HINWƆ HI MITS YOHANA 20

1Yɔ anbɔ, mi wɛɛ mi gbɛn Bɛtwalsɛr za siz a bɛtha; wa̧a̧ zɛŋk dubt ha̧a̧l bɔ gboorinsɔ naan du hi ba̧a̧ntus naa.

2Wa̧a̧ beksloorɛ bɔ, beks amnt bɔ: raakɔ a loorɛha̧a̧l bɔ, zaabe Saydanu, wɔg ba̧a̧n du an gi waa wɛl duko. 3Bɛtwalsɛr bɔ gbalig a zɛŋk dubt ha̧a̧l bɔ gedu, wɛɛ gboon hi gboorins bɔ, wɛɛ wɔmn ba̧a̧ni ɔɔg duhɔ, an bɔ̄ beksloorɛ bɔ gi wɛɛ gi maat dood a waal du sɔmsɔm, gi tuur an wɛl duk gbun bɔ gi da̧a̧ kete. Gɔ gi kuudu anbɔ gi an hi bisig gi am kaasi.

4Kuudu mi wɛɛ mi gbɛn waar ums ɗɔɔtillɛl wɔ; dood wɔ hi gaahi gbɔnɔ an hi gbaa dɔglɛ hi ɗɔɔt hage. Mi wɛɛ mi gbɛn dood wɔ hi boo nɛ Yeesu dɔglɔ hi Bɛtdɔgl a dood teesdu gid hi gbɔ̧hi kolya̧. Dood wɔ hi gbɔ̧hi hi da hi ɗɔ̄bs nambhɛtum bɔ hi muulɔ bɔ hi wɔm gɛ. Hi da hi dāg nambhɛtum bɔ nuŋgɔ bi̧i̧s a ti̧i̧l du, zaabe a hi naan du gɛ. Hi rɛmlɔ hi tal a waar ums du hi Kristu lɛlgbunu tuur wɛl duk gbunu.

5Gii gi rɛmtig biitiri. Wɔrkɛ zaadɛ wɔ be, wɛl duk gbun tal kete ɓɔr hi ɔɔ rɛmluko. 6Za̧a̧nyɔ dag za̧a̧tig bɔ ɔnɛ a rɛmtig biitir bɔ gedu gin hato, gi doo gaati. Wɔrk eesim bɔ taan tɛŋk ma an gi zɛm dood wɔrɔ. Hi wɛɛ Bɛtmaak wookyaadɛ hi Kristu maakwookɔyaadɛ, hi ɗɔɔt waar ɛ hi Yeesu wɛl duko.

7Wɛl duk gbun gɔ gi da̧a̧ hi tuus Saydanu gɔ gi luknɔ du, 8gi wɛɛ gi maat dood hɛbtyaadɛ sɔmsɔm a waal yoogil lɛl nas wɔ hi du sɛw, raakɔ a Gog hi Maagog lɛlɔge an gi mɔksihi hi gɔ nɔko; kitigya̧ gi an hɔ̧ɔ̧l a mɛmbal gbɔɔl ya̧di.

9Hi hɛks a waal du sɛw hi rɔb Bɛt doodɔ duulya̧ lɛl bɔ hi waal gbɔɔl yɔ Bɛt ha̧a̧g hi doodɔ. Yɔ anbɔ laa gi siz bɛtha gi dɔ̧ɔ̧hi. 10Gɔ gi anbɔ hi gbal loorɛha̧a̧l bɔ gihi nɛ maatig ma a laazɛŋk ha̧a̧l dubt bɔ uuk-uus hob gedu, a laazebt-uusya ha̧a̧l bɔ gedu, a lɛlyɔ nambhɛtum ha̧a̧l bɔ gi gedu hi bɛtya̧a̧kɛŋkya ya̧a̧gɔ̧ɔ̧nya bɔ. Hi sɛw hi ha̧a̧ya̧a̧r gedu yɛms du hi lurk du sɛw wɛlɛ hi wɛlɛ.

11Mi wɛɛ mi gbɛn waar ums ɗɔɔtillɛl buu gbɔɔlɛ hi za̧a̧n bɔ ɗɔɔt hage. Hɛbtdi hi bɛtha sɛw hi nɔ̀ɔ̀ gi muutdu, yɔ kuudu lɛlya̧ taa ma. 12Kuudu mi wɛɛ mi gbɛn wɔrkɛ wɔ, dood nabl wɔ hi dood tɔs wɔ sɛw hi er a waar ums ɗɔɔtillɛl bɔ gi muutdu. Ɗɛɛrwol kittɔnɔ hi gboora. Ɗɛɛrwol zaa dɔɔm wɛɛ gboora, ɗɛɛrwol za̧a̧tigya bɔ giya. Hi gbaas wɔrkɛ wɔ dɔglɛ anyɔ woosya̧ fɔbɔ an hinyɔ hi bi̧i̧ nɛ a ɗɛɛrwol wɔ gedu.

13Dood wɔ mɛmbal gbɔɔl gbɔ̧hi, wɛɛ wɛnzihi. Wɔrko hi wɔrkɛ ɗɔɔtillɛl bɔ hi wɛɛ hi wɛnz wɔrkɛ wɔ hi gihi nɛ gbaako. Dood sɛw hi gbaasihi dɔglɛ anyɔ woosya̧ fɔbɔ. 14Yɔ anbɔ, hi gbal wɔrko hi wɔrkɛ ɗɔɔtillɛl bɔ a laazɛŋk fɛɛt ha̧a̧l bɔ gedu. Laazɛŋk fɛɛt ha̧a̧l bɔ giigi wɔrk eesimɛ. 15Za̧a̧nyɔ hi tɛb nuŋgɔ hi zɛ̄m bi̧i̧y nɛ a za̧a̧tig ɗɛɛrwol bɔ gedu gɛ hi gbalig a laazɛŋk fɛɛt bɔ gedu.

Currently Selected:

HINWƆ HI MITS YOHANA 20: NTD

Highlight

Copy

Compare