Ə́rɨ́b nùb tómé yi ə́llé 8

1Sôl ɨ́ tà Étèn kúɓa gbák á.

Sôl a nànɨ kpáín nùb ə́mní jábɨ́r

Ye kɨ́ mu̧u̧ á jábɨ́r lə́ mɨ̀kwìn nùb ə́mní Yèrúsàlèèm no. Nùb ə́mní lâs ɨ́ ndììrékî ɗɔ̀ɔ́b Jùdê ɓe Sàmàríì no, jɔ̀sé nùb tómé á yi me. 2Nɨ̀ŋgwáàb yi du nùb mɨ̀yú̧ú̧ ɨ́ vɨ́rè Étèn ɗà ŋgáb ɨ́ kɨ́íɓà cwá no kɨ́ cei.

3Ɨ́dù kɨ́ Sóòl, ŋgə́ yaá nɨ́ mánɨ ɓáàŋkɨ́nɨ mɨ̀kwìn nùb ə́mní; ŋgə́ yaá gɨ̀tèènɨ yúkbìn yúkbìn bììtèèhó̧nɨ nùb ə́mní nɨ̀ŋgwáàb ɓe nɨ̀gub cúk, ŋgə́ a njóoréce ŋgáb dúú nìrì.

Fɨ́lɨ̂b á ɓéènɨ Kìn Nyɔ̧ɔ̧́ ɗɔ̀ɔ́b Sàmàríì no

4Nùb ya ndiiluhe kɨ́ ɨ́ yà yə̀ŋtèènɨ ti kɨ́ no, ŋgáb a ɓéeteece Kìn Nyɔ̧ɔ̧́. 5Fɨ́lɨ̂b ɨ́ gì kwɨ́í mgbíhɨ́rí kù no ɗɔ̀ɔ́b Sàmàríì. Ŋgə́ ɨ́ yà ɓéènànɨ nɨ̀vɨ́tɨ̀b ɨ́r Yésù nò du Mèsíì. 6Nɨ̀vɨ́tɨ̀b lâs yaá yɨrɨ́b óknànɨ Fɨ́lɨ̂b, ɓetí ŋgáb yaákòm óknɨ kùb nyìnnɨ àm nɨ́ɨ́b sɨ̀sɨ̀rí ŋgéé ŋgáb a pə́ce. 7Nɨ̀wàtɨ̀b yaá éíkɨ́nɨ nɨ̀yáàb ví̧i̧ só ɓe kɨ́ɨ́ŋ cúk, kɨ̀ɓók bɨ ɓe nùb ɗə́əm a wáaŋce. 8Á nùb kwɨ́í kɨ́ noò lâs ya duɓa mɨ̀tùú.

9Nɨ̀ŋgwá tɔɔ̀ kù ɨ́r yi du Sìmôŋ yaá kɨ́yàyè kwé ku tíí. Ŋgə́ yaá mwánɨ tɔk, ndɨ̀ŋɓànɨ nɨ́ɨ́b sɨ̀sɨ̀rí cei ɗà nùb Sàmàríì ɨ́ yà gbɨ̀ɨ̀ŋɓànɨ. Ŋgéé sumí, ŋgə́ yi lə́əmkomɓa ní nò kàm àmɨrì á. 10U̧ á cè nùb lâs, mucutɨ́b ɓe kɨ̀jííb cúk yi seikɨ́kom ŋgə́, ŋgáb a tace: «Nɨ̀ŋgwá rè duɓa nɨ mèín kùb du ɓénɨ ‹Nyòm kàm jíri rɨ› á yáà.» 11Ŋgáb ya seikɨ́kom bɨ ŋgə́ u̧ ɓetí ŋgə́ ya yaɓa nɨ ŋgáb túùmnànɨ ə́rɨ́b no tɔɔ̀ kɨ́ kúríí á. 12Ɨ́dù ɓwâ ŋgáb yi ə́mne Kìn Nyɔ̧ɔ̧́ Fɨ́lɨ̂b yi du ɓéènɨ ɓe ɨ́r Ŋgɔ̧́ɔ̧̀ Mèèín, ɓe ɨ́r Yésù Krístùù, nɨ̀ŋgwáàb ɓe nɨ̀gub cúk ɨ́ ə́mnè kùb kɔ̀ɔ̀ vúm kɔ ə́mní. 13Sìmôŋ nɨ̀mɨr yi ə́əmɓwéetɨ́, á kùb kɔhe ŋgə́ kɔ ə́mní; ŋgə́ yaá ɓwâ lâs gín Fɨ́lɨ́ɨ̀b, ŋgə́ ɨ́ yà gbɨ̀ɨ̀ŋɓànɨ ɓwâ ŋgə́ ya pə́kom lìím kàtɨ́b ɓe nɨ́ɨ́b sɨ̀sɨ̀rí Fɨ́lɨ̂b ya ndɨŋkomndé.

14 Nùb tómé yi du Yèrúsàlèèm yi óktɨ́ ɨnayâna nùb Sàmàríì yi ə́əmtɨ́ Kìn yi go yɨ́ Mèèín; á ŋgáb tómsona nùb kɨ́ Píyéèr ɓe Jâŋ. 15Ɓwâ Píyéèr ɓe Jâŋ yi féínso Sàmàrî kwe, ŋgáb ɨ́ yôŋ ɓe ɨ́r nùb ə́mní Sàmàrî kwe, àm nùb kɨ́ a kwà Nyéhè Sarɨ́nne. 16Ɓetí ŋgáb ya kɔkhó̧ɗóoye bɨ kɔ ə́mní ɓe ɨ́r Yésù nò du Kékéé á, Nyéhè Sarîn ya nɨ́ ŋgáb ya sóyèwá. 17Kí á Píyéèr ɓe Jâŋ yi heiwú ŋgáb ŋgáár ŋgwéé, ŋgáb ɨ́ kwàgì Nyéhè Sarîn. 18Ɓwâ Sìmôŋ yi pə́ nùb tómé nànɨ nùb ə́mní Nyéhè Mèín tómworé ɓe hèìwû ŋgáár ŋgwéné, ŋgə́ ɨ́ gò, ŋgə́ ɨ́ ɗû nànɨ Píyéèr ɓe Jâŋ mòné, 19ŋgə́ ɨ́ tà: «Nànáɓwê mɨ nyòm kɨ́ ɗà nùb mɨ heiwú ŋgáár ŋgwéé lâs a kwàɓwê Nyéhè Sarîn.» 20Ɨ́dù Píyéèr ɨ́ tàcùnà ŋgə́ ɨnè: «Hȩ wu lə́mne ɨnayâna kùb á bɨ gwɨ̀ìnɨ nyər Mèèín ɓe mòné rèé, nyíne mwèìn wo kɨ́ cúk, nyí á ndùknɨ kùrúk! 21Nɨ́m kù nɨ wu àm kɨ́ no góòmɓànɨ ɗàà, ɓetí njɔ̧̀ woò á nɨ ɓáŋhîn Mèèín íhín, 22wu ma ɓàndɨ̀ sum mɨ̀lə́m ɓáŋhɨ́nne wó rè kà, ɗà wu a yôŋ Kéké; yè á sàmàìn ŋgə́ tɨ́ína wu mɨ̀lə́m ɓáŋhîn wo kɨ́ kè. 23Ɓetí mɨ péé wu á yúklîn ɓe mɨ̀lə́m sunɨ̀bì, wu cè wú mbɔ́ɔ́ cumí á.» 24Á Sìmôŋ tanagi Píyéèr ɓe Jâŋ ɨnè: «Yée! Nyí nɨ̀miib, yóŋnàná mɨ Kéké, àm nɨ́ɨ́b nyí ta ɗàrɨ́ tɨ̀ féínna nɨ́ me.» 25Ɓwâ nùb tómé bɨrɨ́b lè ya ə́əŋcáŋhȩ mɨ̀námé, ŋgáb ɨ́ ɓéhè Kìn Kékéé á ŋgáb gɨcu Yèrúsàlèm, ŋgáb a ɓéeségece Kìn Nyɔ̧ɔ̧́ kwɨ́ì ví̧i̧ ɗɔ̀ɔ́b Sàmàríì no.

Fɨ́lɨ̂b ɓe nò ə́ré kù yi du nò Ètìyòpíì

26Dùgal Kékéé kù ɨ́ tànà Fɨ́lɨ̂b ɨnè: «Éíwúum, wu a tùsê jɨ̀r du ə́nnɨ Yèrúsàlèm gìnɨ Gàsâ rɨ. Kwɨ́í kù nɨ jɨ̀r kɨ́ no ɗàà.» 27Ɓè mu̧u̧ Fɨ́lɨ̂b ɨ́ ə́llê. Féín jȩ̀ȩ̀ á nɨ̀ŋgwá kù mwȩ́ȩhó̧ no tíí: nɨ̀ŋgwá kɨ́ yɨɨ́m nò kàm ə́ré jíri yi du kɨ́ɨ́nɨ ə́rɨ́b ɓáhèé njɔdì màm ti Ètìyòpíì á; ŋgə́ yi go Yèrúsàlèm Mèín ɗómnɨ á. 28Ŋgə́ yaá du̧ú̧ kúúŋ màtúwà yi tíí ɗə̧́ə̧́ yi ɗamkomndé ya, gɨ̀cùnɨ no kwé, ŋgə́ a faingece káàtà Èsáyà tɨ́kìn Mèèín yi tɨnndé. 29Á Nyéhè Sarîn yi tana Fɨ́lɨ̂b: «Ŋgɨɨsom, wu a ə́ŋhȩ̀ gín màtúwà kíì.» 30Fɨ́lɨ̂b ɨ́ lùkɔ́ɔ̀sò gín màtúwà kíì, ŋgə́ ɨ́ ô nɨ̀ŋgwá rè á fàìnnɨ káàtà Èsáyà tɨ́kìn Mèèín yi tɨin ndè ɓe kúu còóm. Ŋgə́ ɨ́ fɔ̂ ŋgə́ ɨnè: «Wu maá óknɨ njàb nɨ́m wu du fàìnnɨ kɨ́ à?» 31Nɨ̀ŋgwá kɨ́ ɨ́ pìhè ɨnè: «I̧ á mɨ fɨ́tɨce óknɨ njàb kɨ́ ɓè nò kù du nɨ́ mɨ tànànyààŋwáá?» Á ŋgə́ ta Fɨ́lɨ̂b wúwò màtúwà̧à̧ gín níì dùrénɨ yáá. 32Nɨ́m nɨ̀ŋgwá rè yi fainhó̧kom káàtà Mèèín kɨ́ noò á rè:

«Ŋgə́ yaá hȩ ndèɗú kùb du gènɨ ténniì,

hȩ mwin ndèɗúú du nɨ́ ɓɔ̧ noò néín há ɓwâ kùb du ŋgə́ mvɨ̀tí kpànàniì.

Ŋgə́ ya nɨ́ nɨ́m kù nyìnwá,

33kùb yi səəkíí ŋgə́, kùb ɨ́ dù bɨ́ ŋgə́ àm ɗɨ́ɗɨ̧́ ténnàwá.

Na kwá nyin àm nyȩrɨ́b noò

ɓetí kùb ndúktɨkíí mè noò ɗɔ̀bín.»

34Nɨ̀ŋgwá rè ɨ́ fɔ̂ Fɨ́lɨ̂b: «Yée! Tanaye mɨ, tɨ́kìn Mèèín ndè nyinye nɨ ɓe ɨ́r naà, ɓe ɨ́r ŋgə́ nɨ̀mɨrí kèè ɓe ɨ́r nò kù ndóŋ?» 35Á Fɨ́lɨ̂b yi gam nyindí ŋgə́ ɨ́ tànànyàŋhȩ̀ nɨ̀ŋgwá rè Kìn Nyɔ̧ɔ̧́ du ɓe ɨ́r Yésùù, yàwònɨ nɨ́m nò kɨ́ yi fainhó̧kom káàtà Mèèín ndè noò ya. 36Hȩ ŋgáb yi du gɨ̀séniì á ŋgáb féín yɨ́ kù mvúm yi duré, nɨ̀ŋgwá rè ɨ́ tà: «Mvúm á rè, ní ɨ́ dukwacɨ hàrɨ̀nɨ kùb kɔ̀ɔ̀ mɨ kɔ ə́mní?» 37[Fɨ́lɨ̂b ɨ́ tànà ŋgə́ ɨnè: «Duú ɓè wu ə́əmmeɓa Mwin Mèèín ɓe sum wóò lâs, á sàmàìn kùb kɔhɨ wu kɔ ə́mní.» Nɨ̀ŋgwá rè ɨ́ tàcù: «Mɨ ə́əmtɨ́ Yésù Krístù du Mwin Mèèín á.»] 38Á Ŋgə́ ndɨŋ màtúwà ə́ə̀ŋtɨ, ŋgə́ ɓe Fɨ́lɨ̂b ɨ́ sê lénɨ mvúúm. Ɗà Fɨ́lɨ̂b ɨ́ kɔ̀hè ŋgə́ kɔ ə́mní. 39Cùhô̧ ŋgábè mvúmné, Nyéhè Kékéé ɨ́ ákî nɨ́ Fɨ́lɨ̂b. Nɨ̀ŋgwá rè ɨ́ dù nɨ́ ŋgə́ pə́cɨ̀wá, ɨ́dù ŋgə́ ɨ́ éícùréhâ nɨ́ gùrí njɔ̧̀ ɗàá fàb. 40Fɨ́lɨ̂b ɨ́ gì sə̀mcùnɨ kwɨ́í kùb ɓé Àsôt lɨ no, ɗà ŋgə́ ɨ́ yà gɨ̀tèènɨ kwɨ́íbìn kwɨ́íbìn, ààtèèsénɨ Kìn Nyɔ̧ɔ̧́, há̧á̧ hȩ ŋgə́ ya gi féínnɨ Sèsàréè.

Currently Selected:

Ə́rɨ́b nùb tómé yi ə́llé 8: NTV

Highlight

Compare

Copy