluse. “Mutabeteki, kwaamba amwe Leza atakamubeteki. Mutabici butongo muntu, kwaamba amwe Leza atakamubiki butongo. Amulekelele, amwe Leza ulakamulecelela. Amupe amwe mulakapewa, mulakeelekelwa camweelwe mubotu, cishindaile, citikumune cizwile mwaa. Nkaambo ceelesho ncimweelekela bamwi, aze Leza ncaakaasebezha kumweelekela.” “Ulimwi Jeso wakabaambila cikozhanyo ati, Sa moofwu ulakonzha kusololela moofwu nina? Sa tabawila mukalambwe boonse bobile? Shiciiya tamubaali mwiiyi wakwe. Pele kuti muntu wamaninzha lwiiyo, ulaba ukoya mbwaabele muntu wakamuyiisha. “Ulimwi, no ulabona buti kantu kali mulinso lya munyoko, waleka ishishi lili mulinso lyako? Ulakonzha buti kwaambila munyoko ati, kweza nkufwule kantu kali mulinso lyako, wamana tuliboni ishishi lili mulinso lyako? Uwe uushikuupaupa amenso, taanguna kukusha ishishi lili mulinso lyako, kwaamba ubone kabotu, wamana nuukakonzha kufwula kantu kali mulinso lya munyoko.” “Ulimwi kwiina isamu ibotu lizhala micelo mibiyabi, niliba isamu ibiyabi lizhala micelo mibotu. Nkaambo kufwumbwa isamu lilezhibwa kumicelo yalyo. Inkuzu tashicelwa ku mutubetube, musaansa toocelwa ku meya. Muntu mubotu ulaamba shibotu nshazobwele mu monzo wakwe, aze mubiyabi ulaamba shibiyabi shizwile mu monzo wakwe. Nkaambo mulomo ulaamba shizwile u monzo.” “No mulentilaanzhi ati, ‘Mwami, Mwami,’ pele tamushiciti nshimwaambila? Muntu woonse wiza kwangu, uuteelela mazwi angu ukwaacita, ndamutondezha mbwaabele. Ulikozhene umuntu wakazaka iŋanda, pele katana kukanka kuzaka, wakasha mwiimbi mulamfwu waya kweenzha ibwe. Amane wakakanka kuzaka intalisho ebwe. Inzho lweenje lwakapaya, meenzhi akauma kuŋanda yezho, pele ina niyakatapaala kaambo yakazakwa kabotu. Pele wezo uteelela mazwi angu amana taaciti ulikozhene umuntu wakazaka iŋanda ina mwiimbi. Lweenje nilwakezula meenzhi akeza kuuma aŋanda, inzho yakawa cakumaninina!”