Joshuwa 2
2
Joshuwa Watuma Bashikweena Munzhi Mukando wa Jeliko
1 #
Bahi 11:31; Jem 2:25 Iinzho Joshuwa mwanakwe Nuni wakatuma bantu bobile kuhwa ku Shitimu kwaamba bakeene chakuzubaila, waamba ati, “Kamuya, mukeebone inshi mbwiibele, kwaambisha Jeliko.” Ubobo bakaya kubaalila muŋanda ya mukaintu muhuule wakaakutewa ati Lahabu, koko nkubakoona. 2Pele mwami wa Jeliko wakashimwinwa ati, “Bona, balombwana ba Izilaili bashika kono mashiku aza a bwasunu kwaamba beene inshi.” 3Ngoona mwami wa Jeliko wakatuma kwa Lahabu ati, “Bazubulule balombwana babo babaalila muŋanda yako, nkaambo beza kweena inshi yoonse.”
4Pele mukaintu kabatolele u kubaseseka balombwana baba bobile. Amane wakabaingula ati, “Meni-meni, balombwana bakeza kwangu, pele nchitezhi nkubakahwa. 5Pele lelyo mulyango wa munzhi mukando niwakaakuzanda kuyalwa nikwakashiya, baba balombwana bakahwa. Nshikwizhi nkubakaya balombwana baba. Amubachilile chakufhwambaana, kwaamba mubeenzhe.” 6Pele walo kabalizikile a lululi u kubaseseka mu tuhuna twa fulakisi#2:6 fulakisi kaka nkasamu kasebesezhewa ukoya butonge. ntwakaakubikile kabotu-kabotu a lululi. 7Ubobo balombwana baba bakabalya intende-intende kunzhila ya ku Joodani kushikila kumbali ku mulonga. 8Balombwana baba kabatana koona, Lahabu wakaliza alululi ngubakaakubele, 9wabaambila ati, “Ndizhi ati Yaahwe wamupa inshi yezhi ulimwi bukandu bwakutiya umwe bwawila alyuuswe, myonzo ya bantu boonse banshi yezhi yalengauka kumbele lyenu. 10#Kul 14:21; Mye 21:21-35Nkaambo twakateelela mbuli Yaahwe mbwaakaazumya meenzhi a Lwaatele lwa Mabu lelyo nimwakahwa mu Ijipiti u nchimwakachita ku bami bobile ba Baamoli, Sihoni u Ogi, babo bakaakuli ku mutala wa Joodani, babo mbumwakazonauna. 11Nitwakaateelela azo, myonzo yesu yakalengauka, kwakabula naba womwi wakaakuchikwete moza wa bumi, twakatiya, nkaambo Yaahwe Leza wenu, ngu Leza wa mwizeulu yiinshi yoonse. 12Iinzho nkukuti, amupinge ku bushu bwa Yaahwe kwaamba, mbubona mbundamuchitila luse luteeli, amwe mbubona mulakanchitila luse luteeli antoomwi u baŋanda yaka taata u kumpa chitondezho chishinizhe, 13kwaamba mulakamuhuna taata, baama, bakwesu balombwana, bakwesu bashimbi u babo boonse banamuzhaabo, mukatuhune kuhwa ku lufhu.”
14Baba balombwana bakamwaambila ati, “Bumi bwesu u bwako kushikila ku lufhu! Kuti utaazubululi aza makani esu, nkukuti Yaahwe atupa inshi, tulakakutondezha luse luteeli cha lushinizho.” 15Ngoona wakabaselusha u lukalo kwiitila ampulungwilo, nkaambo iŋanda yakwe keezakilwe mu bwaanda bwa munzhi mukando, ubobo kakala mu bwaanda. 16Mukaintu wakabaambila ati, “Kamuya mu malundu, bulyo bamukapula balamweenzha, muzube kwa mazuba otatwe kwaamba bamukapula bapiluke. Mwamana muye mu lweendo lwenu.”
17Balombwana baba bakamwaambila ati, “Tulabula mulandu a kulumbila kwako koku nkuwapa ati aswe tupinge. 18Bona, twakeenjila inshi, ukaange katambo kasubila ku mpulungwilo yezhi njiwatuselushizha anshi u kubunganya muŋanda yako uso u banoko, banyoko balombwana ubabo boonse baŋanda yaka uso. 19Pele kuti umwi akati kenu akahwe amulyango waŋanda u kuya ansengwe, bulowa bwakwe bulakaba amutwi wakwe mwini, nkukuti uswe tulakabula mulandu. Pele kuti itashi lyauma womwi ulyaaze mukati muŋanda yezho, bulowa bwakwe bulaba amitwi yesu. 20Nikuba bobo, kuti na ukaambile uli woonse nchitwaakuchita, ati tatukazulwa ukuti tulakaanguluka kuhwa kukupinga koko nkuwapa kwaamba tulumbile.” 21Mukaintu wakaamba ati, “Mbubona mbumwaamba akube bobo.” Amane wakabaleka baya. Ubobo wakaanga katambo ka butonge ampulungwilo.
22Bakazhimuka baya mu malundu muba kakala ukwa mazuba otatwe (3) kwaamba babo bakaakubalya intende-intende bapiluke, bakabakapula chini-chini inzhila yoonse, pele baina ukabayana. 23Ngoonaawo, baba balombwana bobile (2) bakapiluka. Bakaseluka kuhwa mu malundu, bakaitilila baya nkwaabele Joshuwa mwanakwe Nuni, bakamushimwina shakachitika nkubabele. 24Bakamwaambila Joshuwa ati, “Meni-meni Yaahwe wapa inshi yoonse mu matashi esu. Ulimwi myonzo yabo boonse bakala munshi yalengauka ukaambo kesu.”
Bible Society of Zambia