MATTHIEU 7

Ká‘i gɔna kita zu ŋmà-wi na

(Zɔk Lk 6.37-38,41-42)

1«K’ɛ́nɛ́ ɓa wen in bíí na wen ká Sɔ̧ tɛ̀ɛ́ ɓà wen in'nɛ̀ɛ́, 2wen a̧ tɛ gɔn kita zu'nɛ́ hee mɔ'ɔ n’ɛ̀nɛ̀ gɔn nɛ̀ kita zu ŋma bíí ga. Nɛ́ kale mɔɔ-we-mɔ n’ɛ̀nɛ̀ we nɛ̀ mɔ ha̧ o ŋma bíí a̧ a̧ tɛ we nɛ̀ mɔ h’ɛ́nɛ́ mbɛt.#Mk 4.24 3Wen ge mɛ́ zɔ́k be gbáá-kan nɛ̀ a̧a̧ yí nya-mɛ, ɓɛɛ mɛ́ zɔ́k kpíŋgíí-te mɛ yí-mɛ́ na ge? 4Kɔ-mɛ nɛ̀ kpíŋgíí-te a̧a̧ yí-mɛ́'ɛ, héé ge mɛ tɛ tɔ̧ ha̧ nya-mɛ‘e, ha'i ba gbáá-kan yí-a yinɛ ge? 5Mɛ́ wi nɛ̀ a̧a̧ nɛ̀ see yiitoo’ɛ, mɛ̀ bá kpíŋgíí-te yí-mɛ́ yinɛ nɛti ha̧ mɛ zɔk mɔ nɛ̀ sa̧a̧-a̧ kaɗi, sɛka mɛ bàà be gbáá-kan yí nya-mɛ‘i yinɛ!

6«K’ɛ́nɛ́ ha̧ mɔ ko Sɔ̧ ha̧ o toyo na. K’ɛ́nɛ́ a de kísí K’ɛ́nɛ́ ti o ŋgɔya na wen ká wa tɛ́ɛ̀ i̧si̧ ɗaŋ, ɓɛɛ wa zika tɛ́ɛ̀ nyɔŋ‘nɛ mbɛt.»

Ɛ̀nɛ̀ ák mɔ, ɛ̀nɛ̀ kíí mɔ, ɛ̀nɛ̀ kɔ́n nú tua

(Zɔk Lk 11.9-13)

7«Ɛ̀nɛ̀ ák mɔ, ɓɛɛ Sɔ̧ tɛ ha̧ h’ɛ́nɛ́, ɛ̀nɛ̀ kíí mɔ, ɓɛɛ ɛ́nɛ́ tɛ kpa, ɛ̀nɛ̀ kɔ́n nú tua, ɓɛɛ Sɔ̧ tɛ hu̧i̧ h’ɛ́nɛ́. 8Wen nɛ́ wi-ak-mɔ a'i ha̧ mɔ ha̧ a̧, nɛ́ wi-kii-mɔ a̧ kpa mɔ, nɛ́ wi-kɔn-nú tua a'i hu̧i̧ nú tua ha̧ a̧. 9Nɛ́ ge dáa-wan-bem ge mgbara'nɛ́ a̧ tɛ ha̧ ta ha̧ bem kɔ‘i kà bem’ɛi nɛ́ aka nɛ́ kam er dáà kɔ‘i ge? 10Kóó kà a̧ nɛ́ aka nɛ́ zoro, ɓɛɛ a̧ ha̧a̧ nɛ́ gɔ́k ha̧ a̧ ge? 11Ɓɛɛ ɛ́nɛ́ o ɗaŋwi nɛ̀ iŋa ha̧a̧ demɔ ha̧ o bem k’ɛ́nɛ́, bó nɛ́ Dáà k’ɛ́nɛ́ nɛ̀ a̧a̧ yiwese tɛ ha̧ demɔ ha̧ o bíí nɛ̀ ak mɔ er-a gan k’ɛ́nɛ́ na nde?

12«Mɔ lɛŋ n’ɛ̀nɛ́ kɔ̧ɔ̧ ha̧ ŋma bíí mɛ de h’ɛ́nɛ́, ɛ̀nɛ̀ dé kale mɔ‘i ha̧ wa mbɛt. Gba̧a̧ heembea ko Moisɛ in kalata ko o wi-tɔ̧-wen oi nú Sɔ̧ nɛ́ mɔ‘i.»#Lk 6.31

Geɗek nú-garo

(Zɔk Lk 13.24)

13«Ɛ̀nɛ̀ yé nɛ̀ geɗek nú-garo, wen gasa nú-garo in gba-war mgbɔ wi nɛnɛ sitɛ ɗaŋ fara, ɓɛɛ o bíí nɛ̀ dɔka-a bá nɛ́ war'i. 14Ɓɛɛ nɛ́ geɗek nú-garo in be war a̧ mgbɔ wi nɛnɛ tɛ̀ duka-kpasa, ɓɛɛ o wi nɛ̀ ba war'i dɔk na.»

Waya-te

(Zɔk Lk 6.43-44)

15«Ɛ̀nɛ̀ zɔ́k tɛ‘nɛ nɛ̀ o wi-tɔ̧-wen oi nú Sɔ̧ ndela nɛ̀ tɛ́ tɛ‘nɛ hee o sami ga, ɓɛɛ nɛ̀ kɔ̧ see-wa, wa nɛ́ o ŋga ɓoŋgo. 16Ɛ́nɛ́ tɛ iŋ wa tɛ tom kɔ-wa. Wi ɓi so waya-nyak-dɔ̧ɔ̧ ɓii tɛ mgboi-gata, kóó mbɔra tɛ naakɔɓa nde?#7.16 waya-nyak-dɔ̧ɔ̧, mgboi-gata, mbɔ́rá, naa-kɔɓa: texte tɔ̧a nɛ́ raisins ín buisson d’épines, figues ín chardons. 17De te lɛŋ wai nɛ́ de waya-a, ɓɛɛ ɗaŋ te wai nɛ́ ɗaŋ waya-a. 18De te beka wai ɗaŋ waya-a na, ɓɛɛ ɗaŋ te beka wai de waya-a na mbɛt. 19Te lɛŋ nɛ̀ wai de waya-a na, wi tɛ gɔm a̧ pi̧ tɛ wee.#Mt 3.10; Lk 3.9 20Ɓɛɛ nɛ́ tɛ́ tom ko o wi-tɔ̧-wen oi nú Sɔ̧ ndela ɛ̀nɛ̀ tɛ́ iŋ nɛ̀ wa.»#Mt 12.33

Bíí ko Sɔ̧

(Zɔk Lk 13.25-27)

21«Bó nɛ́ géé tɔ̧ɔ̧ wen nɛ̀ nú-wi'e: ‹Gasa Wan, Gasa Wan,› a̧ tɛ de ha̧ bíí mɛ ye tɛ Wan mɛ yiwese na, ɓɛɛ nɛ́ déé mɔ nɛ̀ Dáà kɔ‘m nɛ̀ a̧a̧ yiwese kɔ̧a̧. 22Wese-gɔn-kita bé tɛ̀ɛ́ hɔ, o bíí nɛ̀ dɔka-a tɛ tɔ̧ ha̧‘m: ‹Gasa Wan, Gasa Wan, bó nɛ́ ɛ́ɛ́ bàá tɔ̧ so wen oi nú Sɔ̧ nɛ̀ nin'nɛ na nde? Bó nɛ́ ɛ́ɛ́ bàá ndak so o ɗaŋ-sɔ̧ yinɛ nɛ̀ nin'nɛ na nde? Bó nɛ́ ɛ́ɛ́ bàá de mɔɔ-kifi nɛ̀ dɔka-a nɛ̀ nin'nɛ na nde?› 23Ɓɛɛ mi tɛ kifi nú ha̧ wa: ‹Ɛ́nɛ́ o wi-de-ɗaŋmɔ, ɛ̀nɛ̀ yú síɓí, mi iŋ‘nɛ na kóó tikiɗi!›#Gima 6.9

O tua yiitoo

(Zɔk Lk 6.47-49)

24«Hégɔ́, kóó o ndé nɛ̀ zia wen n'am tɔ̧'ɛ, kà a̧ kásí, ɓɛɛ a̧ hɔɔ ŋmaa in ŋma wi-iŋ-mgbara-mɔ nɛ̀ mboo tua kɔ‘i zu ta. 25Nɛ́ mɔ'ɔ nɛ̀ kórò hɔa, yì ha̧a̧, ŋga-búk yuu mbɛt, ɓɛɛ tua'i gbin na, wen wan-aa ee so naŋ-a zu ta. 26Ɓɛɛ kóó o ndé nɛ̀ zia wen n'am tɔ̧'ɛ, kà a̧ kásí na, a̧ hɔɔ ŋmaa in ŋma mgbelewi nɛ̀ mboo tua kɔ‘i zu nyɛmɛ. 27Nɛ́ mɔ'ɔ nɛ̀ kórò hɔa, yì ha̧a̧, ŋga-búk yuu mbɛt, ɓɛɛ tua'i gbin a nù gɛ́tɛ́-gɛ́tɛ́.»

28Jesu usa mɔ hegɔ, ɓɛɛ ɗɛɗɛ bíí gɔn tɛ usamɔ kɔ̧-a̧;#Mk 1.22; Lk 4.32 29ŋgai a̧a̧ tɛ́ wen kɔ̧-a̧ in ɔ dita, bó nɛ́ héé ko o wi-usi-heembea kɔ-wa ga na.

Currently Selected:

MATTHIEU 7: GB11DC

Highlight

Copy

Compare