MATTHIEU 8

Jesu kpasa ŋma wi-doko

(Zɔk Mk 1.40-45; Lk 5.12-16)

1Jesu zira nɛ̀ zu kaya ɓɛɛ gba giiwi nɛ́ ɗoŋ-aa. 2Nɛ́ mɔ'ɔ nɛ̀ ŋma wi-doko tɛ̀ɛ̀ gbɛ́ zugur nù ti a̧, ɓɛɛ tɔ̧: «Gasa Wan, k’ɛ̀nɛ̀ nɛ́ kɔ̧a̧, ɛ́nɛ́ nyɛma mɛ de ha̧ tɛ‘m mɛ sa̧.» 3Jesu nyɛi̧a er, tam tɛ-a, ɓɛɛ tɔ̧: «Mi kɔ̧a̧, tɛ-mɛ a̧ sá̧.» Ɓɛɛ nɛ́ tɛ́ kale ŋgimbi'i à̧ tɛ-a sa̧a̧ tɛ doko'i. 4Nɛ́ mɔ'ɔ nɛ̀ Jesu tɔ̧ɔ̧ ha̧ a̧: «Mɛ̀ zìì, ká mɛ́ tɔ̧́ wen mɔ'ɔ ha̧ ŋma bíí na. Mɛ̀ nɛ́ɛ̀ úsí tɛ-mɛ ha̧ wi-ɗafi-sɔ̧, ɓɛɛ mɛ̀ há̧ mɔɔ-ɗafi-sɔ̧ hee mɔ'ɔ nɛ̀ Moisɛ bàá tɔ̧̀ so ga; mɔ‘i tɛ duk nɛ́ mɔɔ-sedaako yí bíí.»#Lev 14.1-32

Jesu kpasa wi-de-tom ko ŋma wi-duk-zu o wi-biro gɔmŋmaa

(Zɔk Lk 7.1-10)

5Ŋgimbi nɛ Jesu a̧a̧ tɛ̀ yéé saaye Kafarnaum, ŋma wi-duk-zu o wi-biro gɔmŋmaa tɛ̀ɛ̀ tɛ a̧, ɓɛɛ ai nú ha̧ a̧ hee mɔ'ɔ ga: 6«Gasa Wan, wi-de-tom kɔ‘m ɔ nɛ́ nù tɛ̀ kɔ‘m. Nɛ́ zɛɛ gbuluɓutu á̧ kara a̧ pi̧ nù, a̧ zɔk nɛ́ bɔnɛ nyɛmna.» 7Ɓɛɛ Jesu tɔ̧ ha̧ a̧: «Mi tɛ nɛ̀ɛ́ kpasi a̧.» 8Ɓɛɛ gasa wi-duk-zu o wi-biro'i kifi nú ha̧ a̧: «Gasa Wan, mi nyɛm h’ɛ́nɛ́ mɛ ye kɔ̧́ tua kɔ‘m na. Ɛ̀nɛ̀ tɔ̧́ nɛ́ wen mɛ nú‘nɛ́ kpɔk, ɓɛɛ wi-de-tom kɔ‘m tɛ kpasi. 9Mi mbɛt, wi-duk-zu'm a̧a̧ sɛnɛ, ɓɛɛ mi a̧a̧ nɛ̀ o wi-biro n'am duk zu wa. Kà‘m tɔ̧́ ha̧ ŋma kpɔk'e: ‹Mɛ̀ nɛ́!› ɓɛɛ a̧ nɛa. Kà‘m tɔ̧́ ha̧ ŋma woyo'e: ‹Mɛ̀ tɛ́!› ɓɛɛ a̧ tɛa. Kà‘m tɔ̧́ ha̧ bara kɔ‘m'e: ‹Mɛ̀ dé mɔ'ɔ!› ɓɛɛ a̧ dee mɔ‘i.» 10Ŋgimbi nɛ̀ Jesu zia wen'i, a̧ yeŋa wi’ɛi, ɓɛɛ a̧ tɔ̧ ha̧ o bíí nɛ̀ tɛ̀ɛ̀ in a̧: «Nɛ́ kpasawen a̧‘m tɔ̧ h’ɛ́nɛ́, mi tɛ kpa pɛrti kɔ̧ɔ̧ɗɔɔwen hegɔ tɛ ŋma bíí sɛn Israɛl nɛti na. 11Hegɔ mi tɔ̧ h’ɛ́nɛ́, o bíí nɛ̀ dɔka-a tɛ tɛ̀ nɛ̀ daŋa-wese in nɛ̀ yee-wese, ɓɛɛ wa tɛ ya nù mɛ nyɔŋ mɔ in Abraham in Izak ká bá nɛ̀ Jakob tɛ Wan mɛ yiwese.#Lk 13.29 12Ɓɛɛ wa tɛ kai o bíí nɛ̀ tɛ̀ɛ́ ye so tɛ Wan mɛ yiwese á zan ti tum; fara'i nɛ́ fara-hi̧i̧-kɔ̧a̧ in fara-gɔfi-mɔ.»#Mt 22.13; 25.30; Lk 13.28 13Ɓɛɛ Jesu tɔ̧ ha̧ gasawi'i: «Mɛ̀ sí ɗoŋ tɛ̀ kɔ-mɛ; mɔ tɛ́ de ha̧ mɛ hee mɔ'ɔ nɛ̀ mɛ taa ga.» Ɓɛɛ wi-de-tom kɔ̧-a̧ kpasi tɛ kale ŋgimbi'i.

Jesu kpasa o wi-zɛɛ

(Zɔk Mk 1.29-34; Lk 4.38-41)

14Hee mɔ'ɔ nɛ̀ Jesu yee kɔ̧́ tua ko Pierre ga, a̧ zɔka for Pierre mɛ́ kóò fara ɔɔ nù wen tɛ-a ba nɛ́ wee. 15Jesu tama er-a ɓɛɛ zɛɛ kɔ̧-a̧ kaɗi; nɛ́ mɔ'ɔ n'aa kura, ɓɛɛ a̧ ku̧ naŋ dee tom ha̧ Jesu.

16Mɛ́ ga̧a̧mɔ‘i wa mgbɔɔ o bíí nɛ̀ dɔka-a nɛ̀ ɗaŋ-sɔ̧ a̧a̧ tɛ-wa tɛnɛ ha̧ Jesu. A̧ ndaka o ɗaŋ-sɔ̧ nɛ̀ géé wen mɛ nú-a, ɓɛɛ a̧ kpasi o wi-zɛɛ lɛŋ. 17A̧ dee hegɔ ha̧ wen nɛ̀ wi-tɔ̧-wen oi nú Sɔ̧ Esaii tɔ̧ɔ̧ so mɛ hɔ gba̧a̧:

«Nɛ́ à̧ á̧ baa kúm k’ɛ́ɛ́ yinɛ,

ɓɛɛ a̧ ba zɛɛ k’ɛ́ɛ́ e tɛ a̧.»#Es 53.4

Nɛ́ɛ́ ɗoŋ Jesu

(Zɔk Lk 9.57-62)

18Jesu zɔka giiwi katɛ, ɓɛɛ a̧ tɔ̧ ha̧ o ŋgaiwi kɔ̧-a̧ mɛ ku yì si kur mɛ. 19Nɛ́ mɔ'ɔ nɛ̀ ŋma wi-usi-heembea tɛ̀ɛ́ tɛ̀ Jesu ɓɛɛ tɔ̧ ha̧ a̧: «Wan-usi-mɔ, mi tɛ nɛ̀ ɗoŋ‘nɛ́ fara lɛŋ n’ɛ̀nɛ̀ tɛ́ nɛ̀ sɛnɛ.» 20Ɓɛɛ Jesu kifi nú ha̧ a̧: «O gba-toyo a̧a̧ nɛ̀ gbamgba mɛ ɔ sɛnɛ, o nɔ̧́í̧ a̧a̧ nɛ̀ yáá kɔ‘i mbɛt, ɓɛɛ Bem ko bíí bó nɛ̀ géé fara-e-zu na.» 21Ɓɛɛ ŋma kpɔk mgbara o ŋgaiwi ko Jesu tɔ̧ ha̧ a̧: «Gasa Wan, ɛ̀nɛ̀ é war ha̧‘m mɛ nɛ̀ɛ́ gun dáà kɔ‘m sɛ́.» 22Jesu kifa nú ha̧ a̧: «Mɛ̀ tɛ́ ɗoŋ am, ɓɛɛ mɛ̀ é ha̧ o fio à̧ gún fio kɔ‘i.»

Jesu dee ha̧ ŋga-búk mɛ ga̧

(Zɔk Mk 4.35-41; Lk 8.22-25)

23Hɔ-ɗoŋ mɔ‘i, Jesu yee kombon, ɓɛɛ o ŋgaiwi kɔ̧-a̧ nɛ́ in a̧. 24Ŋga hara-búk ku̧u̧ naŋ ɓoɓa-a zu tɔp; oi-aa tikiɗi pɛŋa-yì tɛ̀ɛ́ kpe zu kombon ɓɔn, ɓɛɛ Jesu ɔ kɔ‘i nɛ́ yá. 25O ŋgaiwi kɔ̧-a̧ nɛ̀ɛ̀ tɛ a̧, tun a̧, ɓɛɛ tɔ̧ ha̧ a̧: «Ɛ̀nɛ̀ kpásí yɛ, Gasa Wan, ɛ́ɛ́ à̧ tɛ fe'i!» 26Ɓɛɛ a̧ kifi nú ha̧ wa: «Wen ge s’ɛ́nɛ́ de kíì ge, ɛ́nɛ́ nɛ̀ kɔ̧ɔ̧ɗɔɔwen k’ɛ́nɛ́ dɔk na’ɛ?» A̧ kura ŋgɔn, gai búk in tɔp mbɛt, ɓɛɛ mɔ lɛŋ ga̧ dezeŋ. 27Ɗɛɗɛ-wa gɔna ɓɛɛ wa tɔ̧ sitɛ ŋmaa: «Wi’ɛ nɛ́ ge bíí ge sá búk in tɔp mbɛt mbo zu ha̧ a̧'ɛ ge?»

Jesu kpasa o wi nɛ̀ ɗaŋ-sɔ̧ a̧a̧ tɛ-wa

(Zɔk Mk 5.1-20; Lk 8.26-39)

28Ŋgimbi nɛ̀ Jesu kuu tɔp si nù ko o bíí Gadara, o ŋma bíí yiitoo nɛ̀ ɗaŋ-sɔ̧ a̧a̧ tɛ-wa gboo nɛ̀ kɔ̧́ pɛsi-fio, ɓɛɛ we ti a̧ tɛnɛ. O wi nɔ‘i nɛ́ o ŋga bíí nyɛmna, ɓɛɛ bíí nyɛm mɛ ɓir géé ɓira-a nɛ̀ fara'i yak na. 29Ɓɛɛ o wi nɔ‘i ŋma nú tɛ hiɗimɔ‘e: «Bem ko Sɔ̧, nɛ́ ge à̧ mɛ̀ kíí zu yɛ ge? Mɛ́ tɛ̀ɛ́ hɛ̧ɛ̧ mɛ usi bɔnɛ h’ɛ́ɛ́ nɛti ha̧ ŋgimbi-a nde?» 30Gíí ŋgɔya yaa so ká̧ fara'i nyɔŋ nɛ̀ mɔ, 31ɓɛɛ o ɗaŋ-sɔ̧ ai nú ha̧ Jesu: «K’ɛ̀nɛ̀ nɛ́ tɛ̀ɛ́ ndak yɛ, ɓɛɛ ɛ̀nɛ̀ é h’ɛ́ɛ́ ye tɛ o ŋgɔya nɔ'ɔ.» 32Ɓɛɛ Jesu tɔ̧ ha̧ wa: «Ɛ̀nɛ̀ yák!» Wa gbòó tɛ́ o wi nɔ‘i ye tɛ o ŋgɔya, ɓɛɛ gíí ŋgɔya nɔ‘i gbin nɛ̀ zu kaya á ɗɔɔ tɔp, ɓɛɛ kum lɛŋ.

33O wi-dai-ŋgɔya yuu mɔ si saaye ɓɛɛ we ɗoŋ mɔ nɛ̀ yaka lɛŋ, in nyɛrɛmɔ ko o wi nɛ̀ a̧a̧ so nɛ̀ ɗaŋ-sɔ̧. 34O wi saaye zia wen'i, ɓɛɛ wa kai ŋmaa lɛŋ nɛ́ɛ̀ kpa Jesu. Zɔka a̧ nɛ̀ wa zɔka hegɔ, ɓɛɛ wa ai nú ha̧ a̧ mɛ yak e nù kɔ-wa duk.

Currently Selected:

MATTHIEU 8: GB11DC

Highlight

Copy

Compare