HINWƆ HI MITS YOHANA 2

1Bi̧i̧sum fɔkbeya wɔ a Efesu Bɛtwalsɛrya̧ bɔ hin an yɛrɛ lɛ: a Za̧a̧n bɔ gi wa̧a̧k sɛwaat nɔɔn-erɛ hi naanɔ rɔbo gi wɛɛ gi ɛmbik a laa-gbaaklɛl nɔɔn-er wɔ hi gɔn hɛɛlmɔt hi teesdu raa anyɔ lɛ

2a be mɛɛ woos mɔ wɔ hi mɔɔt mɔ hi hinmɔŋk yɔ mɔ waak mɔŋko. Be mɛɛ a mɔ́ ɗɛ̄ɛ̄ an mɔ mɔms dood ha̧a̧l hin gɛ, dood wɔ hi raak a be gi Bɛtdɔgl tɔmsyayɔ, wɛɛ hi taa tɔmsya rɔbɛ be, mɔ goohi mɔ zɛ̧hi ya̧a̧gɔ̧ɔ̧nyaadɛ! 3Mɔ gin hinmɔŋki, mɔ ha̧a̧ya̧a̧r a be nuŋg dɔŋgo, wɛɛ mɔ́ hɔ̄ns muul gɛ.

4Yɛrɛ hinyɔ bɛsib a mɔɔge gɛ, ha̧a̧kyɔ ha̧a̧m doos be muulɛ mɔ biisɔ. 5Mɔkum mɔ mɛɛ lɛlyɔ mɔ madz gedu. Dɛmnaanɛ, mɔ ɔɔ hinha̧a̧l mɔ, wɛɛm mɔ woo an da doosɛ. Gid mɔ dɛmnaan gɛ, mɔ ɔɔ hinha̧a̧l mɔ gɛ, bé zaa a mɔɔge bé ha̧s laa- gbaaklɛl mɔ bɔ a lɛlyɔ gi ge. 6Yɛrɛ hinyɔ be ta̧a̧ mɔɔge, mɔ in Nikolaya wɔ woosya̧ an beeyɔ be in hi zul be.

7An za̧a̧nyɔ gin tɔnɛ gi kɛm hinyɔ Bɛt Mɔkilɔ gi dɔksig fɔkbeya wɔ hi mɔksig lɛl sɔmsɔm: a za̧a̧nyɔ gɔ gi ɗɛɛ waalɛ be gaag tɛŋk an gi le tɛ̧ɛ̧ za̧a̧tigya bɔ humlɔ gi a Bɛt bak du.

8Bi̧i̧sum fɔkbeya wɔ ɔksilya̧ bɔ a Samirna Bɛtwalsɛrya̧ bɔ hin an yɛrɛ lɛ: a za̧a̧nyɔ gi doosi hi kuudi, yɔ wɔr nɛko gi wɛɛ gi za̧a̧, raa anyɔ lɛ

9a be mɛɛ ya̧a̧rhant mɔ hi ya̧a̧rums mɔ - yɛrɛ hi rɔbo mɔ gi doo rɔɔsyayɔ! Be mɛɛ dood wɔ hi raak a hi gi Yahuduyayɔ ya̧a̧ha̧a̧lya̧ yɔ hi book a nɛ zulha, wɛɛ hi taa Yahuduyaadɛ be. Hi gi Saydanu mɔksilluk doodɛ! 10Bɔ hoob gi ha̧a̧mɔ a hinyɔ gɔ mɔ ha̧a̧ya̧a̧r ɓɔriɓɔri gedu. Mɛɛnɛ a wag kaasi loorɛha̧a̧l gi gbalik dood zaadɛ nɛ tees du a luknɔ du an gi maatinɛ, wɛɛ nɛ ha̧a̧ya̧a̧r ɔ̧t kooblɛ. Ɗɔbsum hi tɛŋko gi tuur a wɔrk mɔ ɔ̧ti, be gaam za̧a̧tig waar ums kalɛ.

11Za̧a̧nyɔ gin tɔnɛ gi kɛm hinyɔ Bɛt Mɔkilɔ gi raasig fɔkbeya wɔ hi mɔksig lɛl sɔmsɔm. Za̧a̧nyɔ gɔ gi ɗɛɛ waalɛ, wɔrk eesim bɔ taag zɛŋko.

12Bi̧i̧sum fɔkbeya wɔ ɔksilya̧ bɔ a Pɛrgam Bɛtwalsɛrya̧ bɔ hin an yɛrɛ lɛ: a za̧a̧n bɔ gin daŋbɛsim yɔ ya̧a̧gbarɔ lɔm lɛl eerɛ a naan du raa anyɔ lɛ:

13a be mɛɛ lɛlyɔ mɔ waako, be mɛɛ a Saydanu waar ums ɗɔɔtillɛlɔ gi hɔ. Mɔ fɔk nuŋg be hi rɔbo, mɔ́ ɔ̄ɔb ɗɔbsig gɛ; anyɔ hi gbɔm segya be rɔb bɔ Antipatis a nɛ teesdu a Saydanu ɗɔɔtillɛlɔ bɔ ge hɛw.

14Yɛrɛ hin kaasi ro gi bɛ̄sib a mɔɔge gɛ. Dood wɔ hi fɔk Baalam hingokɔ hi gi nɛ teesdu a mɔ lɛlɛ: Baalam bɔ gii goks Balaku hin an gi gbaas Israhilaya wɔ hin dɔɔsiŋkya a hi muutdu gi matinihi an hi tɔb namb yɔ hi gbɛɛr hi gɔns bɛt ya̧a̧gɔ̧ɔ̧nya wɔ maako, hi naamans be. 15Dood zaadɛ wɔ hi fɔk Nikolaya wɔ hingokya̧ hi gi mɔ lɛl hɛw. 16Yɔ anbɔ, dɛmnaanɛ! Gid nɛ ɔ̄ɔ̄ hinha̧a̧l nɛ gɛ, wag kaasi bé zaa a mɔ lɛlɛ be gɔtin nɔk hi dood wɔrɔ hi daŋbɛsim yɔ gi tuuk be ya̧a̧ du.

17Za̧a̧nyɔ gin tɔnɛ gi kɛm hinyɔ Bɛt Mɔkilɔ gi dɔksig fɔkbeya wɔ hi mɔksig lɛl sɔmsɔm: a za̧a̧nyɔ ɗɛɛ waalɛ be gaag lees yɔ yaat gɔ hi el nuŋgɔ a maanyɔ zaaɔ. Be wɛɛ be gaag kambuuto; nuŋg yɔ bi̧i̧y a kambuut bɔ muulɔ ge doo za mɛɛ gɛ, gɛ za̧a̧nyɔ gɔ gi dagige.

18Bi̧i̧sum fɔkbeya wɔ ɔksilya̧ bɔ a Tiyatira Bɛtwalsɛrya̧ bɔ hin an yɛrɛ lɛ:

19a Bɛt waa bɔ lɔlɔ wɔ hi gi an laazebti, wɛɛ dɔɔɔ wɔ hi gaa an tus yɔ ram laa du raa anyɔ lɛ: a be mɛɛ woos mɔ hi ha̧a̧tig mɔ hi ɗɔbsig mɔ sɛw, hi woos yɔ mɔ wook hi tɛŋko, be mɛɛ hinmɔŋk mɔ hi woos mɔ kitɛ zaadɛ wɔ kuudu hi daar woos biitir wɔ sɛw. 20Yɛrɛ hinyɔ be in mɔɔge, yɔ mɔ ɔɔk nis bɔ Ziizabɛl gi wɛɛnik zulɔ an gi Bɛtya̧a̧kɛŋkya gi wɛɛ gi goksig woosya be wɔ hinɛ an gi Bɛt dɔglɛ, wɛɛ gihi maatig an hi naamansi, hí tɔb namb yɔ hi gbɛɛrɔ hi gɔns bɛt ya̧a̧gɔ̧ɔ̧nya wɔ maako. 21Be ɔs nis bɔ gbɔnɔ an gi ɔɔ hinha̧a̧lɔ gi dɛmnaanɛ, iinɔ, hā̧a̧g an gi ɔɔ mansnaakɔ bɔ gɛ.

22Yɛrɛ an hí dɛ̄mnaan hí ɔ̄ɔ̄ nis bɔ woosɔ ha̧a̧l wɔ gi wook fɔkɔ gɛ, be gbaag a gums sil ha gi ha̧a̧ya̧a̧rɛ, gi ha̧a̧ya̧a̧r ha̧a̧ltɔnɔ hi dood wɔ hi mansnaak hi hii sɛw. 23Bé gbɔm waatɔ wɔ an fɔkbeya wɔ hi gi a lɛl sɛw hi mɛɛ a bee mɛɛ dood mɔkil ɓɛɛko, bee gi za̧a̧nyɔ mɛɛ dood kpoos ɓɛɛk sɛw. Be gaa za̧a̧nyɔ gi sɛw dɔɔrɔɔsɔ anyɔ woosɔ fɔbɔ.

24Yɛrɛ nɛɛ fɔkbeya zaadɛ wɔ nɛ gi a Tiyatira sɛw, wɔ nɛ taa hingok bɔrɔ fɔk gɛ, wɔ nɛ gok hinyɔ dood zaadɛ gɔ hi el a Saydanu dɔglɔ yaatilya dubtɔ lɛl gɛ, be taasin hinɗɔmn za dɔ̧ɔ̧m gbaak zulha. 25Hin gbunu: oon hinyɔ nɛ gin hi tɛŋko gi tuur a be zaak du. 26-27Za̧a̧nyɔ ɗɛɛ waalɛ gi wɛɛ gi wook hinyɔ ha̧a̧be gi tuur a waalda̧a̧ki, be gaa za̧a̧nɔ tɛŋk yɔ Baa be gaabe gi wɛɛ gbɔɔl a dood wɔ hi mɛɛ Bɛt gɛ hi zulha. Gi oohi hi sɔɔltusɔ, gi wɛɛ gi gbɔmrihi an dɔni. 28Be wɛɛ be gaag sɛwal bi̧i̧limi.

29Za̧a̧nyɔ gin tɔnɛ gi kɛm hinyɔ Bɛt Mɔkilɔ gi dɔksig fɔkbeya wɔ hi gi lɛl sɛw.

Currently Selected:

HINWƆ HI MITS YOHANA 2: NTD

Highlight

Copy

Compare