HINWƆ HI MITS YOHANA 7

1Hɔnɛyɔ anbɔ, mi wɛɛ mi gbɛn Bɛt walɛsɛrɛ nasɔ hi erk a hɛbt yoogil lɛl nas wɔ gedu gbunu gbunu; hi wa̧a̧k zɛk nas wɔ waal du a naan du an bɔhi fɛb a hɛbt di zaabe a mɛmbal gbɔɔl ha, zaabe a tɛ̧ɛ̧ za muulɛ. 2Mi wɛɛ mi gbɛn Bɛtwalsɛr za gi zaako, a ɔ̧tkazigi gi wa̧a̧k Bɛt Za̧a̧til bɔ nuŋgɔ bi̧i̧y a tustaak ha naan du, ɓoos Bɛt walɛsɛrɛ nas wɔ ya̧a̧, wɔ Bɛt gaahi tɛŋk an hi woo bɔbtin a hɛbtdi hi a mɛmbal du,

3a bɔnɛ gɔ hinbɔbtin a hɛbtdi hi mɛmbal gbɔɔl bɔ du hi tɛ̧ɛ̧ wɔ hi muulɛ, gi tuur an be gɔ gbɛɛt a Bɛt wɛ woosɔya wɔ hi ti̧i̧l du kete.

4Hi dɔgsim dood wɔ hi gɔsihi Bɛt gbɛɛtɔ ti̧i̧l du kitigya̧: hi gi dood duk tɛmɛrɛ hi duk dumbili nasɔ daatɔ nasɔ (144.000). Dood wɔ hi gɔsihi Bɛt gbɛɛtɔ anbɔ hi fu̧u̧ a Israhilaya dɔ̧ɔ̧t wɔ sɛw gedu.

5Dood wɔ hi fu̧u̧ a Yahuda dɔ̧ɔ̧t du hi gbaasihi Bɛt gbɛɛtɔ ti̧i̧l du, hi gi dood duk kooblɛ daatɔ eerɛ (12.000). A Rubɛn dɔ̧ɔ̧t du be, hi gi dood duk kooblɛ daatɔ eerɛ (12.000); a Gad dɔ̧ɔ̧t du be, hi gi dood duk kooblɛ daatɔ eerɛ (12.000); a Aazɛr dɔ̧ɔ̧t du be, hi gi dood duk kooblɛ daatɔ eerɛ (12.000); 6a Nɛbtali dɔ̧ɔ̧t du be, hi gi dood duk kooblɛ daatɔ eerɛ (12.000); a Manase dɔ̧ɔ̧t du be, hi gi dood duk kooblɛ daatɔ eerɛ (12.000);

7a Simɛyɔŋ dɔ̧ɔ̧t du be, hi gi dood duk kooblɛ daatɔ eerɛ (12.000); a Lewi dɔ̧ɔ̧t du be, hi gi dood duk kooblɛ daatɔ eerɛ (12.000); a Isakar dɔ̧ɔ̧t du be, hi gi dood duk kooblɛ daatɔ eerɛ (12.000); 8a Zaabulɔŋ dɔ̧ɔ̧t du be, hi gi dood duk kooblɛ daatɔ eerɛ (12.000); a Yusufu dɔ̧ɔ̧t du be, hi gi dood duk kooblɛ daatɔ eerɛ (12.000); a Bɛnzamɛ dɔ̧ɔ̧t du be, hi gi dood duk kooblɛ daatɔ eerɛ (12.000). Dood wɔ hi gbaasihi Bɛt gbɛɛtɔ ti̧i̧l du hii wɔ.

9Kuudu, mi see mi gbɛn saalzanɔ gbɔɔl yɔ hi ɗɛɛ ɓɛrk gɛ, dood wɔ hi fu̧u̧ a hɛbt zaadɛ du, a dɔ̧ɔ̧t zaadɛ du, a dood zaadɛ hi teesdu, hi a ya̧a̧boon yɔ gi sɛw duge, hi gi erk a waar ums ɗɔɔtillɛl bɔ dɔŋgɔdi sɛw hi a Tamwaa bɔ gi muut du hi dimnaan buudɛ muulɛ, hi wa̧a̧ gbaadaak kpas wɔ naan du, 10hi ya̧a̧ɓooluko:

a za̧a̧tig gi a Bɛt wɛ yɔ ɗɔɔt a waar ums ɗɔɔtillɛl ge hi a Tamwaa bɔ ge.

11Wɛɛ Bɛt walɛsɛrɛ wɔ sɛw hi er hi rɔb waar ums ɗɔɔtillɛl bɔ, hi ɗɛntɛ wɔ hi hinza̧a̧til wɔ nasɔ hi zaglik a waar ums ɗɔɔtillɛl bɔ gi muutdu, hi ɗɔbsig Bɛto hi raako:

12a Aanbɔ! Rɔbsɛ, gbɔlumsɛ, hinmɛɛk dubti, banti, ɗɔbsigi, tɛŋko hi ɗɛɛti hi gi a Bɛt ge faa. Aanbɔ!

13Ɗɛntɛ wɔ zaaya̧ gbun warimi:

a bɔ dood wɔ hi heg dimnaan buudɛ muulɛ? Hi bɔ doodya̧? Hi fu̧u̧z ɔnɛ ay?

14Mi raage: a ɗɛntyɔ, mɔ mɛɛ be, mɔ warim nɔ? Gii wɛɛ raami:

a dood wɔ hi fu̧u̧z a ya̧a̧rhant gbɔɔl du hiya. Hi dokt dimnaanya̧ gbɔlɛ wɔ hi wɛɛ hi buusin hi Tamwaa bɔ ga̧a̧mɔ giya. 15Ya̧a̧nɛ hi gi a Bɛt waar ums ɗɔɔtillɛl bɔ gi muutdu, hi gisig wooswook lurk du hi yɛms du sɛw a gi luk du. Za̧a̧n yɔ ɗɔɔt a waar ums ɗɔɔtillɛl bɔ ge gi hi hiya gi oohi.

16A̦a̧kil taahi zaa ha̧a̧ko, mɛm taahi zaa ha̧a̧ko, wɛɛ ɔ̧t taahi zaa haak be, lɛltɛɛtil taahi zaa tɛɛk be. 17Yɔ anbɔ Tamwaa bɔ gi a waar ums ɗɔɔtillɛl bɔ teesɔ gedu yɔ gi nɛɛrɛya̧ gi ka̧hi a mɛm za̧a̧tigya lɛl bɔ gi gburk ge, wɛɛ Bɛt gi kɔksihi mɛɛkya̧ wɔ hi lɔl du sɛw.

Currently Selected:

HINWƆ HI MITS YOHANA 7: NTD

Highlight

Copy

Compare