KOLOSIYA 4
4
KOLOSIYA 4
1Nɛɛ ɗɛntɛ wɛ, kaŋkin gbaarɛ nɛ wɔ rɔbtɔnɔ anyɔ bɛrɔ. Bɔnɛ zɛnɔ, nɛɛ hɛw nɛ gin ɗɛnt nɛ a bɛtha be. 2Waan Bɛt zɔ̧k hi tɛŋko, bɔnɛ mɔɔ baanukɔ. 3Wɛɛn nɛ zɔ̧bsiw Bɛt hɛw, an Bɛt gi kpɛ̧rsiw gbɔnɔ a dɔglɔ bɔ gi gbaŋgi an wi dɔks dood dɔgl dubt bɔ hi mɛ̄ɛ̄ nɛ gɛ yɔ gi Kristu dɔgl ɔnɛ. Mi gi hɛdi a luknɔ du a Bɛtdɔgl dɔk dɔŋgo. 4Nɛ zɔ̧bsim Bɛto an gi ɗaasimi an mi wads dood Bɛtdɔglɔ dubt bɔ rɔbtɔnɔ anyɔ rii. 5Yɔ nɛ gi ɛmbik a dood wɔ hi mɛɛ Waar Yeesu gɛ hi teesdu, oon zul nɛ rɔbtɔnɔ. A ɔ̧tyɔ Bɛt gɔ gi gaan gbɔnɔ an nɛ zuun ɗɔbsig nɛ gedu, bɔnɛ ɔɔ hinɔ gi waginɛ.
6Waan dɔgl nɛ book hi ya̧a̧hɛmnti, hi Bɛt hoobo an manda yɔ gɔ hi yaak bis du, an nɛ mɛɛ dood hin-ɛrkya̧ wɔ ta̧a̧kɔ bɛttɔnɔ. 7Tikikus gi fɔksin dɔgl mi sɛw. Gii gi saam wɛ rɔb a Bɛt gbɔnɔ du, gi Bɛtwoosya yɔ rii an hi gbaa kpoos a ge, gi wook Bɛt woosɔ hi tɛŋko hi miya. 8Ya̧a̧ gii mi gig yaazig a nɛɛge an gi fɔksin dɔgl mi bɛttɔnɔ, gi wɛɛ gi ɓatsin kpoos nɛ.
9Mi gig yaak hi Onɛsimus hɛw. Gi doo nɛɛnɛ, gi saam wɛ rɔb a Bɛt gbɔnɔ du, yɔ rii an hi gbaa kpoos a ge. Hi eerɛ hi fɔksin hinyɔ gi daak hɛdi sɛw. 10Àristarkus yɔ gi a luknɔ du hi miya, raa a mi boon du. Barnabas fabtɔ Markus raa a mi boon du hɛw. Nɛ́ nɛ dag ya̧a̧ a gi zul da̧a̧da̧ ma mi? Gi zaa a nɛɛge, nɛ dagig bɛttɔnɔ.
11Yeesu yɔ nuŋgɔ zaa a Yustus raa a mi boon du sɛw. Hi taarɛ hi wootingo Bɛt wáát woos hi miya. Hi sɛw hi gi Yahuduyaadɛyɔ. Hi ɗaasim gbɔɔltɔnɔ. Yahuduya zaadɛ wɔ hi ɗaasim a Bɛt woos du, hi taaro. 12Epafaras raa a mi boon du. Nɛ mɛɛ a gi doo nɛnɛ hɛw, wɛɛ gi Yeesu Kristu woosɔyayɔ. Gɔ gisin Bɛt zɔ̧k hi tɛŋko, zɛnin gɛ zaŋ, an Bɛt gi ɗaasinɛ nɛ ram gi da̧a̧ a gi dɔgl du an nɛ er bɛttɔnɔ a Bɛt gbɔnɔ du, nɛ wɛɛ nɛ mɛɛ hinyɔ Bɛt ha̧a̧g sɛw rɔbtɔnɔ hi kpoos nɛ sɛw. 13Mii mi gbɛn woosɔ gbɔɔl gi ɔ̧ɔ̧sig a nɛ dɔŋgo, hi dood wɔ hi gi a Lawdikiya hi a Hirapolis hi dɔŋgo. Yɔ mi gbɛn woosɔ hi lɔl mi gii mi ɗɛɛ dɔglɔ bookɔ.
14Saam wɛ rɔb Luka yɔ gi dokta bɔ hi Deemas sɛw hi raa a mi boon du. 15Nɛ boo yɛ̧ɛ̧dɛ Yeesu fɔkya wɔ a Lawdikiya du, hi zaa hi nis bɔ Nimafa hi dood Yeesu fɔkya wɔ gɔ hi gi mɔksig a gi raa du. 16Gɔ nɛ zaŋg ɗɛɛrwol yɛrɛ gi da̧a̧, nɛ yaa ɗɛɛrwol bɔ a dood Yeesu fɔkya wɔ a Lawdikiya hii an hi zaŋgin hɔ hɛw. Nɛ wɛɛ nɛ zaŋg ɗɛɛrwol bɔ mi da mi bi̧i̧s dood Lawdikiya wɔ.
17Nɛ raa Arkibus a ri ya, nɛ raag a gi da̧a̧s woos bɔ Waar wɛ Yeesu da gaag an gi woo. 18Mii bi̧i̧ dɔgl yɔ̧ɔ̧sum wɛrɛ hi zul mi: Mii Pol , mi boonɛ. Bɔnɛ zɛn a mi gi a luknɔ du. An Bɛt gɛmsilɔ gigi hi nɛya! Aanbɔ!
Currently Selected:
KOLOSIYA 4: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.