Nùb róòm 6
6
Ndɨ̀ŋnyàáŋ Mèèín á áhó̧kɨ́nɨ kùb nì̧ì̧ cumí no
1Kí ma ta nɨ́m mèrékɨ́ nɨ ju cumí no àm ndɨ̀ŋnyàáŋ Mèèín a dùnà nɨ́m ví̧ne hàye? 2Ɗàɓàwá! Nɨ́m du nɨ hȩ fɨ́nɨ́b cum ducɨ nɨ́ kɨ́ɨ́nɨ ɗàwáá á, i̧ á cè nɨ́m ɓa mèrékɨ́nɨ ju cumí no? 3Nyí ɗə̀ə̀ŋwá ɨnayâna nɨ́m lâs nùb ya kɔk kɔ ə́mní àm nɨ́m a dù ɓaín ɓe Yésù Krístù rè, nɨ́m á ɓwê ɓaín ɓe ŋgə́ cwá ŋgə́ ya kúré no à? 4Ɓe kɔ ə́mní nɨ́m ya kɔk kɨ́, cwá ŋgéé kɨ́ no kùb ya vɨ́rɨɓáatɨ́ nɨ́me ŋgáb, àm nɨ́m a kwàɓwê mè heé hȩ Krístù, Mèín nò du Táà ya səəmcuhó̧ cwéé ɓe nyòm mgbíhɨ́rí noò rɨ.
5Hȩ nɨ́m ya duɓa ɓaín ɓe ŋgə́ cwá ŋgə́ ya kúré no rɨ, u̧ á nɨ́m ɓa dùɓwênɨ ɓaín ɓe ŋgə́ ɓwâ Mèín ɓa nɨ́m sə̀ə̀mcùhó̧ɓwênɨ cwéé hȩ ŋgə́ rè. 6Nɨ́m ɗə̀ə̀ŋná ɓà ɨnayâna ɗɨ́m juu nɨ́m yi dunáye ɓe kí tíí yi kúɓáatɨ́ ɓe Yésù bɨ̧̀ɨ̧́ àm kwíikɨ́ ɗɨ́m cumí nɨ́m ya duná ɓe kíí, nɨ́m a dù nɨ́ mbɔ́ɔ́ cumí dùnácɨ̀r. 7Ɓetí nò ducɨ nɨ́ kúrií ɓáíhó̧tɨ́ nɨ́ cumí. 8Hȩ nɨ́m kúɓáhe ɓe Krístùù, nɨ́m ɗəəŋtɨ́ ɨnayâna nɨ́me ŋgáb ɓa dùɓáànɨ ɓe mè á. 9Nɨ́m ɗəəŋtɨ́ ɨnayâna yànɨ ɓwâ Mèín ya səəmcuhó̧ Krístù cwéé, cwé nɨ́ ɓe nyòme ŋgə́ yá ɗàcɨ̀wá, ŋgə́ cɨ̀ nɨ nò ɓa kúniì sé. 10Cwá ŋgə́ kú kɨ́ no, ŋgə́ kwíikíí nyòm cum yi du ŋgáŋnɨ nɨ̀vɨ́tè ya ɓe kíí kɨ́ gwìí mwi̧í̧. Ɨ́dù ɗàrò ŋgə́ á jáŋ, ŋgə́ dunace Mèín á. 11Nyí ɓwê, ɗəəŋnáam ɨnayâna, péín cumí, nyí á cɨ̀ nɨ kúri. Ɨ́dù, ɓe ju ɓaín nyí du ɓe Yésù Krístùù, nyí á jáŋ, nyí dunace nɨ́ Mèín á.
12Nɨ ɗúwa cum ŋgáŋkwà síí nyínè du nɨ́m kú kú̧ne kɨ́ ya, àm ndɨŋ nyí jə̀ŋ nɨ́m síí kɨ́ du ɗúniì. 13Nɨ ɗúwa nyí mbɨ́kkwà mɨ̀yɨ́ kù nyínè sóò dù nɨ́m nyí ndɨŋ ɓáŋhîn ɓe kíí, àm ə́nna cumí. Nànábɨ̂ŋ Mèín síí nyínè, hȩ nùb səəmcuhó̧ cwéé, nyí a lèèrê síí ə́r Mèèín no, dùnɨ hȩ nɨ́m kùb éí ə́r ɗɨ́ɗɨ̧́ ɓe kíí. 14Nɨ ɗúwa cum ŋgáŋkwà nyí ya. Ɓetí ɓíì nɨ nyí kɨ́kcɨ̀ nɨ ɗàà, ndɨ̀ŋnyàáŋ Mèèín ɨ́ ducɨ nɨ́ nyí kɨ́ɨ́nɨ ru.
Nɨ́m ducɨ nɨ nùb ndɨŋ nɨ́m du ɗɨ́ɗɨ̧́ɨ̧́ á
15Kí ta nɨ́m ɓa nɨ còmnɨ àm ɓíì du nɨ́ nɨ́m kɨ́kcɨ̀ nɨ ɗàà, ndɨ̀ŋnyàáŋ Mèèín ɨ́ ducɨ nɨ́ nɨ́m kɨ́knɨ ru rè á hàye? Ɗàɓàwá! 16Nyí ɗəəŋɓatɨ́ mîn ɨnayâna, ɓwâ nyí yaré ə́nnànɨ nò kù àm nyí jəŋ ŋgéé rɨ, nyí á sèìnɨ mbɔ́klɨ́b nò nyí du jə̀ŋnɨ kíì: kí ta duú cum nɨ́m du kùb gèrénɨ cwéé sé, a cè jɨ̧ wu jəŋ Mèín nò du ndɨ̀ŋnɨ nyí sèì nùb ɗɨ́ɗɨ̧́ no tíí. 17Ɨ́dù nɨ́m naá Mèín kùsùk. Ɓetí nyí nùb ya du mbɔ́klɨ́b cumí, nyí á nɨ ɗàrò jə̀ŋɓàcɨ̀nɨ ɓe sum mwi̧ tɔ̀ɔ́ kùb yi na nyínè. 18Mèín áhó̧kíí nyí nì̧ì̧ cumí no, nyí lə́ɓagií ndɨ̧̀ɨ̧́ nɨ́m ɗɨ́ɗɨ̧́ɨ̧́ no. 19Mɨ nyin hȩ nɨ̀vɨ́tɨ̀b lâs nyinlɨ́ŋndé á, ɓe ɨ́r kɨ̀cáàb mbɨ̀m nyí du ɓe kíí. Ɓwâ yi tíí, nyí yi leeréɓatɨ́ síí nyínè ndɨ̧̀ɨ̧́ nɨ́m du hàrák ɗàwáá ɓe ndɨ̧̀ɨ̧́ nɨ́m ɓáŋhɨ́nne no hȩ mbɔ́klɨ́b, àm nyí du ju jɨ́mnîn ɗàwáá. Kí á yi du ndɨ̀ŋnɨ nyí sàkkɨ́ Mèín ndu. Ɗàrò, lèèréná ɓàgɨ̀ síí ndɨ̧̀ɨ̧́ nɨ́m du ɗɨ́ɗɨ̧́ɨ̧́ no, àm nyí a dù nùb ɗɨ́ɗɨ̧́ Mèèín íhín.
20Ɓwâ nyí ya du mbɔ́klɨ́b cumí, àm nyínè yi nɨ́ ɓe àm ndɨ̧̀ɨ̧́ nɨ́m du ɗɨ́ɗɨ̧́ɨ̧́ ɗàà. 21Nɨ́ɨ́b nyí ya ndɨŋkom, du nyí nànɨ sə̀ré ɗàrò rè, ní á nyí kwahó̧ce nó? Nɨ́ɨ́b kɨ́ á bɨ́ kùb gèrénɨ cwéé. 22Ɨ́dù ɗàrò, Mèín áhó̧kíí nɨ́ nyí nì̧ì̧ cumí no, nyí ə́nnacɨ nɨ ŋgə́ á. Nɨ́m nyí du kwàhó̧nɨ noò á ju Mèín ɗúré nyí du dùniì. Cáŋhɨ̀rí, nyí ɓace kwànɨ mè mɨ̀cɨ̧̀ á. 23Ɓetí lɔ̀ɔ́ cum du nàniì du nɨ cwé á, ɨ́dù nyər Mèín du nànɨ kɨ́ samí á mè mɨ̀cɨ̧̀, ɓe ɨ́r ju ɓaín nɨ́m du ɓe Yésù Krístù nò du Kéké nɨ́mè.
© 2007 Alliance Biblique du Cameroun, B.P. 1133, Cameroon