Luka 6
6
Mubuzho Wakaambo ka Sabata
(Matayo 12:1-8; Maako 2:23-28)
1 #
Ciz 23:25
Mu buzuba bumwi bwa Sabata, Jeso wakaita akati kamyuunda ya maila. Ba shiciiya bakwe bakakanka kupulula makunka balapicisa mu matashi ukwaalya. 2Bamwi ba Falisi bakabuzha ati, “No kaamboonzhi mulacita citahuminyiwa u mulawo wesu mu buzuba bwa Sabata?”
3Jeso wakabaingula ati, “Sa mwiina nimwakabala mbwaakacita Devidi ciindi walo, u babo mbucaakulya abo naakafwa inzala? 4#1 Sam 21:1-6Wakanjila muŋanda ya Leza, wakabweza cinkwa cakapewa kwa Leza walya, ulimwi wakabaabanya u babo mbucakaakuli abo. Pele aakuli cilatonda kulya cinkwa ceci, cita mupaizhi nguyelele kucilya.”
5Inzho Jeso wakabashimwina ati, “Ume ndi Mwanaa Muntu ndime Mwami wa buzuba bwa Sabata.”
Jeso Waponya Muntu Uzuminine Itashi
(Matayo 12:9-14; Maako 3:1-6)
6Mu buzuba ubumwi bwa kulyoocezha bwa Sabata, Jeso wakanjila mucikombelo caba Juda kuya kuyiisha. Mucikombelo momo kamuli mulombwana wakaakuzuminine itashi lya cilyo. 7Ulimwi balembi u ba Falisi, bakamulanjilila kubona naa Jeso ulamuponya muntu wezo mu buzuba bwa Sabata, kwaamba bamupe mulandu. 8Pele Jeso keezhi kale matelaishi abo, ubobo wakamwaambila muntu wezo wakakuzuminine itashi ati, “Zhimuka kweza kono kumbele.” Welya muntu wakazhimuka waya kuzhima awo ngakaambilwa. 9Amane Jeso wakabaambila ati, “Inzho ndazanda kumubuzha bolya, anu Mulawo wesu ulatuhuminya kucita buti mu buzuba bwa Sabata? Kucita cibotu na kucita cibiyabi? Kufwutula bumi bwa muntu na kubuzonauna?” 10Amane wakabacebauka boonse, wamwaambila muntu wakaakuzuminine itashi ati, “Hungulula itashi lyako.” Wakacita bobo, ngoonaawo itashi lyakapona.
11Pele balo bakalitutwila bukali, bakakanka kulihwiyahwiya mulwabo kwaamba bazhibe mbubakamucita Jeso.
Jeso Wasala Batumwa bali Ikumi Ubatwesha Bobile
(Matayo 10:1-4; Maako 3:13-19)
12Ku ciindi ceco Jeso wakaya ku lupili kwaamba akakombe. Wakakomba kwa Leza mashiku oonse. 13Nibwakaca waketa ba shiciiya bakwe, wakasala bali ikumi ubatwesha bobile akati kabo, babo mbaakaulika lya butumwa. 14Saimoni ngwaakaulika izhina lya Pita u Andulu munina, Jemusi u Johani, Filipo u Basolomeyo. 15Matayo u Tomasi, Jemusi mwanakwe Alufeyasi. Saimoni wakaakuli uumwi wankamu ya cishi itewa ati Basengushi. 16Judasi mwanakwe Jemusi u Judasi Shikaliyoti shikumwaaba.
Jeso Wayiisha u Kuponya Balwazhi
(Matayo 4:23-25)
17Jeso naakakunkuluka alupili u batumwa bakwe, wakazhima abusena bubambasele, kali iinkamu inkando yaba shiciiya bakwe ulimwi umakamu abantu banji banji bakaakucilila Jeso bakahwa mucishi coonse ca Judiya umu Jelusalemu, bamwi bakahwa mu minzhi ya Taya u Sidoni yaakuzacilwe kumbali Kwizhiba. 18Bakeza kupupulala kukambauka kwa Jeso ukushilikwa malwazhi abo. U babo bakaakupenzhewa u myoza mibiyabi bakapona. 19Bantu boonse kabazanda kumukutuzha nkaambo insana shakaakuhwa kwa Jeso, kashibaponya boonse.
Kubotelwa Ukuusa
(Matayo 5:1-12)
20Inzho Jeso wakalanga kwaakuli ba shiciiya bakwe waamba ati,
Mulilonjelwe nubapushi nkaambo Bwami bwa Leza mbwenu.
21“Mulilonjelwe umwe numufwa inzala ninzho. Ukuti mulakekuta.
“Mulilonjelwe umwe numulila ceno ciindi nkaambo mulakasoozhewa.
22 #
1 Pita 4:14
“Mulilonjelwe umwe numusulwa, unumupenzhiwa, bantu nibamukaka ukumutuka ukumwaamba ati muli babiyabi ukaambo kakucilila ume ndi Mwanaa Muntu. 23#2 Maka 36:16; Inc 7:52Amutangale kwaamba ceci camuciticila, musotauce cakusapwa, kaambo bulumbu bwenu kwizeulu mbukando. Nkaambo umbona bobo bamaushabo mbubakacitila bashinshimi.
24“Mulakapenga umwe nubahubi, nkaambo mwatambula kale shibotu shenu.
25“Mulakapenga umwe numukushi iinzho, nkaambo mulakafwa inzala. Mulakapenga umwe numuseka, nkaambo mulakaungumana u kulila.
26“Mulakapenga umwe numutembaulwa ku bantu boonse, nkaambo imbubo bobo baushabo mbubakaakubacita bashinshimi babeshi.
Amubafwune ba Shinkondonokwenu
(Matayo 5:38-48; 7:12)
27“Pele ndaamwambila umwe noonse numuteelele ati, amubafwune ba shinkondonokwenu, amubacitile kabotu bamuswile, 28amubalonjezhe babo bamutuka, amubakombele bamupenzha. 29Kuti muntu wakuuma kwitama, cinduluka akuume ukwitama limwi. Ulimwi na umwi wakunanga icanshi, umuleke abweze ucikobelo. 30Ubape boonse bakumbila kwako, wezo ubweza lubono lwako, umulecele ataluzhola pe. 31#Mat 7:12Mbubona mbumuzanda kwaamba bantu bamucitile, amwe noombacitile mbubona.
32“Kuti mwaakufwini bulyo babo bamufwini, sa mulyeelele kulumbwa? Kayi abo ba shishibi balacita umbona bobo. 33Ulimwi kuti mwaakucitila kabotu babo bamucitila kabotu, sa mulyeelele kulumbwa? Kayi u bataluleme balacita shibotu. 34Kuti mwaakukweletesha bulyo bantu mbumutelaicila kwaamba balakamuzholela, no mulalumbwa buti? Kayi abo ba shishibi mbubacita bobo, balakweletesha ba shishibi nokwabo ulimwi balalanjila kutambula bweelele. 35Pele nombafwune ba shinkondonokwenu, ulimwi mubacitile kabotu. Amukweleteshe cakutalanjila kuzholelwa niciba comwi, ubulumbu bwenu bulakakomena, ulimwi mulakaba banakwe Leza Keemba Mutalabala. Nkaambo walo ngushimanga ukuli babo batalumba ubalifwini. 36Amube bashiluse umbona Ushenu mbwaali shiluse.
Mutabeteki Bamwi
(Matayo 7:1-5)
37“Mutabeteki, kwaamba amwe Leza atakamubeteki. Mutabici butongo muntu, kwaamba amwe Leza atakamubiki butongo. Amulekelele, amwe Leza ulakamulecelela. 38Amupe amwe mulakapewa, mulakeelekelwa camweelwe mubotu, cishindaile, citikumune cizwile mwaa. Nkaambo ceelesho ncimweelekela bamwi, aze Leza ncaakaasebezha kumweelekela.”
39 #
Mat 15:14
“Ulimwi Jeso wakabaambila cikozhanyo ati, Sa moofwu ulakonzha kusololela moofwu nina? Sa tabawila mukalambwe boonse bobile? 40#Mat 10:24, 25; Joh 13:16; 15:20Shiciiya tamubaali mwiiyi wakwe. Pele kuti muntu wamaninzha lwiiyo, ulaba ukoya mbwaabele muntu wakamuyiisha.
41“Ulimwi, no ulabona buti kantu kali mulinso lya munyoko, waleka ishishi lili mulinso lyako? 42Ulakonzha buti kwaambila munyoko ati, kweza nkufwule kantu kali mulinso lyako, wamana tuliboni ishishi lili mulinso lyako? Uwe uushikuupaupa amenso, taanguna kukusha ishishi lili mulinso lyako, kwaamba ubone kabotu, wamana nuukakonzha kufwula kantu kali mulinso lya munyoko.”
Isamu u Mucelo Walyo
(Matayo 7:16-20; 12:33-35)
43“Ulimwi kwiina isamu ibotu lizhala micelo mibiyabi, niliba isamu ibiyabi lizhala micelo mibotu. 44#Mat 12:33Nkaambo kufwumbwa isamu lilezhibwa kumicelo yalyo. Inkuzu tashicelwa ku mutubetube, musaansa#6:44 Musaansa:mucelo wakupanzha waini toocelwa ku meya. 45#Mat 12:34Muntu mubotu ulaamba shibotu nshazobwele mu monzo wakwe, aze mubiyabi ulaamba shibiyabi shizwile mu monzo wakwe. Nkaambo mulomo ulaamba shizwile u monzo.”
Bashikuzaka Maanda Bobile
(Matayo 7:24-27)
46“No mulentilaanzhi ati, ‘Mwami, Mwami,’ pele tamushiciti nshimwaambila? 47Muntu woonse wiza kwangu, uuteelela mazwi angu ukwaacita, ndamutondezha mbwaabele. 48Ulikozhene umuntu wakazaka iŋanda, pele katana kukanka kuzaka, wakasha mwiimbi mulamfwu waya kweenzha ibwe. Amane wakakanka kuzaka intalisho ebwe. Inzho lweenje lwakapaya, meenzhi akauma kuŋanda yezho, pele ina niyakatapaala kaambo yakazakwa kabotu. 49Pele wezo uteelela mazwi angu amana taaciti ulikozhene umuntu wakazaka iŋanda ina mwiimbi. Lweenje nilwakezula meenzhi akeza kuuma aŋanda, inzho yakawa cakumaninina!”
Currently Selected:
Luka 6: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.