HINWƆ HI MITS YOHANA 12

1Hinza hinmɛɛnikya gbɔɔl midz bɛtha: nis za midɔ heg ɔ̧ti an gbandili a gi muulɛ, sɛɛ gi gi dɔɔ du, heg waar umskal yɔ hi katin hi sɛwaat koobl daa eer gi zulha. 2Gi nɛ buudu gi waa gulko. Waagulk bɔ ya̧a̧rhantɔ gig tɔk gi kaako, wɛɛ gi ook hi koltuun an gi gul waaɔ bɔ.

3Wɛɛ hinza dɔɔm hinmɛɛnikya mid a bɛtha: beksloorɛ hob gbɔɔlɛ hi zul nɔɔn-erɛ, hi gur kooblɛ hi waar ums kal a zul nɔɔn-er wɔ hage gbunu gbunu. 4Nams sa̧a̧nɔ gɛ̧ɛ̧n sɛwaat wɔ bɛtha lɛl taarɛ, wɛɛ lɛbtir zaadɛ wɔ sɛw bɛrkya̧ taasum wɔ hi sa̧a̧nɔ bɔ hi mɛlz hɛbtdi. Beksloorɛ bɔ er a nis bɔ gi gulk waa gi muutdu an gi i̧i̧ waaɔ bɔ gɔ gi gulige.

5Nis bɔ gul waaɔ wal bɔ gɔ gi wɛɛ waal wɔ hɛbtdi sɛw waar ya̧ gi oo doodya̧ hi sɔɔltusɛ. Yɔ anbɔ hi pɛɛr waaɔ bɔ hi dɔɔnig bɛtha a Bɛt ge hi da hi gbaag a Bɛt waar ums ɗɔɔtillɛlɛ. 6Nis bɔ nɔɔ rek hɛtdɔŋdu, Bɛt gɛmntsig lɛl hɔ, gaag lees ɔ̧t duk gbunu hi yɔ̧ɔ̧lɔ kooblɛ daatɔ dumbili nɔɔngbunu (1260).

7Yɔ anbɔ gabs ɗund gɔ bɛtha. Bɛtwalsɛrɔ za gbɔɔl nuŋgɔ a Misɛl hi walɛsɛrɛ ɔ̧ɔ̧ hi ɔks hi gɔ gabs hi beksloorɛ bɔ a bɛtha. Beksloorɛ bɔ ɔks hi walɛsɛrɛ ɔ̧ɔ̧ be a gabs bɔ gedu. 8Bɛtwalsɛrɔ gbɔɔl bɔ Misɛl hi walɛsɛrɛ ɔ̧ɔ̧ hi ɗɛɛ wɔrɔ ɗɛɛ. Beksloorɛ bɔ hi walɛsɛrɛ ɔ̧ɔ̧ hí wɛ̄ɛ̄ hí dāg tɛŋk ɗɔɔtig a bɛtha hɔ ma gɛ. 9Hi yarzig hɛbtdi. Gii gi beks amnti, nuŋgɔ a loorɛha̧a̧lɛ, zaa a Saydanu, gii gi maatig dood waal du sɛw. Hi yarzig hɛbtdi hi walɛsɛrɛ ɔ̧ɔ̧ wɔ sɛw lɛlgbunu. 10Mi lag ya̧a̧ za tɛŋkya booy a bɛtha:

a yɛrɛ Bɛt yaaz za̧a̧tigɔ tuurɔ; zuun tɛŋkɔ hi waar umsɔ. Yɛrɛ Masihu ɔ̧ɔ̧ bɔ zuun waar umsɔ tɛŋk gɔ be. Ya̧a̧nɛ, za̧a̧nyɔ gi nɛ yɛ̧ɛ̧dɛ wɛ hingɛ̧ɛ̧nik a Bɛt muutdu yɛms du hi lurk du sɛw, hi bisig-bis ma. 11Dood wɛ hi ɗɛɛgɗɛ hi Tamwaa bɔ ga̧a̧mɔ tɛŋkɔ, hi Yeesu dɔglyɔ hi boosig nɛ dood tɛŋkɔ. Hi wɛɛ hi ta̧a̧ an hi gaa kolya̧ hi wɔrɔ.

12Yɔ anbɔ, bɛtha, dagum hato, nɛɛ wɔ nɛ waak bɛtha, kpɛ̧ɛ̧nɛ. Yɛrɛ nɛɛ hɛbto hi mɛmbal gbɔɔlɛ, ya̧a̧rhant gisinɛ! Anyɔ hi bis loorɛha̧a̧l bɔ hɛbt di gi wɛɛ gi mɛɛ a ɔ̧t zɛ̧rsib tɔɔ gɛ, sil nɛɛge hi nɔɔtig ha̧a̧lɛ.

13Yɔ beksloorɛ bɔ gbɛn hi bidzig hɛbtdi anbɔ, yɛɛl nis bɔ mɔɔ waaɔ wal gii fɔbtugo. 14Hi hɛ̧ɛ̧s nis bɔ seereere gbɔɔl pakir eerɛ an gi wir beksloorɛ bɔ gi naandu gi ɗundin gi rek a lɛlyɔ gɔ hi lenig wɛl taarɛ hi sɛɛ nɔɔngbun ge a hɛtdɔŋ du.

15Beks bɔ wɛɛ wɛm mɛm gbɔɔl an mɛm yɔ gɔ tuu a zɛɛ gbɔɔl du an gi re gi tuur nis bɔ. 16Hɔnɛ hɛbt bɔ ɗaas nis bɔ aaya̧a̧ yɔ̧r mɛm gbɔɔl yɔ beksloorɛ bɔ wɛmɔ.

17Yɔ anbɔ, hinnɔɔ beksloorɛ bɔ hi nis bɔ, rek da gɔ gabs hi nis bɔ waatɔ zaadɛ wɔ, raakɔ a dood wɔ hi wa̧a̧k Bɛt dɔglɔ wɔ, wɔ hi book Yeesu dɔglɔ. 18Beksloorɛ bɔ wɛɛ da er gɔ a hɔ̧ɔ̧l ha a mɛmbal gbɔɔlya̧.

Currently Selected:

HINWƆ HI MITS YOHANA 12: NTD

Highlight

Copy

Compare