2 TIMƆTE 2

1Mɔya, waa mi walɔ, dagum tɛŋk a gɛmsil yɔ mɔ dag a mɔ ɔksig du hi Yeesu Kristu. 2Hinyɔ mɔ kɛm mi dɔk a segyaadɛ kittɔnɔ hi muut du, gaam dood wɔ hi rii an mɔ gaahi dɔgl bɔ naan du, dood wɔ gɔ hi ɗɛɛs dood zaadɛ hinɔ gok ɓɛ. 3Mɔm ya̧a̧rhant bɔ mɔnɛ an Yeesu Kristu laaya ɔ̧ɔ̧ rɔbo. 4Laaya za taa an gi zɛks zulɔ hi dɔgl wɔ hi seeg gɛ; ya̧a̧nɛ, ha̧a̧g an za̧a̧nyɔ elig nɛko gi ta̧a̧g an doo rɔbo.

5Yɔ anbɔ doo tɛŋkgookya gi gōō tɛŋkɔ anyɔ hi raa nɛ gɛ, gigi gook ɔnɛ bɔ sɔm, ɗɛ̄ɛ̄ an gi dag ɗɛɛtɔ dɔɔrɔɔs gɛ. 6Gi an hinbalkya yɔ gi wookwoos ɓaatili, gii gi dag hinyɔ ram a bak du ɔnɛ doosi. 7Mɔkum hinyɔ mi dɔk bɛttɔnɔ. Ya̧a̧nɛ, Waar Yeesu gi gaam tɛŋk yɔ gɔ mɔ kɛmn hin sɛw. 8Mɔkum mɔ mɛɛ Yeesu Kristu yɔ rɛml a wɔrkɛ teesdu, za̧a̧nyɔ fu̧u̧ a Dawda dɔ̧ɔ̧t du anyɔ Dɔgl Rɔb bɔ mi dɔk gi raako.

9A Dɔgl Rɔb bɔ gi dɔŋg ro, mi ya̧a̧rha̧a̧ko, gi tuur an hi wɔ̀m hi ba̧a̧ntus an mi gi hinbɔbtin wookyayɔ. Yɔ anbɔ, hi wɔ̄b Bɛtdɔgl ɔnɛ hi ba̧a̧ntus gɛ. 10Hinɔ gii mi mɔŋk hin sɛw a dood wɔ Bɛt sɛ̧ɛ̧hi hi dɔŋgo, an hii hɛw hi dag kolya̧ za̧a̧sig anyɔ hi ɔks hi Yeesu Kristu hi gbɔlums yɔ gɔ gi waa faa gedu.

11Dɔgl rɔbɛ wɔ gɔ hi ta̧a̧ gɛrɛ, a gid wɛ wɔr hi giya, wɛ wɛɛ wɛ za̧a̧ lɛlgbunu hi giya. 12Gid wɛ mɔm ya̧a̧rhant wɔ, wɛ wɛɛ waar lɛlgbun hi giya. Gid wɛ faa a be mɛɛg gɛ, gii gi faa a be mɛɛwɛ gɛ be. 13Gid ya̧a̧luur gi a wɛɛ, gii ɔnɛ waa doo rɔbo, ya̧a̧luur taa a ge. Ya̧a̧nɛ, ɗɛ̄ɛ̄ an gi faa zulɔ gɛ.

14Raasum Yeesu ɗɔbsigya wɔ hin yɛrɛ an hi mɔk hi mɛɛ hinɔ, wɛɛm mɔ dɔgsihi a Bɛt muutdu a bɔhi gbaatin a dɔgl dɔŋgo. Gbaat gɔ ɗāā hinza gɛ, gɔ ha̧tir dood wɔ hi lak Bɛt dɔglɔ ha̧tiro. 15Kɛɛm hi tɛŋko an mɔ es zul mɔ a Bɛt muutdu an doo yɔ Bɛt ta̧a̧ge, an doo woosya yɔ taan seemɛ, an doo yɔ gi dɔk Bɛt dɔglɔ rɔb hi gbɔnɔ. 16Yɛrɛ nɔɔm dɔgl tɔs wɔ gi a̧a̧nik ɗɔbsigi. Dood wɔ hi fɔk dɔgl wɔrɔ hi hɛmlik Bɛt hɛmluko hɛmluko.

17Hinwɔ hi dɔksig doodɛ gi an nɔknɔɔ yɔ gɔ gi muul tɔbruko. Himɛnɛyus hi Filetus hi gi wɔrɔ hi tees du. 18Hiya hi ɔɔ rɔb gbɔnɔ hi ha̧tirgo dood zaadɛ an bɔhi ɗɔbs Bɛto, hi raako a rɛmtig wɛ wooy da̧a̧da̧ ma. 19Yɛrɛ Bɛt gbaa dɔgl bɔ sɛŋkɔ wa̧a̧y bɛttɔnɔ. Hinɔ hi bi̧i̧ a sɛŋk bɔ hage gɛrɛ: a Waar Bɛt mɛɛ dood wɔ hi gi ɔnɛ, wɛɛ an za̧a̧nyɔ gi elk Waar Yeesu nuŋgɔ a Waar i gi ɔɔ hinbɔbtin wɔ wookɔ.

20A raa za gbɔɔl du, wɔd rɔbɛ wɔ hi wɔ̧mn hɛɛlmɔto hi tus buu hii taa kpɔd, wɔd tɛ̧ɛ̧hɛɛk wɔ, hi wɔ̄ŋk wɔ, hi dak wɔ hi gi hɛw. Wɔd zaadɛ wɔ hi gi hin ɗɔbtɛ an hi woon woos rɔbo, zaadɛ be hi gi an hi woon hin sɛw a raadu. 21Doo za gi gaas mɔkilɔ a hinyɔ bɛr gɛ gedu sɛw, gi wɛɛ wɔd hin woonikya rɔbo, gii gi ɗɛntɔ zul gi gbunu, ɗɛntɔ bɔ gi ɗɛɛg hin woonik bɛttɔnɔ, gi gi di bed an ɗɛntɔ gi looge gi woonig woos rɔbɛ wɔ hi gi sɛw.

22Nɔɔm sɛrums ɗɔkum wɔ, tɛm woos riiti, ɗɔbsigi, hi Bɛt hato, hi boolumi mɔ ɔks gbunu hi dood wɔ hi elk Waar Yeesu nuŋgɔ hi kpoosya̧ gaati. 23Inum hinfaltingo tɔs wɔ hi yooya̧a̧, mɔ mɛɛ a hin wɔrɔ sɛw hi gabs kamzugo. 24Yɔ anbɔ, bɛ̄r an Waar Bɛt woosɔya gi gbaatin hi doo gɛ, wɛɛg doo kpoos rɔbya a dood gbaŋg sɛw. Gi ɗɛɛ hingoki, doo hinmɔŋkya.

25Kaŋkig dood wɔ hi ɓaasig zulya̧ a gi gbaŋgi hi zulhɔniki, kinsa Bɛt gi gaahi mɔkil za an hi zɛmr kpoosya̧, gɔ gi anbɔ, hi ɗɛɛ an hi mɛɛ rɔbo, 26an hi wir a loorɛha̧a̧l ɓoos du. Gii wa̧a̧hi an hi fɔb hinyɔ ha̧a̧ge.

Currently Selected:

2 TIMƆTE 2: NTD

Highlight

Copy

Compare