KOLOSIYA 3
3
KOLOSIYA 3
1Nɛ mɛɛ a yɔ Bɛt ɗuns Kristu gi dɔɔnig bɛtha, ɗuns nɛɛ hɛw. Yɔ gi anbɔ, ɗɔkinnɛ hinwɔ hi gi a bɛtha, a lɛlyɔ Kristu gi ɗɔɔtig a Bɛt naanrɔb ge. 2Mɔkin hinwɔ hi gi a bɛtha, bɔnɛ mɔk waal dɔglɛ. 3Nɛ mɛɛ a nɛ wɔɔrɔ, za̧a̧tig nɛ bɔ yaat ɔksi hi Kristu a Bɛt ge. 4Kristu yɔ gi za̧a̧tig nɛ gɔ gi midzɔ, nɛɛ hɛw nɛ mid a gi gbɔlums du, nɛ gɛ̧ɛ̧ gbɔlums bɔ hi giya.
5Yɛrɛ gbɔn waal ɗɔkum wɔ hi gi nɛ kpoos du zaŋ: an mansi, ɓi̧i̧limi, zɛlko, ɗɔkum ha̧a̧lɛ, zaabe rɔɔs ɗɔkumi (gbunɔ gii hi loorɛkpɔɔki). Seen hin wɔrɔ sɛw an hi wɔr da̧a̧da̧ nɛ kpoos du. 6Bɛt nɔɔtigɔ gı̄ lɛb dood wɔ hi inige a ɗɔkum ha̧a̧lya̧ wɛrɛ hi dɔŋgo. 7Amntɔnɔ, nɛ da nɛ waanik ɗɔkum ha̧a̧l wɔrɔ hɛw yɔ nɛ da nɛ ɛmbik nɛ a hinha̧a̧l du. 8Yɛrɛ ɔɔn hinha̧a̧l wɔ sɛw: an nɔɔtigi, ka̧a̧si, kpoos ha̧a̧lɛ, mɛlɛ, ya̧a̧ha̧a̧lɛ; bɔhi kɛm hin anbɔ a nɛ ya̧a̧du.
9Bɔnɛ gɔ̧ɔ̧tinya̧a̧. Nɛ bis mɔkil nɛ amntɛ wɔ hi woosya̧ wɔ hi gi a nɛ kpoos du anyɔ gɔ hi bisig gbandil haŋsili. 10Nɛ wɛɛ nɛ dag mɔkil segdɛ nɛ hegɔ an kpoos nɛ gi wɛɛ sego. Bɛt gisin kpoos nɛ gɛbsugo an nɛ mɛɛ Kiŋkya nɛ bɔ bɛttɔnɔ nɛ riitin hi giya. 11Yɔ anbɔ, hinza taa an gi gɛ̧ɛ̧ Yahuduyaadɛ hi dood zaadɛ dɔɔmɛ wɔ hi taa Yahudu-yaadɛ, hinza taa an gi gɛ̧ɛ̧ dɔmbɛ hi kpaarɛ, taa an gi gɛ̧ɛ̧ dood wɔ hi mɛɛhin gɛ hi dood hɛtumyaadɛ, taa an gi gɛ̧ɛ̧ doodɛ hi namɔ. Kristu gii gi hin sɛw a hinyɔ gi duge sɛw.
12Nɛ mɛɛ a nɛ gi Bɛt doodɔ gaatɛ. Bɛt herinɛ wɛɛ ha̧a̧g a nɛ muulɛ. Yɔ anbɔ gi an nɛ heks kpoos nɛ hinrɔbɛ an dimnaanɛ: an ya̧a̧rmɛɛki, hinrɔbwooki, zultiisigi, zulhɔniki, hi hinmɔŋki. 13Mɔmtinnɛ hinɛ, doo za gi woos naaza hin-a̧a̧bi, bɔ be gi bits naaza ɔnɛ be. Waar wɛ Yeesu Kristu hi kpoosɔ rɔbo bitsin hinha̧a̧l nɛ da̧a̧da̧, yɔ anbɔ gi an bɔ be gi bits naaza hinha̧a̧lɔ hi kpoos rɔb be. 14Wɛɛn nɛ heg Bɛt hatɔ an hi̧i̧l seedu a hin wɛrɛ sɛw hage. Bɛt hatɔ gii gi baks hinyɔ gi sɛw rɔbtɔnɔ gi da̧a̧.
15Ɔɔn Kristu boolumɔ gi wɛɛ waar nɛ kpoos du gi kam mɔkil nɛ an nɛ her gbɔnɔ wɔ hi gi rɔbɛ, anyɔ Bɛt elin nɛ sɛw an nɛ ɔks nɛ wɛɛ muul gbunu, nɛ bool bɛttɔnɔ. Waan Bɛt baaniki. 16Ɔɔn Kristu dɔglɔ gi hi̧i̧s nɛ kpoos du. Goktinnɛ Bɛtdɔglɛ, ɗaatinnɛ hi hinmɛɛk dubt yɔ gi sɛw gogtingo hi zul-ooki. Waan nɛ ɛɛhin zaadɛ sɔmsɔm hi hato: an hin-ɛɛn wɔ Bɛt ɗɛɛrwol du, hi Yeesu fɔkya wɔ hin-ɛɛnya̧ wɔ gɔ hi ɛɛko, hi hinyɔ Bɛt Mɔkilɔ gɔ gaazɛ kpoos du an wɛ ɛɛs Bɛto. Gɔ nɛ ɛɛkhin anbɔ, waan Bɛt baanik nɛ kpoos du be.
17Woos nɛ wɔ nɛ wook sɛw, zaabe dɔgl nɛ wɔ nɛ book sɛw, woon hinɔ sɛw, boon hinɔ sɛw a Waar wɛ Yeesu nuŋg du an fɔkɔyaadɛ rɔbɛ, nɛ́ wɛɛ nɛ́ baanik Baa wɛ Bɛt a Yeesu dɔŋgo. 18Nɛɛd wɛ, tiisin zul nɛ a walɛ nɛ hi dɔŋdi, anyɔ hinɔ riis Waar wɛ Yeesu ɗɔbsigyaadɛ ɔ̧ɔ̧. 19Nɛɛ walɛ wɛ be, yɛgi ha̧a̧n a nɛɛd nɛ hi muulɛ, bɔnɛ gbaanihi. 20Nɛɛ ya̧a̧mwaat wɛ be, laksin baa nɛ hi nàa nɛ hii tɔn bɛttɔnɔ a hinyɔ gi gedu sɛw. Hin bɔ lab gii gɔ har Waar wɛ Yeesu. 21Nɛɛ baa wɛ be, bɔnɛ waa waat nɛ hii niik an bɔhi waan haatili.
22Gbaarɛ wɛ nɛɛ be, laksin ɗɛntɛ nɛ wɔ a waal du tɔn bɛttɔnɔ a hinyɔ gi duge sɛw, bɔnɛ ta̧a̧ dɔglya̧ a hi lɔlgbar kpɔd hi an nɛ bɛs doodɛ. Yɔ hoob gin ha̧a̧k Waar Bɛto, gi an nɛ ta̧a̧hi hi kpoos rɔbo. 23An nɔ woosɔ, woon hi kpoos rɔb an nɛ woosig Waar wɛ Yeesu ɔ̧ɔ̧nɛ, an nɛ taa woosig dood ya̧nɛ. 24Ɗɛnt nɛ rɔb bɔ nɛ gisig wooswooko: gɛ Waar wɛ Kristu. Mɔkinɛ, nɛ mɛɛ a Waar Yeesu Kristu gii gi gaanɛ rɔɔs nɛ yɔ gi gbaasig doodɔ a bɛtha an dɔɔrɔɔs nɛ. 25Bɛt gɔ sɔ̧̄ɔ̧̄ doo muut gɛ. Za̧a̧nyɔ gi wook hin-a̧a̧bi, an bɔ nɛ ɓɛ, Bɛt gi gbaasig dɔglɛ an hin-a̧a̧b yɔ woo nɛ be.
Currently Selected:
KOLOSIYA 3: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.