Joshuwa 3
3
Bantu ba Izilaili balanduka Mulonga wa Joodani
1Iinzho Joshuwa wakabuka chifhumo-fhumo, wakazhimuka u bantu bakwe kuhwa ku Shitimu. Bakeza ku mulonga Joodani, walo u bantu boonse ba Izilaili, bakoona koko kulindila kwaamba balanduke. 2Nikwakaita mazuba otatwe (3) beendelezhi bakaya munkambe 3u kulailila bantu ati, “Mbumukalibonena bulyo Ikwati lya chihuminano lya Yaahwe Leza wenu lilibwezelwe u bapaizhi ba Levi, mukamuhwe mu masena enu u kulichilila munshi. 4Pele kulyeelele kukabe mushinzo ulampa kilomita yomwi (1) akati kenu yiikwati, kwaamba mukaizhibe inzhila yakutola, nkaambo tamunaitile kunzhila yezhi.”
5Joshuwa wakaambila bantu ati, “Amulisalazhe nubeni ukaambo kakuti uzona Yaahwe ulakachita maleele akati kenu.” 6Joshuwa wakaambila bapaizhi ati, “Amubweze ikwati lya chihuminano u kuya kumbele lya bantu.” Ubobo bakalibweza ikwati lya chihuminano u kuya kumbele lya bantu.
7Yaahwe wakaambila Joshuwa ati, “Ubwasunu ndakanka ukusumpula mu menso a Baizilaili, kwaamba bazhibe ati mbubona mbundakaakuli u Mozesi, mbubona ndaakulyaaze. 8Iinzho uwe, balailile bapaizhi bati babweza ikwati lya chihuminano ati, ‘Mwashika bulyo kumabali a mulonga wa Joodani, mukanjile u kuzhima mu meenzhi.’”
9Joshuwa wakaambila bantu ba Izilaili ati, “Amuswene kufhwaafhwi kwaamba muteelele mazwi a Yaahwe Leza wenu.” 10Ngoona Joshuwa wakaamba ati, “Mbubolya mbumuti muzhibe kwaamba Leza Mumi uli akati kenu, ukuti nchobeni, ulabatanda mu menso enu Bakenani, Bahiti, Bahivi, Bapelizi, Bagiligashi, Baamoli u Bajebusi. 11Amubone, ikwati lya chihuminano lya Mwami wanshi yoonse, lilaita kumbele lyenu kuya ku Mulonga wa Joodani. 12Ubobo amusale balombwana ikumi u balombwana bobile (12) kuhwa ku mishobo ya Izilaili, ku mushobo womwi, mulombwana womwi. 13Lelyo shituta sha maulu a bapaizhi babwezele Ikwati lya chihuminano cha Yaahwe wanshi yoonse, shakalyata mu meenzhi a Joodani, meenzhi a Joodani alakakosoka u kuleka kukunka, awo meenzhi azo akunka kuhwa mwizeulu alakaleka kukunka u kulundana bu mulwi.” 14Ubobo bantu nibakahwa mu matente abo kwaamba balanduke mulonga wa Joodani, antoomwi u bapaizhi bakaakuzemwine ikwati lya chihuminano kumbele lya bantu. 15Mbubakashikila bulyo babo bakaakuzemwine ikwati ku mulonga wa Joodani, shituta sha bapaizhi bakaakuzemwine ikwati nishakalyata mu meenzhi (ukuti mulonga wa Joodani ulapaya lyoonse chiindi cha kutebula), 16meenzhi akunka kuhwila injezhi akazhimuka mu mulwi mulamfhusha chini-chini, ku Adamu, munzhi uli kufhwaafhwi u Zaletani, kwakabula meenzhi akunka kuselumukila mwibanda kuya ku Lwaatele lwa Alaba u Lwaatele lwa Mwino. Ubobo bantu bakalanduka ku busena bulangene u Jeliko. 17Iinzho bapaizhi bakaakuzemwine ikwati lya chihuminano lya Yaahwe bakazhima anshi inzumu akati-kati ka Joodani, ngoona boonse ba Izilaili bakaita anshi inzumu kushikila chishi choonse chakamaninina kulanduka mulonga wa Joodani.
Bible Society of Zambia