Nùb róòm 7
7
Nɨ́m nɨ ɓe ɓíì ókcɨ̀wá
1Mwin yàá bɨ, mɨ lə́mne nyí ɗəəŋcií nɨ́m mɨ ɓa nyí tànànɨ rè, ɓetí nyí ɗəəŋtɨ́ ɓíì. Ɓíì ŋgáŋɗóo nɨ nɨ̀vɨ́tè ya ɓwâ nò kɨ́ duye jáŋ ndɨ́ á. 2Nɨ́m péyè hȩ nɨ̀gwi gùmní u̧, ɓwâ ŋgwáá noò duye jáŋ ndɨ́, ɓíì gùmní á ŋgə́ bɨ̀rékɨ́nɨ dúú gùmní no, ɨ́dù ɓwâ ŋgwáá no kɨ́ kúré, ɓíì kɨ́ nɨ ŋgə́ yá ŋgáŋcɨ̀ nɨ ɗàà. 3Ŋgwáá noò ɨ́ dùyè nɨ́ jáŋ, ŋgə́ ɨ́ ɓùndôŋ ŋgwáá ji, kùb ɓé bɨ́ kí ɓè mààŋ á. Ɨ́dù, ŋgwáá noò ɨ́ kû nɨ́, ɓíì nɨ ŋgə́ yá ŋgáŋcɨ̀ nɨ ɗàà, á sàmàìn ŋgə́ ɓundóŋ ŋgwáá jií, kí nɨ́ mààŋ sé cɨ̀. 4U̧ á ɓwê nyí du ru, mwin yàá bɨ moò. Kɨ́ péín ɓíhì, nyí á nɨ́ kúri, àm ókndóŋ ɓe nò jií, ɓe ɨ́r ju ɓaín nyí du ɓe Krístù cwá ŋgə́ ya kúré noò. Nyí ókcɨ nɨ ɗàrò ɓe nò Mèín ya səəmcuhó̧ cwéé, àm nɨ́m a ə́nnà Mèín ə́rɨ́b nyɔ̧né á. 5Ɓwâ nɨ́m ya duye dùnɨ ju hȩ mɨ̀lə́m nɨ́m nɨ̀mibi ɗúré, mɨ̀lə́m ɓáŋhɨ́b ɓíì yi du ndɨ̀ŋnɨ nɨ́m dù ɓe kíí yaá nɨ́m gèrénɨ cwéé. 6Ɨ́dù ɗàrò ɓíì nɨ nɨ́m ya ŋgáŋcɨ̀nɨ ɗàà, ɓetí cwá nɨ́m kúré kwíikíí nɨ́m tɨ bɨrékɨ́kom nɨ́m nìrì. Sàmàìn nɨ́m ə́nnacɨ Mèín hȩ nɨ́m éíkom tíí ɓwâ ɓíì tɨ ŋgáŋkom nɨ́m ya kwe ɗàà. Ɗàrò ŋgáár ə́ré nɨ́mè á cɨ̀ nɨ heé, Nyéhè Sarîn ɨ́ duce nɨ́ nɨ́m kɨ́ɨ́nɨ ru.
Ɓíì á gèrénɨ kùb cumí
7Nɨ́m ma ɓa tànɨ ɓíì du nɨ nɨ́m ɓáŋhîn á hàye? Ɗàɓàwá! Ɨ́dù ɓíì ndɨŋtɨ́ mɨ ɗə̀ŋhɨ̀ nɨ́m kùb du ɓénɨ cum. Ɓetí ɓíì tɨ dùyè «Wu wu nɨ́ɨ́b kùbè súnɨ̀r» na tàwá, mɨ yè mɨ́ ɗə̀ə̀ŋwá ní ɨ́ du sunɨ̀b. 8Cum yi kwahó̧tɨ́ nɨ́ mvókín ɓíì Mèèín ya, ŋgə́ ɨ́ kɨ́klê mɨ sunɨ̀b ɓáŋhɨ́b njɔ̧̀ɔ̧, ɓetí ɓíì ɨ́ dù nɨ́ ɗàà, cum nɨ ɓe nyòm kù ɗàà. 9Ɓwâ ɓíì ya duye ɗàwáá, mɨ yaá jáŋ. Ɨ́dù ɓwâ ɓíì féínndé, cum ɨ́ kwà nyòme. 10Mɨ á cɨ̀ mɨ hȩ mɨ du kúri. Ɓíì tɨ du gènɨ kùb jɨ̀r mèè noò, kɨ́ moò geréé nɨ́ mɨ jɨ̀r cwéé no. 11Ɓetí cum tɨ kwaá mvókín, ŋgə́ ɨ́ â ɓíì dù nɨ́m ŋgə́ mbáŋhɨ mɨ ɓe kíí, gèrénɨ mɨ jɨ̀r cwéé no.
12Hȩ dùnɨ u̧nèé, ɓíì Mòyíìs, Mèín ya nawo ru. Ɓíì Mèèín fó̧ce nɨ́ Mèín nɨ̀mɨ́rí ɓɔ̧ɔ̧ á; ɓíì kɨ́ á hàrák, á cè mîn. 13Nɨ́m nyɔ̧ɔ̧́ yi settɨ́ nɨ́m yi ɓa mɨ kwíìniì à? Ɗàɓàwá! Cum yi ɨ́ ndɨŋ nɨ́ nɨ́m kɨ́ ru. Ŋgə́ yi túumɓatɨ́ ɨnayâna ní cum á. Ŋgə́ yi áá nɨ́m du nyɔ̧né kwíìnɨ mɨ ɓe kí. Ɓíì ɨ́ ndɨŋgɨ nɨ́ kùb ɗə̀ŋhɨ̀ ɨnayâna cum duɓa nɨ nɨ́m ɓáŋhîn á ru.
Cum á ŋgáŋnɨ nɨ̀vɨ́tè ya
14Nɨ́m ɗəəŋtɨ́ Mèín yi nawo ɓíì ru. Ɨ́dù kɨ́ moò, njɔ̧̀ moò á nɨ́ gó̧o̧, mɨ cè mɨ́ mbɔ́ɔ́ cumí á. 15Mɨ ɗə̀ə̀ŋhó̧ɓàwá nɨ́m mɨ du ndɨ̀ŋniì, ɓetí mɨ mɨ ndɨ̀ŋnɨ nɨ́m mɨ ɗúré ɗàà, kɨ́ mɨ du jìniì á mɨ du mɨ́ ndɨ̀ŋnɨ ru. 16Hȩ mɨ ɗə̀ə̀ŋnɨ mɨ á mɨ́ ndɨ̀ŋnɨ nɨ́m mɨ du jìniì, mɨ ɗəəŋgií ɨnayâna ɓíì nɨ nɨ́m nyɔ̧ɔ̧́ á. 17Njɔ̧̀ cumí mɨ du ɓe kí rè ɨ́ du mɨ njóònɨ mɨ ndɨ̀ŋ u̧ ru, nɨ mɨ nɨ̀mɨ́r sé. 18Ɓetí mɨ ɗəəŋtɨ́ mɨ mɨ ɓe mɨ̀lə́m ndɨ̧̀ɨ̧́ nyɔ̧né ɗàà, hȩ njɔ̧̀ moò du nɨ́ gó̧ne. Mɨ á ɗúɓàhánɨ ndɨ̀ŋnɨ nyɔ̧ɔ̧́, ɨ́dù a yɔ̂ nɨ́ mɨ. 19Mɨ mɨ ndɨ̀ŋnɨ nyɔ̧ɔ̧́ mɨ du ɗúniì ɗàà, ɨ́dù ɓáŋhîn mɨ du ɗúwa ndɨ̀ŋniì á mɨ du mɨ́ ndɨ̀ŋnɨ ru. 20Hȩ mɨ dùnɨ ndɨ̀ŋnɨ nɨ́m mɨ du ɗúwa ndɨ̀ŋniì kɨ́, nɨ mɨ sé ɨ́ du ndɨ̀ŋnɨ, cum ɨ́ du nɨ́ mɨ njóònɨ ru.
21Mɨ pə́gií nɨ́m du mɨ jáàbniì. Mɨ á ɓà há ɓe mɨ̀lə́m ndɨ̧̀ɨ̧́ nyɔ̧né, ɨ́dù nɨ́m mɨ du ndɨ̀ŋniì á há nɨ kɨ́ ɓáŋhîn. 22Mo sumí mɨ á óknɨ mɨ̀tù ɓe ɓíì Mèèín. 23Ɨ́dù mɨ péé mɨ́ ɓíì kù á nɨ́ mo njɔ̧̀ɔ̧ ku, lɨ̀ŋnɨ ɓe kɨ́ njɔ̧̀ moò du ɗúnɨ kɨ́. Ɓíì kɨ́ á nɨ́ ndɨ̀ŋnɨ mɨ dù nì̧ì̧ ɓíì cumí du mó njɔ̧̀ne no. 24Mɨ á ɓà mwàm kɨ́ mwàm. Na ɨ́ ɓaye mɨ ɓàndɨ̀kɨ́nànɨ njɔ̧̀ du mɨ gèrénɨ cwéé rè? 25Nɨ́m sáktɨ̀ná Mèín ɓe ɨ́r Yésù Krístù nò du Kéké nɨ́mè.
Mɨ pə́gií mɨ́ ɨnayâna mɨ̀lə́m móò no, mɨ á mɨ́ jə̀ŋnɨ ɓíì Mèèín, ɨ́dù nɨ́ɨ́b ndɨ̧ɨ̧́ moò no, mɨ jəŋce mɨ́ ɓíì cumí á.
© 2007 Alliance Biblique du Cameroun, B.P. 1133, Cameroon