YAKUBA 3

1Yɛ̧ɛ̧dɛ mi wɛ, bɔ̄ dood kit a nɛ teesdu hi wɛɛ hingok- yaadɛ. Ya̧a̧nɛ nɛ mɛɛ a wɛ́ɛ́ hingokya wɔ hi gbààsɛ dɔgl gi daar dood zaadɛ ya̧nɛ daarɔ. 2Wɛ sɛw wɛ wook hin-a̧a̧bi hi gbɔnɔ sɔmsɔm. Za̧a̧n za gi gɔ hin-a̧a̧b a hinyɔ gi dɔk gedu gɛ, gi doo gaatyɔ, tɛŋkɔ ɗɛɛ an gi oo muulɔ sɛw. 3Gid wɛ yaa tus a dɔy ya̧a̧ du an gi lagsɛ tɔnɛ, wɛ gi kaŋk dɔy bɔ muulɔ a lɛlyɔ ha̧a̧wɛ ge sɛw.

4Yɛrɛ lɛmb gbɔlɛ wɔ mɛmbal gbɔɔl du: mɔkin tɔɔkya̧, zɛk gɔ fɛge gig renuko, nuukɔya bɔ gi nuunsɔ fɛŋwaa bɔ nuunuko gig renik a lɛlyɔ ha̧a̧g ge sɛw. 5Gbunɔ, mɛlyɔ ya̧a̧ du gi muul wansɔ zaayɔ, gi pɛɛk zulɔ, gi hin gbɔlɛ booko. Seen laa fɛŋwaayɔ gɔ dɔ̧ɔ̧ tɛs za gbɔɔlɛ. 6Mɛl yɔ ya̧a̧ du gi an laayɔ. Gin ha̧a̧l yɔ gi sɛw, mɛlyɔ ya̧a̧ du gi a muul du gi gaak muul ha̧a̧lɛ, gi ha̧tirgo muul wɛ sɛw gig kpɔɔk hi laa yɔ fu̧u̧z a ya̧a̧rhant lɛl du.

7Doo ɗɛɛ an gi ɛ̧ɛ̧n namb dɔ̧ɔ̧t wɔ hɛt du sɛw hi nɔɔs wɔ dɔ̧ɔ̧tya̧ sɛw, hi hinza̧a̧til wɔ hi ɛmbingo buu hi hinza̧a̧til wɔ mɛm du sɛw. 8Mɛl ɔnɛ doo za ɗɛ̄ɛ̄ an gi ɛ̧ɛ̧nig gɛ. Mɛl gi hinha̧a̧l yɔ gɔ tā̧ā̧ kɔmbik gɛ. Hi̧i̧s ɗɔŋk yɔ gɔ gbɔm doo giya. 9Wɛ gi baanik Baa wɛ Waar Bɛto hi mɛl yɔ ya̧a̧ du, wɛ wɛɛ wɛ gi boonik gii doo yɔ ki̧y an Bɛt ritinsɔ an boot gi wa̧a̧ge. 10Rɔbsɛ hi booto hi tuuk a ya̧a̧ gbuna bɔ gedu. Yɛ̧ɛ̧ mi wɛ! Bɔgi gi anbɔ a nɛ teesdu, bɛr gɛ! 11Mɛm gburklɛl ɗɛɛ an gi gbur mɛm hɛmnti hi mɛm zobtil ya̧a̧gbun du ya? Lab gɛ.

12Yɛ̧ɛ̧ mi wɛ, yɔmntnɔɔ dɛɛ̄ an gi hum kɔ̧ɔ̧b gɛ, wɛɛ namleesɛ ɗɛɛ an gi hum yɔmntnɔɔ gɛ. Gi anbɔ be, mɛmgburklɛl ti̧i̧til ɗɛɛ an gi gbur mɛmhɛmnt gɛ. 13Bɔ gi hinmɛɛkya dubti hi hinkɛŋkya zul du a nɛ teesdu nɔ? Za̧a̧nɔ zuun hinɔ hi ɛmbilɔ rɔbo hi woosɔ wɔ gi wook hi zultiisigi an hinyɔ hinmɛɛkɔ dubt bɔ kpoos du gisig goko. 14Yɛrɛ nɛ gin kubl ha̧a̧l hi gabs a nɛ kpoos du, nɛ mɔkig hinyɔ gɔ nɛ daks zul nɛ gii kpɔdi, bɔnɛ pɛɛ zul nɛ, bɔnɛ gɔ̧ɔ̧ya̧a̧ a rɔb muulɛ. 15Hinmɛɛk bɔrɔ taa hinmɛɛk yɔ gi fu̧u̧zig bɛtha a Bɛt Mɔkil ge; gi hinmɛɛk yɔ gi fu̧u̧zig a waali du, hi a loorɛha̧a̧l ge giya.

16Ya̧a̧nɛ lɛlyɔ lɔlha̧a̧l gi ge hi ka̧a̧si, lɛl-ha̧tirgo hi woos ha̧a̧l zaadɛ sɔmsɔm hi gi ge be. 17Yɛrɛ hinmɛɛk yɔ gi fu̧u̧zig a bɛtha gii gaa gi ɗaarlɛlɛ, wɛɛ gin boolumi, saŋtimi, ɗɔɔtil rɔbo, ya̧a̧rmɛɛk gbɔɔlɛ, gi waak hinrɔb wooki, gɔ zɛmr gɛ, taa mɛlya ha̧a̧lɛ. 18Dood wɔ hi kamzig boolum a dood tees di, dɔ̧ɔ̧t yɔ hi dɔ̧ɔ̧k hi boolumi, gɔ bɛɛ pirko, tɔɔ gaa humlɔ gɛ hinriiti.

Currently Selected:

YAKUBA 3: NTD

Highlight

Copy

Compare