Ə́rɨ́b nùb tómé yi ə́llé 20

Gùr Pôl ɓe nùb noò yi gɨ Màsèduwân ɓe Gɨrês

1Ɓwâ jóktɨ́r bɨ kɨ́ ya cɔ̧́ré, á Pôl ya ɓáhe nùb ə́mní, tààmnɨ ŋgáb njɔ̧̀. Ŋgə́ ɨ́ nyìndɨ̀kɨ́sò ŋgáb, ŋgə́ ɨ́ gì nɨ́ Màsèduwân. 2Ŋgə́ ɨ́ téínndôŋ ŋgɨ̀ŋgɨ́ŋ ɗɔ̀ɔ́b kíì ŋgə́ a tasénace nùb ə́mní Kìn Mèèín tààmnɨ ŋgáb njɔ̧̀. Cùr kɨ́ no ŋgə́ ɨ́ gɨ̀ndôŋ Gɨrês. 3Ku á ŋgə́ yi jə́b njumi taarɨ́b. Ŋgə́ ɓànɨ lénɨ kwáìn gìnɨ Sìrî, á ŋgə́ ók ɨnayâna Jwîf bɨ lə́réé ní kúúr ya. Kí á ŋgə́ ɓandɨcu ndóŋcùnɨ péín Màsèduwáàn. 4Nùb ya háaso ŋgéé á rè: Sòpàtêr mwin Pírùs nò Bèréè, Àrìstârk ɓe Sèkùŋdûs yi go Tèsàlònîk lɨ, Gàyûs nò Dêrbə̀, ɨ́ Tìmòtê, Tìcîk ɓe Tɨ̀ròfîm yi go ɗɔ̀ɔ́b Àsíì. 5Nùb kɨ́ ɨ́ yàkɨ́yè bɨ́ gùr tíí gìnɨ nɨ́m móŋnɨ Tɨ̀ròwâs. 6Nɨ́m nɨ̀miib, jùrúb kùb taŋ bɨ̀rê mvùùŋ no ɗàwáá ndóŋye nɨ́ á nɨ́m lə́so kwáìn Fìlîb, nɨ́m ɨ́ jə̂b jȩ̀ȩ̀ jíì ŋgiì, á nɨ́m kwaso ŋgáb Tɨ̀ròwâs, nɨ́me ŋgáb ɨ́ jə́bcè ɓè jíì tɨ́ɓaám.

Ɓànné cáŋhɨ̀rí Pôl ɓain ɓe nùb ə́mní Tɨ̀ròwáàs

7Ye sàmèdî lɨ́tɔ̧ɔ̧́, nɨ́m yaá ɓáhîn tàŋnɨ cɔŋ yɨ́ mwi̧, Pôl a nyinnace nɨ̀vɨ́tɨ̀b. Hȩ ŋgə́ yi du gùrí yȩné, ŋgə́ ɨ́ nyìnɓà nɨ́ há̧á̧ cɨ́m tə̧ə̧́. 8Lúùm nɨ́m yi du nó ɓáhîn dúú còmné no rè, lámbààb yaá no ví̧i̧. 9Dúú bɨrɨ́bí còmné nɨ́m yi du nó rè no, mutí wàánjí kù ɨ́r yi du ƏÈtîk yaá wúndàà du̧ú̧. Hȩ Pôl yi nyinɓacɨ nɨ́ nȩ̀ȩ́ rèé, wum ɨ́ hàìn nɨ́ mutí wàánjí rè. Ŋgə́ ɨ́ mvíìhô̧ lúu, ŋgə́ ɨ́ láàsê gusɨ̀r ɗàá. Kùb gò ŋgə́ bɨ̀cùwúnɨ ɨ́dù ŋgə́ yi kúcií nɨ́. 10Pôl ɨ́ sésò, ŋgə́ ɨ́ tɨ̀ɨ̀msê ŋgə́ ya. Ŋgə́ ɨ́ bɨ̀kùùwû ŋgə́, á ŋgə́ tana ŋgáb: «Nyí nɨ njɔ̧̀ lòm, ŋgə́ á nɨ jáŋ!» 11Á Pôl wúcu. Féíncùwòó ŋgéé lúmnìn kwe, á ŋgə́ kum bɨ̀rê ŋgə́ ɨ́ tàŋ. Ŋgə́ ɨ́ nyìncùkwà nɨ́ nȩ̀ȩ́ há̧á̧ yesə̀rì, á ŋgə́ ə́llégi. 12Kùb ɨ́ gècù mutí wàánjí rè no yó jáŋ, ɗà njɔ̧̀ ɨ́ nyàŋɓà nùb lâs.

Pôl éíndóŋtɨ́ Tɨ̀ròwâs gìnɨ Mìlê

13Nɨ́m ɨ́ gɨ̀kɨ́yàyè tíí lénɨ kwáí yi ɓa nɨ́m gènɨ Àsóòs no. Àsôs ku á kwáí kɨ́ yi ɓagɨ hàìnndóŋnɨ Pôl, ɓetí ŋgə́ nɨ̀mɨr ya ɗúɓa nɨ́ ndóŋnɨ jɨ̀r ɗàá ru. 14Ɓwâ ŋgə́ féínkwaso nɨ́m Àsôs kwe, nɨ́m ɨ́ áréndôŋ ŋgə́ kwáìn ɗà nɨ́m ɨ́ gì Mìtìlên. 15Nɨ́m ɨ́ éícùndôŋ ɓè. Kpíí, nɨ́m ɨ́ pə́ndóŋkɨ́sò Kìyô ŋgáár lame. Ye saín, nɨ́m ɨ́ féìn Sàmôs. Kpíí kɨ́ no cùkwà, á nɨ́m gi féínnɨ Mìlê. 16Kɨ́ Pôl, ŋgə́ yi ta nɨ́ ní á nɨ ndóŋnɨ Èfês ndó̧o̧, ní nɨ lə́sònɨ ku ɗàà nɨ̀vɨ́tɨ̀b tɨ̀ bɨrékɨ́ bɨ́ ní ɗɔ̀ɔ́b Àsíì ku. Ŋgə́ ya ɗúú gɨ̀kɔ́ɔ̀nɨ àm yè á sàmàìn ní féín Yèrúsàlèm ye jùrúb Pàŋtèkóòt kè na á.

Pôl á nyìnnànɨ kɨ̀jííb nùb ə́mní Èféès

17Mìlê ɓè á Pôl tómsona kɨ̀jííb mɨ̀kwìn nùb ə́mní Èféès pénè ŋgáb gòtɨ. 18Ɓwâ nùb kɨ́ ya féínworé, ŋgə́ ɨ́ tànà ŋgáb ɨnè: «Nyí ɗəəŋtɨ́ ɗɨ́m mɨ yi ge ɓe nyínè yànɨ ye mɨ ya féínwo ɗɔ̀ɔ́b Àsíì hò̧neè há̧á̧ gònɨ féínnɨ ye nɨ́me náb ya gɔɔré. 19Dugɨ hȩ mɨ ya pə́ jábɨ́r, mɨ ɨ́ ô yəré, mɨ ɨ́ pə́cè kúúr ɓáŋhîn Jwîf bɨ ya lə́ré mɨ yaà, mɨ ya geséé síí móò ɗàá ɓe éínàá Kékéé. 20Nyí ɗəəŋtɨ́ mɨ yi mɨ́ nyí yòònàwá nɨ́ɨ́b yi fɨ́te nyí kpɔ́kniì. Dùgɨ̀ laŋtɨ̧ɨ̧́, dùgɨ̀ nyínè yúkbìn, mɨ yi tanatɨ́ nyí kìn Yésùù lâs. Mɨ ɨ́ tɔ̀ɔ̀nà nyí nɨ́ɨ́b lâs, kɨ́b kù mèwá. 21Mɨ yi ndɨŋtɨ́ Jwîf bɨ, dùgɨ̀ nùb du Jwîf séé ɓàndɨ̀cùré Mèín no, ŋgáb a ə́mnè Yésù nò du Kéké nɨ́mè. 22Ɗàrò cè, mɨ gɨ Yèrúsàlèm á hȩ Nyéhè Sarîn du mɨ kpɔ́ɔ̀niì, mɨ cè ɗə̀ə̀ŋwá nɨ́m ɓa mɨ ku féínnàniì. 23Nɨ́m mɨ ɗəəŋɗóoré á kɨ́ Nyéhè Sarîn du mɨ tàgèènànɨ ɨnayâna, kwɨ́í mɨ féín nóò lâs, nì̧ì̧ ɓe jábɨ́r á mɨ móŋnɨ na rè. 24Ɨ́dù kɨ́ mè mɨ nɨ̀mɨrí sé, mɨ nóomhó̧ mɨ́ cáàŋnɨ ə́r Yésù nò du Kékéé yi ɗob mé á: kí du ɓéhèé Kìn Nyɔ̧ɔ̧́ du ɓe ɨ́r ndɨ̀ŋnyàáŋ Mèèín ndè á.

25«Mɨ gɨteetɨ́ yɨ́ nyí lâs mɨ a ɓéenace nyí àm Ŋgɔ̧́ɔ̧̀ Mèèín. Ɗàrò nò kù mvókín nyínè no tɨ̀ nɨ mɨ pə́cɨ̀r. 26Àm kɨ́ á mɨ du nyí wáànànɨ mwáín ɨnayâna nò kù mvókín nyínè no ɨ́ lɔ̧́ɓà nɨ́, kí nɨ mɨ góòmcɨ̀wá ru. 27Ɓetí mɨ tanacií nyí ɓwáár Mèèín lâs, mɨ nyí kɨ́ kù yòònàwá. 28Gə́tɨnáam síí nyí nɨ̀mibi, nyí a gómnè íí mɨ̀kwìn nùb ə́mní Nyéhè Sarîn yi naré nyí ŋgáré rè ya. Gə́tɨ̀ná nɨ mɨ̀kwìn nùb ə́mní Mèín ya céín ɓe cwá mwin ŋgə́ nɨ̀mɨrí rè. 29Mɨ ɗəəŋtɨ́ ɓwâ mɨ ɓa gìniì, nùb kù du ndɨ̀ŋnɨ nɨ́m hȩ màŋgùù ɓa lénɨ kpáín nyínè no á, ŋgáb tɨ̀ bɨ kpáín nùb ə́mní gə́tɨ̀r. 30Nùb kù ɓàcéyè mvókín nyínè no ɓa yànɨ kààŋtèènɨ kààŋ á, àm ɗamteeré nùb ə́mní ɓo cùrìì. 31Gə́tɨnáam nyí a ɗə̀ə̀ŋcù ɨnayâna, cɨ́ɨ́m ɓe mvihin cúk, há̧á̧ dáín taarɨ́b, mɨ yaá nyí sóòŋnɨ dùgɨ̀ jábɨ́rí tə̧ə̧́.

32«Ɗàrò mɨ naréé nyí Mèèín ŋgáré, Kìn ndɨ̀ŋnyàáŋ noò tàmɨ̀ nyí njɔ̧̀. Ŋgə́ á ɓe nyòm ŋgə́ fɨ́tɨ nyí fàmnɨ, ŋgə́ a nàɓwê nyí nɨ́ɨ́b lâs ŋgə́ gə́tɨna nùb lâs ók ɓe ŋgéé. 33Mɨ nɨ́m nò kù súnɨ̀wá, dùgɨ̀ gôl, dùgɨ̀ júk. 34Nyí nɨ̀miib nyí ɗəəŋtɨ́ ɨnayâna, mɨ kwànɨ nɨ́m kpɔ́k nɨ́me nùb ya háateekom mé, mɨ yi ndáŋkomɓa ɓe ŋgáár á. 35Nɨ́ɨ́b lâs ya, mɨ yi túumnatɨ́ nyí ɨnayâna á ɗúnɨ wu éíɓà ɓe ŋgáár àm wu a kwà kpɔ́knɨ nùb tiri, wu a lə́əmkɨ́lɨ́ŋce nɨ́m Yésù nɨ̀mɨr nò du Kékéé ya ta ɨnè rɨ: ‹Mɨ̀tù wu du óknɨ ɓwâ wu na nyərí, ndóŋtɨ́ kɨ́ wu ók ɓwâ kùb na wé!› »

36Nyìncáŋhȩ̀ȩ́ u̧nèé, Pôl ɨ́ cáàmsê ɗàá ɓe ŋgáb yóŋnɨ Mèín. 37Ŋgáb lâs, ŋgáb yaá kɨ́ínɨ. Ŋgáb ɨ́ yà kùùtèèkɨ́nɨ Pôl àm ɓe ŋgáb yi ɓa gɔ̀ɔ̀niì. 38Ŋgáb yi ókɓa yəré sumí àm ŋgə́ yi ta vúme ŋgáb tɨ̀ bɨ ɓàìncɨ̀r na rè á. Á ŋgáb háasogi ŋgə́ há̧á̧ sɔ̀ɔ́.

Currently Selected:

Ə́rɨ́b nùb tómé yi ə́llé 20: NTV

Highlight

Compare

Copy