2 Batesalonika 3
3
Kulomba ku Kombelwa
1Inzho ku mamanino bakwesu amutukombele kwaamba mazwi a Mwami afwambaane kuzuwa ulimwi bantu baatambule ca bulemu umbona mbumwakaatambula amwe. 2Ulimwi mukombe kwaamba Leza atuhune kuhwa ku bantu babiyabi bataluleme, nkaambo takuli kwaamba boonse balooshoma Mulumbe.
3Pele Mwami ulashomeka, ulamupa insana ulimwi ulamukwabilila kuhwa ku mubiyabi. 4Tulikwete lushomo mu Mwami lwakuti mulacita, ulimwi mulakashicita shoonse nshitumulailila.
5Inzho twalomba kwaamba Mwami endelezhe myonzo yenu kwaamba muluzhibe lufwuno lwa Leza u bushicamba mbwaapa Kilisito.
Kucenjezha Bakata
6Inzho bakwesu twamulailila mwizhina lya Mwami wesu Jeso Kilisito kwaamba mubatantamuke boonse bashomi bazanda kupona bumi bwa bukata u bwakutacilila malailile ngutwakabapa. 7Nkaambo umwe lwenu nubeni mulizhi mulyeelele kutwiiya mbutwakaakucita nitwakaakuli amwe. Katutali bakata pe. 8Katutatambuli shintu nshitwatakalipilila. Pele twakakuli bazumu ku sebeza milimo muunza u mashiku kwaamba tutamuminya mukuli. 9Twakacita bobo kwaamba tube citondezho kuli umwe ncimweelele kucilila, nikuba kuti twakaakukwete ceelelo cakumulailila ati mutuyohwe. 10Nitwakaakuli amwe, twakaakumulailila ati, “Wezo ukaka kusebeza, teelele kulya.”
11Twamba bobo nkaambo twakateelela ati akati kenu kuli bamwi bakata, bamulinga nkani baungunika bulyo mumpindu shabantu. 12Mwizhina lya Mwami Jeso Kilisito ndamulomba kwaamba ati bantu bali bobo, mubalailile kusebeza milimo kwaamba baliyanine lwabo beni cakulya.
13Pele umwe nubakwesu mutakatali kucita shibotu. 14Na kuti kuli umwi ukaka kuteelela makani ngutwaamba mu luŋwalu lolu, amumutantamuke wezo muntu, mutasangana aze linji kwaamba ati ause insoni. 15Mutamuciti ukoya shinkondo nokwenu, pele nomucenjezhe mbuli mweenzhinokwenu.
Mazwi a Mamanino
16Inzho Mwami wa luumuno amupe luumuno lyoonse u munzhila shoonse. Mwami abe amwe noonse. 17Ume ndimwini ndi Paulu ndalemba mazwi aza akumwaanzha. Ceci ncitondezho ca mumaŋwalu angu oonse nkaambo mbwinemba bolya. 18Inzho luse lwa Mwami wesu Jeso Kilisito alube amwe noonse.
Currently Selected:
2 Batesalonika 3: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.