2 TIMƆTE 1

2 TIMƆTE Ɗɛɛrwol eesim yɔ Pol bi̧i̧s Timɔte 2 TIMƆTE 1

1Mii Pol , Yeesu Kristu tɔmsɔya anyɔ ha̧a̧ Bɛto, mii bi̧i̧ ɗɛɛrwol yɛrɛ. Bɛt wɛɛnim tɔmsya a za̧a̧tig yɔ raa bé gaa dood wɔ hi waak ɔksig gbunu hi Yeesu Kristu dɔŋgɔ ge. 2Mi yaasig waa mi rɔb bɔ Timɔte yɔ ha̧a̧m a ge gii ɗɛɛrwoli. An Baa wɛ Bɛto hi Waar wɛ Yeesu Kristu hi gààmɔ gɛmsili hi ya̧a̧rmɛɛki hi boolumi! 3Gɔ mi gim waak mɔkig a mi zɔ̧k du, mi gi baanik Bɛt yɔ mi gisig wooswook hi kpoos-esigi anyɔ baa mi hi woo nɛko. 4Gɔ mi mɔk mi mɛɛk mɛ̄ɛ̄k mɔ wɔ, wɛɛ yɛms du hi lurk du sɛw gim ha̧a̧sig an mi gbɛnumɔ, an kpoos mi gi dag hat gbɔɔltɔnɔ gi daarlɛlɛ.

5Gɔ mi mɔk mi mɛɛk ɗɔbsig mɔ rɔb bɔ. Ɗɔbsig yɔ yāā mɔ Loyis hi nàà mɔ Ewnike hi dag nɛ gi dordi. Mi mɛɛ rɔbtɔnɔ a gi ɗɔɔtig mɔ kpoos du ɓɔri hɛw. 6Ya̧a̧nɛ, yɔ mi gbaasum naan zulha, mi gisum dɔk an mɔ mɛks a mɔ́ wa̧a̧ gaas yɔ Bɛt gaam bɛttɔnɔ mɔ́ woon hin hi tɛŋko. 7Bɛt gāāwɛ Mɔkilɔ an gi gaawɛ hoob gɛ, giwɛ gaak tɛŋko, hi ha̧a̧tigi hi zulhɔniki.

8Bɔ seem gi ha̧a̧m Waar wɛ Yeesu dɔglɔ booko, zaabe mii yɔ mi gi luknɔya a gi nuŋg dɔŋgo. Yɛrɛ yɔ̧m ya̧a̧rhant bɔ mɔnɛ a Dɔgl Rɔb bɔ gi dɔŋgo hi tɛŋk yɔ Bɛt gim gaako. 9Gii za̧a̧sɛ, gii wɛɛ gi elɛ an wɛ wɛɛ doodɔ waabil gaatyaadɛ. Bɔ lab taa a woos wɛ rɔbɛ wɔ hi dɔŋgo, gi a ha̧a̧tigɔ hi gɛmsilɔ dɔŋgo. Gaawɛ gɛmsilɔ a Yeesu Kristu naan du yɔ waal yɛɛlid nɛ ket gɛ. 10Yɛrɛ àgiyɔ, hinɔ mid hi Yeesu Kristu Za̧a̧sigya wɛ zaakɔ bɔ giya. Gii ha̧s wɔrk tɛŋko, wɛɛ gaawɛ Dɔglɔ Rɔb bɔ mitsɛ za̧a̧tig hi waak bɔ wɛlɛ hi wɛlɛ.

11Bɛt yaam an dɔgldɔkya, an tɔmsya, hi an hingokya an mi dɔg Dɔgl Rɔb yɛrɛ. 12Ya̧a̧ giya, mi gi ya̧a̧r wɛrɛ yɔ̧ko, wɛɛ hin wɛrɛ hi taam seemha̧a̧nik be. Ya̧a̧nɛ, mi mɛɛ za̧a̧nyɔ mi ɗɔbsige mi wɛɛ mi mɛɛ bɛttɔnɔ a gin tɛŋk an gi oo hinyɔ gaam naan du gi tuur a dɔgl-gbaak ɔ̧ti. 13Wa̧a̧m hingok gaat bɔ mɔ kɛm a mi ya̧a̧ du, gi wɛɛsum hinyɔ gɔ mɔ fɔbɔ, mɔ́ goks dood hin anbɔ be a ɗɔbsig du hi hat yɔ wɛ gin ɔksi hi Yeesu Kristu. Ɗɔbsig bɔrɔ hi hat bɔrɔ hi fu̧u̧z a ɔksig wɛ bɔ gedu hi Yeesu Kristu. 14Oom hingok rɔbɛ wɔ Bɛt gaamɔ naan du hi Mɔkilɔ tɛŋkɔ yɔ gi waak a wɛ kpoos du.

15Anyɔ mɔ mɛɛ, dood wɔ hi gi a Aaziya hɛbt du sɛw hi ɔɔm-ɔɔ. Fegelus hi Hermɔzanɛs hi gi wɔrɔ hi teesdu hɛw. 16Onɛsifɔrus gaam tɛŋk dɔɔ kittɔnɔ, wɛɛ seem hā̧a̧g mii yɔ mi gi luknɔ du gɛ. An Waar Bɛt gi mɛɛs raatɔ ya̧a̧rɛ. 17Yɔ tuur a Roma, yɛ̀ɛ̀lum ɓɛɛk hi ha̧a̧tig gbɔɔltɔnɔ wɛɛ da zɛ̧mi. 18An Waar Yeesu gi woo an gi dag ya̧a̧rmɛɛk a ge a dɔgl-gbaak-ɔ̧ti. Woosumwoos gbɔɔltɔnɔ a Efesu, mɔɔ mɔ mɛɛ dɔglɔ bɛttɔnɔ hɛw.

Currently Selected:

2 TIMƆTE 1: NTD

Highlight

Copy

Compare