HINWƆ HI MITS YOHANA 9

1Wɛɛ Bɛtwalsɛr za nɔɔnsum bɔ ul pɔ̧rɔ. Mi wɛɛ mi gbɛn sɛwal za fu̧u̧z nɛ bɛtha mɛɛz hɛbtdi. Hi gàà sɛwal bɔ wɔrkɛ zɛŋk dubt ha̧a̧l bɔ ya̧a̧gbarɔ gboorinsɔya naan du, 2gboorin zɛŋk dubt ha̧a̧l bɔ ya̧a̧gbarɔ, uus tuuz gedu an laazɛŋk gbɔɔl uusɛ; zɛŋk dubt ha̧a̧l bɔ uusɔ bɔ tuuz a zɛŋk bɔ ya̧a̧gbarɔ bɔ ge wis ɔ̧ti hi bɛtha sɛw.

3Dagr hi tuuz a uus ha̧a̧l bɔ gedu hi hɛks waal du; hi gaahi gabsya̧ an kel wɔ hi gi hɛbtdi gabsya̧. 4Hi raahi a bɔhi ha̧tir hɛto, bɔhi ha̧tir hinzayɔ pir hɛbtdi, bɔhi ha̧tir tɛ̧ɛ̧, ha̧tirihi dood wɔ hi taan Bɛt gbɛɛtɔ a hi ti̧i̧l du hii kpɔd 5Hi gaa dagr wɔ gbɔnɔ an hi gbɔm dood gɛ; hi gaahi gbɔnɔ an hi ha̧a̧nihi ya̧a̧r gii sɛɛ nɔɔnɛ. Ya̧a̧rhant yɔ dagr wɔ hi gɔ, gi an kelyɔ gɔ tor doo gi guŋge.

6A ɔ̧t wɔrɔ gedu dood hí tɛb wɔrko hi gbɛnig gɛ, gi ha̧a̧hi an hi wɔrɔ, wɛɛ wɔrk gi nɔ̀ɔ̀hi be. 7Dagrya̧ hi riitin an dɔy wɔ hi gɛbsihi an hi renihi nɔk gɔnuko. Hi gin hinza hi zulha riitin an waar umskal yɔ hi gɔn hɛɛlmɔto, muutya̧ gi an dood ya̧nɛ, 8susugya̧ an nɛɛd ya̧nɛ; nuŋgya̧ hi gi an naamnɔɔdɛ ya̧nɛ.

9Gabs gbandilya̧ gi an gbandil tusɛ. Pakirya̧ wɔ namsya̧ hi gi an dɔy kittɔnɔ hi dirk mɔɔta dɔɔ tusya wɔ hi renik gabsɛ. 10Sa̧a̧nya̧ riitin an kel sa̧a̧nɛ hi rosya̧. Sa̧a̧nya̧ bɔ gii gɔ gaahi tɛŋk an hi gaa dood kosgumn sɛɛ nɔɔnɛ. 11Walsɛr bɔ hi gaag zɛŋk dubt ha̧a̧l naan du nuŋgɔ a Ibraniŋko ya̧a̧boon du a Abadɔŋ, hi Yonaniŋkoya ya̧a̧boon du be a Àpoliyɔŋ, raakɔ a lɛlha̧tirgo-yayɔ. Gii gi ma dagr wɔ waar ya̧.

12Ya̧a̧rhant biitir bɔ taalɔ, yɛrɛ ya̧a̧rhant zaadɛ wɔ eerɛ hi zaak te.

13Wɛɛ Bɛtwalsɛr nɔɔn-gbun bɔ ul pɔ̧rɔ. Mi wɛɛ mi lag ya̧a̧boon za fu̧u̧z a gur nas wɔ hi gi a Bɛtmaaksɛŋk bɔ hi gɔn hɛɛlmɔt bɔ gi a Bɛt muut duge, 14gi raak Bɛtwalsɛr bɔ gin pɔ̧r naan du:

a da mɔ pid walɛsɛrɛ wɔ nas hi wɔ̄hi a zɛɛ gbɔɔl bɔ Ofurata gedu.

15Hi rek hi pid walɛsɛrɛ wɔ. Hi ook nɛ an lɛlɔ gɔ gi rii, a ɔ̧tɔge, a sɛɛɔ hi wɛlɔ gɔ gi tuurɔ hi pidihi hi gbɔm dood waal du taasumya̧ bɔ. 16Dood nɔkgɔkya wɔ hi kar dɔy ha kitigya̧ tuur milyɔŋ tɛmɛrɛ eerɛ.

17Mi gbɛn dɔy karkya wɔ hi dɔyya̧ a gɛrs yɔ Bɛt zunsim gedu an yɛrɛ lɛ: gabs gbandilya̧ tusya bɔ bɛrkɔ za gis hobtɔnɔ an laa, bɛrkɔ za be riitin an bɛtha wilsɔ, wɛɛ bɛrkɔ za be, gi kɔɔtiltɔnɔ an tunsa yɛ̧ɛ̧sɛ. Dɔy wɔ zulya̧ hi wɛɛ an naamnɔɔ zulɛ. Laa gi tuuk hi ya̧a̧ du hi uus ha̧a̧lɛ hi riim buu-hobo. 18Dood hi ɓɛ̧ɛ̧y lɛl taarɛ, taasumya̧ bɔ hi gbɔ̧hi hi hin ya̧a̧rhantya taarɛ wɛrɛ hiya: hi gbɔmnihi laa, hi uus ha̧a̧lɛ hi riim buu-hobɛ wɔ hi tuuk a dɔy wɔ hi ya̧a̧ du.

19Dɔy wɔ gabsya̧ lɛl gi a ya̧a̧ du hi sa̧a̧n muulɛ; sa̧a̧nya̧ riitin an beksɛ, hi gin zulɛ, hi gaak nɔk hi sa̧a̧nya̧ bɔ mɛsɔ an beksɛ.

20Dood zaadɛ wɔ ya̧a̧rhant wɛrɛ hi gbɔ̧hi gɛ, hí zɛ̄mr kpoosya̧ hi ɔ̄ɔ̄ woosya̧ wɔ hi wook hi naanya̧ gɛ; hi ɔ̄ɔ̄ loorɛha̧a̧l wɔ ɗɔbsugɔ, hi ɔ̄ɔ̄ maakwɔd wɔ hi gɔn hɛɛlmɔto, tusɛ, tus hobo, beto, hi tɛ̧ɛ̧hɛɛk ɗɔbsugɔ gɛ. Hin wɛrɛ sɛw hí ɗɛ̄ɛ̄ an hi gbɛnlɔl gɛ, hí ɗɛ̄ɛ̄ an hi kɛm tɔn gɛ, wɛɛ hí ɗɛ̄ɛ̄ an hi ɛmb gɛ. 21Hí zɛ̄mr kpoosya̧ hi ɔ̄ɔ̄ zul-gbɔŋki hi sees gɛ, hí ɔ̄ɔ̄ ya̧a̧ yɔ hi doo tɔmnik gɛ, hi ɔ̄ɔ̄ mansnaaki hi luurlook gɛ.

Currently Selected:

HINWƆ HI MITS YOHANA 9: NTD

Highlight

Copy

Compare