Ə́rɨ́b nùb tómé yi ə́llé 19

Pôl á Èfês, tànɨ Kìn Mèèín

1Jíìb Àpòlôs yi ducéye Kòréèntə̀, á Pôl ya ɔkndóŋ ŋgɨ̀ŋgɨ́ŋ ɗɔ̀ɔ́b kíì péín haré, ŋgə́ ɨ́ gì féínnɨ Èfês. Ŋgə́ ɨ́ kwà nùb ə́mní kù ɓè. 2Á ŋgə́ fɔ́ ŋgáb ɨnè: «Ɓwâ nyí tɨ ə́mne Yésùù, Nyéhè Sarîn tɨ sótɨ́ nyí ya à?» Á ŋgáb yi piina ŋgə́ ɨnè: «Sà̧à̧ Nyéhè Sarîn du kwe, nɨ́m nɨ ókkɨ́ɓàcéyèwá.» 3Á Pôl fɔ́gi ŋgáb ɨnè: «Kɔ ə́mní nyí yi kɔk kɨ́ macè nɨ́ kɨ́ ŋge?» Á ŋgáb pihe ɨnè: «Kɨ́ Jâŋ ya ɓéekom ndɨ́.» 4Kí á Pôl tana ŋgáb ɨnè: «Jâŋ ya kɔɔkom nɨ nùb ya ə́mne cə́ndɨ̀nɨ ɗɨ́m juu ŋgábè á, ŋgə́ a tanace gbàŋ Ísràyéèl ɨnayâna ŋgáb ə́mnɨ̀ nò ɓa gònɨ níì cùrìì, kí ta Yésù na á.» 5Hȩ nùb ə́mní ŋgə́ ya kwa ɓè kɨ́ óknɨ u̧nèé, á ŋgáb ndɨŋ kùb kɔ̀ɔ̀ ŋgáb kɔ ə́mní ɓe ɨ́r Yésù nò du Kékéé. 6Pôl ɨ́ hèìtèèwû ŋgáb ŋgáár ŋgwéé, á Nyéhè Sarîn só ŋgáb ya. Ɗà ŋgáb ɨ́ yàrê nyìntèènɨ nyindɨ́b kùb ya du bɨ́ ókkɨ́yèwáá, ŋgáb ɨ́ yà tàɓwênɨ Kìn Mèèín. 7Vùùm nùb ə́mní yi ɓè kɨ́ lâs yaá sàmàìn ndɨŋ cóóŋ ɨ́ bɨrɨ́b.

8Pôl ɨ́ gì Dúú mɨ̀yú̧ú̧ no wáànàɓànɨ nɨ̀vɨ́tɨ̀b nyindí. Ŋgə́ yaá nyìnlɨ́ŋnɨ àm Ŋgɔ̧́ɔ̧̀ Mèèín ŋgə́ a máce ndɨ̀ŋnɨ nɨ̀vɨ́tɨ̀b ə́mnɨ̀ nɨ́m ní du tànɨ kɨ́. Ŋgə́ yi nyinnatɨ́ nɨ̀vɨ́tɨ̀b u̧ há̧á̧ njumi taarɨ́b, vùù ŋgə́ bɨ̀wá. 9Ɨ́dù nùb kù ɨ́ yà ndɨ̀ŋnɨ mɨ̀sə̧̀ə̧́, ŋgáb ɨ́ mvû ə́ə̀mnɨ. Ŋgáb ɨ́ yà sàkkɨ́nɨ àm jɨ̀r Kékéé kɨ́ nɨ̀vɨ́tɨ̀bì tíí ɓè. Kí á Pôl mbɨ́kkɨ́so nɨ́ ŋgáb, ŋgə́ ɨ́ ɓégè nùb ə́mní rè. Nɨ̀ŋgwá kù ɨ́r yi du Tìrànúùs yaá ɓe dúú sùkúrùù; ye lâs Pôl a yà gìnɨ ɓéènànɨ nɨ̀vɨ́tɨ̀b Kìn Mèèín yó ku. 10Ŋgə́ yi ndɨŋtɨ́ u̧ há̧á̧ dáín bɨrɨ́b; ɗà ɗɔ̀ɔ́b Àsíì no bɨ̂ŋ, Jwîf bɨ ɓe nùb yi du Jwîf séé lâs ɨ́ ô Kìn du ɓe ɨ́r Kékéé.

Nɨ́m ya ndóŋ ɓe munɨ́b Sévàà

11Mèín yaá nànɨ Pôl nyòm ŋgə́ ndɨŋ nɨ́ɨ́b kàtɨ́b sɨ̀sɨ̀rí. 12Hȩ kɨ́ kùb ya genakom nɨ̀yáàb júúb ə́ré ɓe nábkèìn bɨ Pôl nɨ̀mɨr ya di̧nɨré rɨ. U̧ á cè yáàb ŋgábè yi du cɔ̧́nɨ, nyéhɨ̀b ɓáŋhɨ́b ŋgábè sóò a éíkɨ́ce. 13Jwîf bɨ kù yi du yə̀ŋtèènɨ, cuwú cusé, ŋgáb a juteekɨ́ce nɨ̀wàtɨ̀b nɨ̀yábì sóò, ɨ́ kə̀k jùɓwênɨ nyéhɨ̀b ɓáŋhɨ́b ɓe ɨ́r Yésù nò du Kékéé. Ŋgáb yaá tànànɨ nyéhɨ̀b ɓáŋhɨ́b kɨ́ ɨnè: «Ɓe ɨ́r Yésù Pôl du ɓéènɨ kɨ́, mɨ ta nyí éíkɨ́tɨ!» 14(Nùb ya ndɨŋkom u̧ kɨ́ yaá nɨ̀ŋgwáàb tɨ́ɓaám. Ŋgáb lâs yɨɨ́m munɨ́b Jwîf kù yi du nɨ̀gáŋ satɨgàà á. Ɨ́r noò yaá Sévà.) 15Ɨ́dù nyéhè ɓáŋhîn ɨ́ pììnà ŋgáb ɨnè: «Mɨ ɗəəŋɓatɨ́ mɨ́ Yésù, mɨ ókceé àm Póòl sóò. Kɨ́ nyínè, nyí cè na bɨ á?» 16Á nɨ̀ŋgwá yi du nyéhè ɓáŋhîn só rè yi túmne ní ndóóŋ ŋgáb nyòme. Ŋgə́ ɨ́ bì ŋgáb, ŋgə́ ɨ́ tâb ŋgáb jɨ̀ɨ̀m u̧u̧, há̧á̧ ŋgáb ɨ́ lùùhô̧ yó ku síí sam, ɓààì só bɨ̂ŋ. 17Hȩ nùb Èféès, dùgɨ̀ Jwîf bɨ, dùgɨ̀ nùb du Jwîf séé óknɨ àm jɨ̀ɨ̀m kíì, vùù ɨ́ bɨ̀ɓà nɨ́ ŋgáb cei. Á ŋgáb yarégi jə̀ŋnɨ ɨ́r Yésù nò du Kékéé. 18Nɨ̀vɨ́tɨ̀b ví̧i̧ yi ə́mne Yésùù, ɨ́ yà gònɨ tàsénɨ ə́rɨ́b májɨ̀ɨ̀ ŋgáb ya éíkomndé mɨ̀kùnín. 19Nùb kù ví̧i̧ mvókín nùb ya éíkom ə́rɨ́b májɨ̀ɨ̀ kɨ́ ɨ́ gètèèwò káàtààb ŋgábè májɨ̀ɨ̀ tòŋkɨ́nɨ nɨ̀vɨ́tɨ̀b lâs tíí. Vùùm káàtààb kùb ya toŋkɨ́ kɨ́ mwèìn ya kwe yaá sàmàìn féín sure mònéè#19.19 Ɓwâ ya kɨ́, sure mònéè mwi̧ yaá ɗóhîn ɓe gòmé nò ə́ré mvii mwi̧í̧. tɔ́sìn vii bɨrɨ́b ɨ́ cóóŋ. 20U̧ á nùb ók Kìn du ɓe ɨ́r Kékéé yi du víndóŋnɨ tíí tíí ɓe nyòme. Kùb a pə́mece túúm nyòm Kìn kíì.

Nɨ́m yi ndɨŋ Èféès

21Ɓwâ nɨ́ɨ́b kɨ́ yi ndóŋndé, á Pôl ta á ɗúnɨ ní téínndóŋ Màsèduwân ɓe Àkàyî gìnɨ Yèrúsàlèm yáá. Ŋgə́ yaá tànɨ ɨnè: «Ɓwâ mɨ ɓa féínnɨ kwe, á ɗúnɨ mɨ ndóŋɓwê Rôm.» 22Kí á ŋgə́ tóm nùb no ə́ré bɨrɨ́b, Tìmòtê ɓe Èrâstə̀, ŋgáb gɨ̀ Màsèduwân. Ŋgə́ nɨ̀mɨr, ŋgə́ ɨ́ mècê gwínyènɨ ɗɔ̀ɔ́b Àsíì no. 23Ɓwâ ya kɨ́, jóktɨ́r nɨ̀vɨ́tɨ̀b ya kwa ɓe ɨ́r jɨ̀r Kékéé ya nɨ́ jóktɨ́r ŋgóbí nɨ sé. 24Tɨ́wùr kù ɨ́r yi du Dèmètɨ̀rúùs yi du lèèlɨ́ŋnɨ nɨ́ɨ́b nyàŋgáá yaá nyààŋnɨ dúhɨ́b cutɨ́b kù ɓe gôl fɨ́tîn ɓà ɓe kɨ́ Àrtèmíìs#19.24 Àrtèmîs yɨɨ́m màáb fù̧ní nùb ɗɔ̀ɔ́b Àsíì á. ya dukom nó rɨ. Ə́r kɨ́ yaá ŋgáb nàɓànɨ mòné cei. 25Ŋgə́ ɨ́ ɓáhè nùb ɗəŋhȩ ə́r kíì ɓe tɨ́wùr bɨ kù ɓwê á ŋgə́ tana ŋgáb ɨnè: «Tá bɨ, nyí ɗəəŋtɨ́ ɨnayâna ju nyɔ̧ɔ̧́ nɨ́mè go ə́r nɨ́mè rè ya á. 26Ɨ́dù nyí á pénɨ nyí á cè óknɨ nɨ́m nɨ̀ŋgwá Pôl lè du ndɨ̀ŋniì. Ŋgə́ taá ɨnayâna mèín bɨ nɨ̀vɨ́tɨ̀b nyaaŋɓa ɓe ŋgállí nɨ mèín bɨ àmɨrìí sé. Ŋgə́ njóoceé nɨ́ nɨ̀vɨ́tɨ̀b ví̧i̧ ə́mnɨ̀ àm kɨ́, nɨ tàhó̧ɗóòwá nɨ́mè Èfês hò̧, duɓa nɨ ŋgɨ̀ŋgɨ́ŋ ɗɔ̀ɔ́b Àsíì rè bɨ̂ŋ á. 27Á sàmàìn nyindí kɨ́ ndɨŋ ə́r nɨ́mè a gù, ɗà wúúm dúú Àrtèmíìs nò du mèín jírií a cɔ̧̂. Kùb a pə́tə̀ə̀ŋkɨ́cɨ̀ bɨ́ ŋgə́, ŋgə́ nò nùb Àsíì ɓe nùb ɗɔ̀bɨ́nné lâs du jə̀ŋnɨ kɨ́!» 28Hȩ nùb Dèmètɨ̀rúùs ya ɓáawo ɓè kɨ́ óknɨ u̧nèé, ŋgáb ɨ́ ə́tɨ̀wû ɓe njù̧ ŋgáb a kɨ́ŋce ɨnè: «Mèín nɨ́m nùb Èféès á ɓàgɨ̀ Àrtèmîs kɨ́!» 29Kúr bɨ̂ŋ ɨ́ ɓàndɨ̀ɓà jùùr. Nɨ̀vɨ́tɨ̀b ɨ́ ɗàmmgbə́ktɨ̀gè nùb Màsèduwáàn bɨrɨ́b yi háawo Pôl lè laŋtaŋ ɓáhɨ́rí ya. Nùb kɨ́ yɨɨ́m Gàyûs ɓe Àrìstârk á. 30Pôl yaá ɗúnɨ fó̧nɨ mɨ̀kùnín nyìnnɨ nyindí, ɨ́dù nùb ə́mní ɨ́ hàrè bɨ́ ŋgə́. 31Ɓwàjììb no kù yi du nùb ə́ré gómnàà ɗɔ̀ɔ́b Àsíì noò ɨ́ tómsònà ŋgə́ pénè tànànɨ ŋgə́ ɨnayâna, ŋgə́ tɨ̀ fó̧ɓacéye nɨ́ laŋtaŋ ɓáhɨ́rí ku. 32Mvókín kɨ́ no, nùb ya ɓáaso kwe yaá bɨ sumkí̧i̧ vɨ̀ntìì. Nùb kù gbə̀mnɨ kɨ́ rè nùb kù a gbəmndóŋce kɨ́ rè. Nùb kù ví̧i̧ ya bɨ́ ɗə̀ə̀ŋɓàcéyèwá ŋgwé ɓáhɨ́r kíì. 33Nùb kù mɨ̀kwìn kɨ́ noò ɨ́ tànànyàŋhȩ̀ Álèksândɨ̀rə̀ nò Jwîf bɨ ya kɨ́k dù ŋgwé tíí vúmè àm kɨ́. Kí á Álèksândɨ̀rə̀ ya mábna nɨ̀vɨ́tɨ̀b ŋgáár, ŋgə́ ɨ́ ɗû nyìnnɨ gàmnànɨ Jwîf bɨ àm. 34Ɨ́dù ɓwâ ŋgáb yi ɗəŋhȩ ɨnayâna ŋgə́ nɨ Jwîf á na rèé, ŋgáb lâs ŋgáb ɨ́ gbə̀mɓàgɨ̀: «Mèín nɨ́m nùb Èféès kɨ́ á ɓàgɨ̀ Àrtèmîs kɨ́!» Ŋgáb ɨ́ gbə̀mɓàgɨ̀ u̧ nȩ̀ȩ́ ɓà.

35Á kɨ̀jíri ti̧ne àám kwéè yi gurɨgi nɨ̀vɨ́tɨ̀b, ɗà ŋgə́ ɨ́ tànà ŋgáb ɨnè: «Nùb Èféès! Na ma ɨ́ vúubkwacɨ ɨnayâna Èfês ɨ́ du gə́tɨ̀nɨ dúú Àrtèmíìs ru, dùgɨ̀ sɨɨ gusó còóm du ɓɨ̀m ŋgéé kùb du jə̀ŋniì? 36Sàmàìn nò kù sə́ndɨré nɨ ɗàà. Gurɨnáam, nɨ ɗúwa nyí ndɨ̀ŋtèè nɨ́ɨ́b júk jùk júk. 37Nùb nyí gewo hò̧ rè, ŋgáb bɨ nɨ́ɨ́b kù dúú mèèín no hà̧à̧wá, ŋgáb cè bɨ́ nyìnɓáàŋwá ɓe ɨ́r mèín nɨ́mè. 38Óo Dèmètɨ̀rûs ɓe nùb no ə́ré duú ɓe àm ɓe nò kù, ye ŋgù̧ní á ku, tɨ́ŋgù̧ú̧ bɨ á cè ku. Ku á ŋgáb fɨ́tɨ gìnɨ ru. 39Óo nyí dukwatɨ́ ɓe nɨ́m kù nyí ɗú nyìnniì, kùb ɓa nyààŋcɨ̀nɨ kí ɓáhɨ́r jírií no hȩ du ɗúniì á. 40Ɓe nɨ́m ndóŋ mwáín ndè, á sàmàìn kùb á bɨ́ nɨ́m hȩ nùb ŋgób ɓáŋhɨ́bí. Ŋgwé kúúŋ ɓáhɨ́r kàm ndèè nɨ ɗàà, sàmàìn nɨ́m tɨ̀ tace nɨ́m tɨ ndɨŋ nɨ́m ɓáàte nɨ ɗàɓwêwá.» 41Hȩ ŋgə́ tàcáàŋnɨ u̧nèé, á ŋgə́ ta nɨ̀vɨ́tɨ̀b gɨ̀cù bɨ yáá.

Currently Selected:

Ə́rɨ́b nùb tómé yi ə́llé 19: NTV

Highlight

Compare

Copy