EFESU 5

1Fɔn Bɛt dɔɔɔ an waat rɔbɛ wɔ ha̧a̧g a hi. 2Ɛmbin a hat du anyɔ Kristu ha̧a̧g a nɛɛge, gi wɛɛ gi gààsɛ zulɔ a Bɛt ge an gaasɛ hi namb yɔ hi gbɛɛrɔ hi nɔms Bɛt an gaasɛ hi ki̧i̧lɔ hɛmnti. 3Mansi hi ɓi̧i̧lim yɔ gi sɛw, zaabe ɗɔkumha̧a̧lɛ, bɔ hinɔ gi booy a nɛ teesdu nɛ zaŋ, hinɔ bɛ̄r anbɔ a Bɛt doodɔ teesdu gɛ. 4Bɔhi lag ya̧a̧lɛbtigi, zaabe yooya̧a̧, zaabe hin-kpɛ̧ɛ̧liki, hinya̧ hii gi dɔɔm a hinyɔ bɛr raak gedu. Bɛr an hi kɛnɛ nɛ raak banti a Bɛt ge.

5Yɔ anbɔ mɛɛn bɛttɔnɔ a mansnaakya, ɓi̧i̧limya, tusɗɔkumya, hi riitin hi maak wɔ fɔkya̧, doo wɔrɔ anbɔ sɛw hi taa Kristu wáátɔ hi Bɛt ɔ̧nɛ dako. 6Bɔ doo gi maatinnɛ dɔgl tɔs, ya̧a̧nɛ a hin wɔrɔ hi dɔŋg ro Bɛt nɔɔtigɔ gi zaak a dood wɔ hi gisig zulɓaasig hi zulha. 7Bɔnɛ ɔks hi hii nɛ zaŋ.

8Amntɔnɔ nɛ da nɛ gi nɛ lɛlwilɔ, yɛrɛ nɛ gi lɛlgaal a ɔksig nɛ bɔ gedu hi Waar Yeesu. Ɛmbin an lɛlgaal waato! 9Ya̧a̧nɛ lɛlgaal humlɔ gɔ fu̧u̧ a rɔbgɔk du, a hinriit yɔ gi gedu, a rɔb du sɛw. 10Seen hinyɔ gɔ gi har Waar Yeesu gii nɛ woo.

11Bɔnɛ ɔks a lɛlwil woos tɔs wɔ dood hi wook gedu, hinya̧ hi ɗɛ̄ɛ̄ an hi gaa huml rɔb gɛ. Yɔ bɛrɔ midinɛhi a lɛlgaal du. 12Ya̧a̧nɛ hinwɔ dood wɔrɔ hi wook a yaatillɛl du bookɔ hɛw gàà seemɛ. 13Yɔ anbɔ lɛlgaal gi mid woos wɔrɔ, hi gihi gbɛnik rɔbtɔnɔ. Yɔ anbɔ, lɛlgaal gi gɔ gaas hin sɛw an hi gbɛnihi. 14Hinɔ gii hi raa hinɔ:

a rɛmha, mɔɔ yɔ mɔ yoko, ɗundum a wɔrkɛ wɔ hi tees du! Kristu gii gi gaasumɔ an ɔ̧ti.

15Oon zul nɛ hi ɛmbil nɛ yɔ nɛ ɛmbik rɔbtɔnɔ, bɔnɛ ɛmb an wɔ hin gɔ wagihi. Ɛmbin an wɔ hi mɛɛhinɛ. 16Bɔdinnɛ ɔ̧t yɛrɛ hi woos rɔb yɔ gɔ nɛ ɗɛɛg wook sɛw, waal ha̧a̧tiro, ya̧a̧nɛ. 17Yɔ anbɔ, bɔnɛ kɔm an dood wɔ hi taan zul gɛ. Nɛnɛ mɛɛn hinyɔ Bɛt gig ha̧a̧k a nɛɛge. 18Bɔnɛ wɔn bumɛ: gi zɛlk hinɛ, kpoos nɛ hi̧i̧sige hi Bɛt Mɔkilɔ,

19anyɔ nɛ ɛɛk Dawda hin-ɛɛnɛ, hi hin-ɛɛn zaadɛ Bɛt ɗɔbsingoyaadɛ, hi hin-ɛɛn Bɛtbaanikya yɔ Bɛt Mɔkilɔ gin gaako, ɛɛnhinɛ nɛ waa Waar Yeesu ɗɔbsig hi hin nɛ ɛɛn bɔ hi kpoos nɛ sɛw, 20nɛ wɛɛ nɛ waa Baaba yɔ gi Bɛto baanik a hinyɔ gi hage sɛw hi Waar wɛ Yeesu Kristu nuŋgɔ. 21Bɔbe tiisig zulɔ a naaza dɔŋdi anyɔ hoob gig ha̧a̧k Kristu.

22Nɛɛdɛ, tiisin zul nɛ a wal nɛ hi dɔŋdi anyɔ nɛ titsig Waar Yeesu be. 23Wal gi nis bɔ zul ɔ̧ɔ̧nɛ anyɔ Kristu gi fɔkɔya wɔ hi gi muulɔ zulya̧ be, gi za̧a̧sigyaya̧ be. 24Gbunɔ gii anyɔ Yeesu fɔkyaadɛ hi tiisig zulya̧ a Kristu dɔŋdi, nɛɛd wɔ yɛhi gi anbɔ hi walya̧ a hinyɔ gi gedu sɛw.

25Walɛ wɛ, yɛgi ha̧a̧nɛ a nɛɛɗ nɛ hi muulɛ anyɔ Kristu ha̧a̧ge a Yeesu fɔkyaadɛ ɔksilya̧ bɔ ge gi gaa zulɔ a hi dɔŋgo, 26an gi gaasihi hi Bɛtmɛmɛ hi Bɛtɗɔglɔ, gi wɛɛnihi Bɛt doodɔ gaatɛ. 27Yɔ anbɔ Yeesu ha̧a̧g nɛ an gi gbaa fɔkɔya wɔ a gi muut du an nisɔ lool gbɔlumsya yɔ bɛrɔ, gi gaa, gi taan libto, muulɔ yɔ̧ɔ̧ gɛ, zaabe, hinza yɔ riitin anbɔ, yɔ gaa rɔbtɔnɔ, hin-a̧a̧b za dɔɔm gi taa a ge gɛ.

28Walɛ wɔ yɛgi ha̧a̧hi a nɛɛdya̧ muul anbɔ an muul ya̧nɛ. Za̧a̧nyɔ ha̧a̧g anbɔ a nistɔ ge, ha̧a̧g zul ɔ̧ɔ̧nɛ. 29Doo za taa an gi hɛ̧ɛ̧n zulɔ lɔlɛ; gi kaŋkig muulɔ rɔbtɔnɔ, gisig lees leko, anyɔ Kristu gis fɔkɔya wɔ ɔksilya̧ gɔko, 30anyɔ wɛ gi muul dɛɛt a muulɔ gbɔɔl bɔ gi muulɛ.

31Ya̧a̧nɛ wal gi ɔɔ baatɔ hi nɔɔtɔ gi ɔks hi nistɔ, hi eer sɛw hi wɛɛ muul gbunu.

32Gi midig dɔgl dubt gbɔɔl yɔ doo hi mɛɛ gɛ giya. Mi dɔk hinyɔ gi seek Kristu hi fɔkɔya wɔ ɔksilya̧ giya. 33Hinyɔ wagɔ bɛr an bɔ sɛw gi ha̧a̧ge a nistɔ muulɛ an zulɔ, nis be, yɛgi ɗɔbs waltɔ.

Currently Selected:

EFESU 5: NTD

Highlight

Copy

Compare