Hosiya 2
2
1“Baambile banyoko balombwana ati, ‘Muli bantu bangu,’ uku banyoko bakaintu ati, ‘Mwayana inkumbu.’”
Kutashomeka kwaka Gomeli u Kutashomeka kwaka Izilaili
2“Lyeenzelele kwa banoko, likombelezhe,
nkaambo tali mwinangu,
ame nshili mulumyaakwe,
kwaamba akushe buhuule kuhwa kubushu bwakwe
u bushimamambe bwakwe kuhwa akati kankolo shakwe;
3ubulyo nkandamusamununa u kumushiya chintanda
mbubona mbwaakaakubele mu buzuba mbwaakazhalwa.
Ndakamupanga kuba ukoya mwisokwe,
ulimwi ndakamupanga kuba ukoya inshi yakazuminina,
ndakamuyazha yiinyotwa.
4Abo banakwe nshikabafhwili inkumbu,
nkaambo mbana bamubuhuule.
5Nkaambo nokwabo wakachita buhuule;
wezo wakabemita wakachita chintu chuusha insoni.
Nkaambo waamba ati, ‘Ndaakuchilila ba shamwali bangu,
babo bampa chakulya changu u meenzhi angu,
wuulu wangu u milembo ya butonge yangu, mafhuta angu u shakunwa shangu.’
6Ubobo ndakashinka masanzhi munzhila yakwe,
ndakazaka bwaanda bwakumuzhinguluka,
kwaamba atashiyani inzhila shakwe.
7Ulakabatandila banakufhunwa bakwe
pele takabeenzha,
ulakabakapula
pele takabayani.
Lelyo ulakaamba ati,
‘Nkandabweela bulyo ku mulumyaangu wakutaanguna,
nkaambo kachimbotelele lelyo kubaala ninzho.’
8Katezhi ati
Ume ndime indakamupa
maila, waini mupiya u mafhuta aliswekela,
ndime indakamuwezela siluva u goludi munji-munji,
wezo ngubakapanzha Baala.
9“Ubobo ndakaabweza
maila angu mu chiindi chisalilwe
u waini mupiya mu chiindi cheelele.
Ndakamunanga wuulu wangu u milembo ya butonge yangu,
yezho yakaakuhumbile chintanda chakwe.
10Iinzho ndakaazubulula mamfhunze akwe
mu menso a banakufhunwa bakwe,
kulakabula uti akamuhune kuhwa mwitashi lyangu.
11Ndashikusha shesho shimupa kutangala,
makubi, myezhi mipiya yakwe, Insabata shakwe,
azo oonse makubi masale.
12Ndaazonauna masamu a masaansa akwe u masamu a mukuzu akwe
azo ngakaamba ati,
bobu mbu bulumbu bwangu,
ubwampa banakufhunwa bangu.
Ndashipanga kuba musanza,
banyama ba mu mwisokwe bakwete bumi balakashilya.
13Ndamuswaya u kumusubula u kaambo ka mazuba ekubi lyaba Baala
lelyo nakaatenta shipaizho kuli mbabo
u kusakila inwenwe u tulungu tubeka-beka twakwe,
u kuchilila banakufhunwa bakwe
u kunduba Ume,” mbwaamba Yaahwe.
Inkumbu sha Yaahwe ku bantu bakwe
14“Ubobo, bona, ndamoongelezha
u kumuleta mwisokwe
u kumwaambila chalufhuno.
15Koko, ndakamubweezhezha myuunda ya masaansa yakwe
u kupa Ikonka lya Akoli kuba mulyango wa bulangizhi.
Koko, ulakaingula mbubona mbuli mu mazuba a bukubushi bwakwe,
mbubona mbuli chiindi lelyo nakahwa munshi ya Ijipiti.
#
Jos 7:24-26
16“Mu buzuba bobo,” mbwaamba Yaahwe,
“Mulakaŋompolola ati, ‘Mulumyaangu,’
mulakaleka kwinta ati, ‘Baala wangu.’
17Nkaambo ndakaakusha oonse mazhina a Babaala kuhwa ku mulomo wakwe,
ubobo mazhina abo taakazhibalukwa linji.
18Mu buzuba bobo, ndakabakosolela chihuminano
u banyama ba mwisokwe bakwete bumi, bazuni ba mwizeulu
u shintu shikalaba anshi.
Ndakakombaula buta, icheba,
ndakamanya inkondo kuhwa anshi,
ndakamupa kulyookezha chakuliiba.
19Ndakamutanga mulongo wa shikwense.
Ndakamutanga mulongo mu bululami u mu bubeteshi bubotu,
mu luse luteeli u munkumbu.
20Ndakamutanga mulongo mu bushomeshi.
Ubobo mulakamuzhiba Yaahwe.
21“Mu buzuba bobo ndakaingula,” mbwaamba Yaahwe,
“Ndakaingula mazeulu,
awo alakaingula inshi.
22Ayo inshi ilakaingula maila, waini mupiya u mafhuta aliswekela,
asho shilakaingula Jizilaeli.
23Ndakamushanga ndimwini munshi.
Ndakamufhwila inkumbu wezo ngundaketa ati Lo Luhama,
Ndakaambila Lo Ami (tamuli bantu bangu), ‘Ami (muli bantu bangu),’
aze ulakaingula ati, ‘Uli Leza wangu.’”
Bible Society of Zambia