YAKUBA 2
2
YAKUBA 2
1Yɛ̧ɛ̧dɛ mi wɛ, nɛɛ yɔ nɛ ɗɔbsig Waar wɛ Yeesu Kristu doo gbɔlumsya bɔ, taa an nɛ see doo a muutdu. 2Mɔkin ta̧: an doo za rɔɔsya gul a nɛ mɔksilluk du hi banawaa yɔ hi tun hɛɛlmɔt gi heg naan du, hi gbandil bɛt muulɛ; wɛɛ gid ya̧a̧ryawaa za zaa gul a mɔksilluk bɔ gedu hi gbandil haŋsil be, yɔ nɛ woo ri? 3An nɛ see za̧a̧n rɔɔsya bɔ heg gbandil rɔb muul gii nɛ raage a ɗɔɔtum a lɛl rɔb yɛrɛ ge, nɛ wɛɛ nɛ raa gbandil haŋsilya bɔ be: a erum hɔ! Zaabe a ɗɔɔtum be dɔɔ dɔŋdi a hɛbt di, 4yɔ anbɔ, nɛ gbàà gɛ̧ksili a nɛ teesdu, nɛ wɛɛ nɛ gɛ̧ɛ̧k dɔgl bɔ hi mɔkil ha̧a̧lɛ.
5Kɛnɛ, yɛ̧ɛ̧dɛ mi rɔbɛ wɛ, nɛ Bɛt her ya̧a̧ryaadɛ a waal lɔlgbarɔ an gi wɛɛnihi dood rɔɔsyaadɛ hi ɗɔbsigi an hi dag Bɛt wáátɔyɔ raa a be gaa dood wɔ ha̧a̧hi ge ma mi? 6Wɛɛ nɛya nɛ bɔ̧ɔ̧k ya̧a̧rya wɔ be! Nɛ rɔɔsya wɔ hi taan ya̧a̧kɛtingo hi taan dirk kaŋk a dɔglyɛ̧ɛ̧kluk wɔ hi du ya? 7Hii taa ya̧a̧ha̧a̧l book a nuŋg rɔb yɔ Bɛt gaan hage ya? 8Gid nɛ waak wook Bɛt wáát maakdɔgl yɔ hi bi̧i̧ a Bɛt ɗɛɛrwol du hi rɔbo:
a gi ha̧a̧mɔ namɔza an mɔya,
nɛ wook rɔbo. 9Yɛrɛ gid nɛ seek dood a muutdu nɛ gɛ̧ɛ̧k dood be, nɛ wook hinha̧a̧lɛ, nɛ wɛɛ nɛ wɛɛ Bɛtmaakdɔgl ha̧tirgoyaadɛyɔ. 10Za̧a̧ni fɔ Bɛtmaak wɔ sɛw gi wɛɛ gi ha̧tir zaaɔ gbunu, gɔ hin-a̧a̧bi a Bɛtmaak wɔ gedu sɛw. 11Ya̧a̧nɛ za̧a̧nyɔ raa:
a bɔmɔ naamansi,
wɛɛ raa ɓɛ,
a bɔmɔ gbɔm zulɛ;
yɔ anbɔ gid mɔ́ nāāmans gɛ, mɔ́ gbɔ̍m zul be, mɔ wɛɛ Bɛtmaakdɔgl ha̧tirgoyayɔ. 12Yɔ anbɔ, boonya̧a̧, woon an dood wɔ gɔ hi gbaasihi dɔglɛ hi Bɛtmaakdɔgl rɔb tib yɔ gɔ tuus zul wɛ aakil du giya. 13Ya̧a̧nɛ, za̧a̧nyɔ mɛɛs naaza hii ya̧a̧r gɛ, Bɛt gi gbaasig dɔglɛ, taasig ya̧a̧rɔ mɛɛk be. Ya̧a̧rmɛɛki gɔ ɗɛɛ dɔgl-gbaak ɗɛɛ. 14Yɛ̧ɛ̧mi wɛ, doo gi raa a be ɗɔbsig Bɛto, gi wōōn-woosɔ du gɛ, gi an gi dag nɔ gedu, ɗɔbsigɔ bɔ gi za̧a̧sig ya?
15Gid yɛ̧ɛ̧mɔza zaa, zaabe siŋg mɔ gi taan gbandili, gi taan leesɛ, 16doo za a nɛ teesdu gi raahi: a rekum rɔbtɔnɔ! Hegum saŋks gbandili, an bɔ saŋks gi saŋgumɔ, mɔ lelees rɔbtɔnɔ mɔ hi̧i̧; hɔnɛ gi gāag gbandili zaabe lees gɛ, bɛn ma nɔ? 17Za̧a̧nɔ gi gi ɗɔbsig Bɛto, ɗɔbsigɔ bɔ gi kɔm ɔ̧ɔ̧kɔ gi ɔ̄ks hi woos du gɛ, wɛɛ hintɔsyɔ. 18Wɛɛ doo za gi raami: a mɔɔ mɔ gin ɗɔbsigi, bee be gin woosɛ; yɔ mi ta̧a̧g a zunsimi ɗɔbsig yɔ taan woosɔ du gɛ, mii mi zunsum ɗɔbsig mi hi woos mi.
19Mɔ ɗɔbsɔ a Bɛt gi gi gbun ya? Mɔ gɔ rɔbo! Yɛrɛ loorɛha̧a̧l wɔ hɛw hi gig ɗɔbsugo, wɛɛ hi beek hoob be. 20Mɔɔ doo tɔs, hā̧ā̧mɔ an mɔ mɛɛ a ɗɔbsig yɔ taan woosɔ du gɛ gi hintɔsi gɛ ya? 21Nɛ Bɛt mɛks baa wɛ Abraham ri gi seeg an doo riiti ɔnɛ? Nɛ yɔ woo hinyɔ rii gii gi gaag ma waawal Isaaku an gaas ma a gi maaksɛŋk ha mi? 22Mɔ gbɛn yɔ ɗɔbsigɔ ɔks hi woosɔ, ɗɔbsigɔ bɔ gaaga hi woosɔ bɔ. 23Yɔ anbɔ, Bɛt da̧a̧s hinyɔ ɗɛɛrwolɔ raa:
a Abraham ɗɔbs Bɛto, ya̧a̧ gii Bɛt gi seeg an doo riiti,
hi wɛɛ hi elig a Bɛt sa̧a̧mɔ ga. 24Yɛrɛ nɛ gbɛnɔ, doo gɔ rii a Bɛt muutdu a woosɔ rɔbɛ wɔ hi dɔŋgo, taa hi ɗɔbsigɔ bɔ gii kpɔd. 25Hinɔ anbɔ ro hinɔ gi turs nis bɔ Rahab, nis kaat ha̧a̧l bɔ. Rahab wɛɛ doo riit a Bɛt muutdu a gi woos dɔŋgo. Gii zeb nɛ Israhila wɔ tɔmsyaya̧ wɔ gi goksihi gbɔnɔ za dɔɔm hi fɔb hi rekɔ. 26Anyɔ muul gɔ taan kol gɛ gi wɔrɔ, gbunɔ giya ɗɔbsigi gi ɔks hi woos gɛ wɔɔr be.
Currently Selected:
YAKUBA 2: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.