1 TESALONIKI 5
5
1 TESALONIKI 5
1Yɛ̧ɛ̧dɛ mi wɛ, an hinyɔ gi seek lɛlyɔ gɔ gi rii hi ɔ̧tyɔ hin wɔrɔ gɔ hi tuur gedu, hā̧a̧n an doo gi bi̧i̧sin dɔgl za ha gɛ. 2Ya̧a̧nɛ nɛɛ hi zul nɛ nɛ mɛɛ bɛttɔnɔ a Waar Yeesu ɔ̧tɔ gi zaa a dood zulha an luur yɔ gɔ zaa a yɛms du. 3Dood gɔ hi raako a boolum giro, hinza ɗɛɛ an gi gɔwɛ gɛ, gɔ gi anbɔ ro ya̧a̧rhant gi ɛ̧b ɓɔrbɔ a hi zulha, hi taa wirko; gigi an waagulk kosgumn gi zɛŋk budaa. 4Yɛrɛ nɛya, yɛ̧ɛ̧dɛ mi wɛ, nɛ taa a lɛlwil du an ɔ̧t bɔrɔ gi dumrin an luuri.
5Nɛ sɛw nɛ gi dood lɛlgaalyaadɛ, nɛ gi dood lurkyaadɛ. Wɛ taa yɛmsyaadɛ, wɛ taa lɛlwilyaadɛ. 6Yɔ anbɔ, bɔwɛ yo an dood zaadɛ, yɛwɛ kɔm lɔlɛ, wɛ wa̧a̧ zul wɛ. 7Dood yoomyaadɛ be gɔ hi yok a yɛ̧ms du, wɛɛ dood bumwɔnikyaadɛ be gɔ hi wɔnik a yɛms du be. 8Yɛrɛ wɛɛ wɛ gi dood lurkyaadɛyɔ, yɔ anbɔ, yɛwɛ wa̧a̧ zul wɛ. Yɛwɛ heg ɗɔbsig hi hat an gabs gbandil tusya a muulɛ, hi za̧a̧tig mɔkili an danɛkutin tusɛ.
9Ya̧a̧nɛ Bɛt gbāāwɛ an wɛ kɛm ya̧a̧rhant a gi nɔɔtig du gɛ, yɛrɛ gbaawɛ an wɛ dag za̧a̧tig a Waar wɛ Yeesu Kristu naan du. 10Yeesu Kristu wɔr a wɛ zulɛ. Ya̧a̧ giya, an wɛ kɔm za̧a̧tili, zaabe wɛ wɔrɔ, hinza gɛ, wɛ́ za̧a̧za̧ hi gii ma ɔ̧nɛ. 11Yɛrɛ gaatinnɛ tɛŋko, ɗaatinnɛ anyɔ nɛ gɔk ɓɔryɔ. 12Nɛɛ yɛ̧ɛ̧dɛ mi wɛ, wi zɔ̧nɛ, ɗɔbsin dood wɔ hi wookwoos hi tɛŋk a nɛ teesdu, dood wɔ hi gi wooszulyaadɛ a nɛ teesdu, wɔ Waar Yeesu gaahi woos hi gisin hingok an nɛ oo zul nɛ.
13Zunsinɛhi ha̧a̧tig gbɔɔl hi hato a woos yɔ hi wook gi dɔŋgo, waan a boolum du. 14Wi zɔ̧nɛ hi ya̧a̧hɛmnti, yɛ̧ɛ̧dɛ mi wɛ, raasin dood namrɛ wɔ hin an hi oo zulya̧, ɓatsin hoobɛ wɔ kpoosɛ, ɗaasin hɛ̧ɛ̧rɛ wɔ, mɔmsinɛhi hin hi sɛw. 15Oon zul nɛ an bɔ doo za gi wɛɛn ha̧a̧l yɔ hi gɔsige, yɛrɛ waan nɛ tɛb an nɛ wootin rɔb a nɛ teesdu, nɛ wɛɛ nɛ woos dood rɔb sɛw.
16Waan hat daki. 17Waan Bɛt zɔ̧ki. 18Baanin Bɛt a hinyɔ tursin gedu sɛw. Hinyɔ Bɛt ha̧a̧g an nɛ woo a ɔksil nɛ bɔ gedu hi Yeesu Kristu giibɔ. 19Bɔnɛ ans Bɛt Mɔkilɔ woosɔ. 20Doo gi kɛm Bɛt ya̧a̧ɔ gi dɔg hin hi Bɛt Mɔkilɔ, bɔnɛ bɔ̧ɔ̧ dɔglɔ bɔ nɛ see an dɔgl tɔsyayɔ. 21Goon hin sɛw, wa̧a̧n hinyɔ bɛrɔ, 22hɛmlin hi ha̧a̧l yɔ gi sɛw. 23An Bɛt hi zulɔ gi gaak boolumi gi wɛɛnin dood gaatɛ gi da̧a̧, gi oo mɔkil nɛ, kol nɛ, hi muul nɛ, nɛ gi dood gaatɛ a ɔ̧tyɔ Waar wɛ Yeesu Kristu gɔ gi zaa gedu.
24Bɛt yɔ gin elko gi doo rɔbo, gi woo hinɔ. Ya̧a̧nɛ hinyɔ dɔg sɛw gi wooko, ya̧a̧luur hinɔ taa a ge. 25Nɛɛ yɛ̧ɛ̧dɛ mi wɛ, zɔ̧bsinwi Bɛto. 26Boon yɛ̧ɛ̧dɛ mi Yeesu fɔkya wɔ hi yɛ̧ɛ̧dums hato. 27Mi gin raak hi tɛŋko hi Waar Yeesu nuŋgɔ an nɛ zaŋgs yɛ̧ɛ̧dɛ Yeesu fɔkya wɔ hi gi sɛw ɗɛɛrwol yɛrɛ. 28An Waar wɛ Yeesu Kristu gɛmsilɔ gigi hi nɛya! Aanbɔ!
Currently Selected:
1 TESALONIKI 5: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.