MATTHIEU 22
22
Lizaŋ gbaŋa-báá-kóò
(Zɔk Lk 14.15-24)
1Jesu tɔ̧ɔ̧ wen ha̧ o bíí nɛ̀ lizaŋ woyo. 2«Wan mɛ yiwese hɔɔ ŋmaa in ŋma wannu nɛ̀ dee gbaŋa-báá-kóò ko bem kɔ‘i. 3A̧ toma o wi-de-tom kɔ̧-a̧ nɛnɛ mɛ sa o bíí nɛ̀ wa saa so wen gbaŋa'i, ɓɛɛ o wi nɔ‘i kɔ̧ tɛa-a na. 4Ɓɛɛ a̧ tom o ŋma wi-de-tom woyo mɛ tɔ̧ ha̧ o wi n'aa saa so'e ndé, wi ɗafa mɔ kaɗi, wi gɔna o wiwii-ndai in o de ŋmaŋa saɗi kɔ‘i, wi ɗafa mɔ lɛŋ kaɗi; wa a̧ tɛ́ɛ̀ dé gbaŋa wo. 5Ɓɛɛ wen kɔ-wa bó nɛ̀ sara ko wannu na; ŋma yaka si kpɛɛfɔ kɔ‘i, ŋma yak mɛ ɗɔr mɔ kɔ‘i; 6ɓɛɛ o ŋma tik zu o wi-de-tom nɔ‘i, usi bɔnɛ ha̧ wa, ɓɛɛ gbɛ wa yinɛ. 7See wannu nyima nyɛmna, ɓɛɛ a̧ tom o wi-biro kɔ̧-a̧ mɛ nɛ̀ɛ́ gbɛ o wi-gbɛ-zu nɔ‘i, dɔ ye kɔ-wa a nù gbuɗuk. 8Ɓɛɛ wannu tɔ̧ ha̧ o wi-de-tom kɔ‘i: ‹Mi ɗafa mɔ wen gbaŋa kaɗi. O wi nɔ'ɔ n'am saa so’ɛ nyɛm so wen dee gbaŋa'i na. 9Ɛ̀nɛ̀ nɛ́ɛ̀ yá sasa-war. O bíí lɛŋ n’ɛnɛ tɛ kpa, ɛ̀nɛ̀ sá wa tɛnɛ mɛ de gbaŋa-báá-kóò in yɛɛ.› 10Nɛ́ mɔ'ɔ nɛ̀ o wi-de-tom nɔ‘i baa war nɛnɛ, ɓɛɛ sa o bíí nɛ̀ wa kpaa lɛŋ, o wi-de-demɔ gú nɛ̀ o wi-ɗaŋ; hegɔ tua-gbaŋa duna nɛ̀ o bíí.
11«Nɛ́ mɔ'ɔ nɛ̀ wannu yee tua mɛ zɔk o bíí, ɓɛɛ zɔk ŋma bíí mgbara wa nɛ̀ pi̧ kɔ‘i laa gbaŋa na. 12Wannu aka a̧: ‹Sɛm kɔ‘m, dee bɔɔ hee ge sa mɛ yèé hɛ̧ɛ̧, mɛ pi̧ laa gbaŋa na’ɛ ge?› Ɓɛɛ wi’ɛi kpa ŋma wen mɛ tɔ̧ na. 13Ɓɛɛ wannu tɔ̧ ha̧ o wi-de-tom kɔ‘i: ‹Ɛ̀nɛ̀ hɛ́r naŋ-a in er-a, ɛ̀nɛ̀ síŋ a̧ pi̧ zan ti tum, fara'i nɛ́ fara-hi̧i̧-kɔ̧a̧ in fara-gɔfi-mɔ.›#Mt 8.12; 25.30; Lk 13.28 14Wen Sɔ̧ saa bíí nɛ̀ dɔka-a, ɓɛɛ bíí n'aa hoka dɔk na.»
Garama ko Sezar
(Zɔk Mk 12.13-17; Lk 20.20-26)
15Nɛ́ mɔ'ɔ nɛ̀ o Fariziɛn baa keta in o ŋmaa mɛ nɛ̀ɛ́ ba wen zaŋ Jesu. 16Wa toma o ŋgaiwi kɔ-wa in o ŋma bíí ko Herod sitɛ a̧ mɛ tɔ̧ ha̧ a̧: «Wan-usi-mɔ, ɛɛ iŋa ɛ́nɛ́ de ndela na, ɛ́nɛ́ usi nɛ yuwar ko Sɔ̧ ha̧ o bíí nyɛm nɛ̀ ɗoŋ kpasawen, ɓɛɛ ɛnɛ yu kíí bíí na wen ɛnɛ kɛ̧ mgbara bíí na. 17Ɛ̀nɛ̀ tɔ̧́ taamɔ k’ɛ́nɛ́ tɛ wen’ɛ h’ɛ́ɛ́ zii: heembea k’ɛɛ ee h’ɛ́ɛ́ mɛ gbo garama ha̧ Sezar náà, kóó weyaa nde?» 18Soɓee, Jesu iŋa ɗaŋ taamɔ kɔ-wa kaɗi, ɓɛɛ ak wa: «Ɛ́nɛ́ o wi nɛ̀ a̧a̧ nɛ̀ see-yiitoo, wen ge s’ɛnɛ tui pɛ́r ha̧‘m ge? 19Ɛ̀nɛ̀ úsí sede n’ɛnɛ gbo nɛ̀ garama'i ha̧‘m zɔk.» Ɓɛɛ wa ha̧ ŋma kɔya sede ha̧ a̧. 20Nɛ́ mɔ'ɔ n'aa aka wa: «Zu bíí in yɔramɔ nɛ̀ duk tɛ sede’ɛ nɛ́ ko o?» 21Ɓɛɛ wa kifi nú: «Nɛ́ ko Sezar.» Ɓɛɛ Jesu tɔ̧ ha̧ wa: «Ɛ̀nɛ̀ há̧ mɔ ko Sezar ha̧ Sezar, ɓɛɛ ɛ̀nɛ̀ há̧ mɔ ko Sɔ̧ ha̧ Sɔ̧.»
22Ɗɛɗɛ wa gɔna tɛ wen'i, ɓɛɛ wa pɛsi e a̧ duk.
Kura-ŋgɔn ko o fio
(Zɔk Mk 12.18-27; Lk 20.27-40)
23Kpɔk wese'i, o ŋma Saduseɛn nɛ̀ tɔ̧ kɔ‘i'e o bíí nɛ̀ fea beka kur ŋgɔn na, nɛ̀ɛ́ tɛ Jesu ɓɛɛ tɔ̧ ha̧ a̧:#Tom 23.8 24«Wan-usi-mɔ, Moisɛ tɔ̧ɔ̧ so'e, ‹Kà ŋma bíí nɛ́ fea, bem bo na, nya-a̧ tɛ ba kó-oi-aa mɛ ko nɛ̀ bem nɛ̀ tɛ ba nin wan-fio e ŋgɔn.›#Wee-ɗoŋ-he 25.5 25O ŋma nya-wi yaa so ye k’ɛɛ mɔɔrɔ-ɗoŋ-yiitoo. Nɛ́ mɔ'ɔ nɛ̀ kaya-wi baa kóò, ko bem na, ɓɛɛ fe, e kóò ha̧ yiitoo-aa. 26Yiitoo-aa baa kóò‘i, ko bem na, ɓɛɛ fe mbɛt, taar-a mbɛt, nɛ́ kpɔk mɔ hegɔɔ hɔ nɛnɛ tɛ mɔɔrɔ-ɗoŋ-yiitoo bíí. 27Ɗoŋ wa lɛŋ, kóò‘i fee mbɛt. 28Wese kura-ŋgɔn ko o bíí nɛ̀ fea, kóò‘i tɛ duk nɛ́ kóò ko o mgbara wa mɔɔrɔ-ɗoŋ-yiitoo'i o? Wen wa lɛŋ baa so a̧ nɛ̀ kóò.»
29Jesu kifa nú: «Ɛ́nɛ́ yɔɔ kaya, wen ɛ́nɛ́ iŋ Yɔramɔ in ŋgayamɔ ko Sɔ̧ na. 30Ɗoŋ kura-ŋgɔn ko o bíí nɛ̀ fea, wiwii beka ba kóò na in okoo beka ba wíì na mbɛt. O bíí tɛ ya hee o betom mɛ yiwese ga. 31Ɓɛɛ nɛ̀ ko kura-ŋgɔn ko o bíí nɛ̀ fea, ɛnɛ tɛ tɔr mɔ nɛ̀ Sɔ̧ tɔ̧ɔ̧ h’ɛ́nɛ́ na nde? 32A̧ tɔ̧a̧: ‹Mi nɛ́ Sɔ̧ ko Abraham, Sɔ̧ ko Izak, in Sɔ̧ ko Jakob:› A̧ bo nɛ́ Sɔ̧ ko o fio na; a̧ nɛ́ Sɔ̧ ko o bíí nɛ̀ duk kpasa.»#Gboa-a 3.6
33Ɗɛɗɛ o dɔka bíí nɛ̀ zia wen'i gɔna tɛ usamɔ kɔ̧-a̧.
Gasa heembea
(Zɔk Mk 12.28-34; Lk 10.25-28)
34O Fariziɛn mɔi̧a ŋmaa nɛ́ tɛ̀ Jesu wen wa zia'e, Jesu kifa nú nɛ̀ de-a, ɓɛɛ o Saduseɛn kpa mbe wen mɛ tɔ̧ na; 35nɛ́ mɔ'ɔ nɛ̀ ŋma kpɔk mgbara wa nɛ̀ duka nɛ́ wi-usi-heembea kia mɛ ba wen zaŋ Jesu, ɓɛɛ ak a̧:#Lk 10.25-28 36«Wan-usi-mɔ, heembea nɛ̀ gana o ŋma heembea lɛŋ nɛ́ ge-aa ge?» 37Ɓɛɛ Jesu kifi nú: «Mɛ̀ kɔ̧́ Gasa Wan Sɔ̧ kɔ-mɛ nɛ̀ see-mɛ lɛŋ, nɛ̀ sɔ̧-tɛ-mɛ lɛŋ, in nɛ̀ taamɔ kɔ-mɛ lɛŋ.#Wee-ɗoŋ-he 6.5 38Kuti heembea nɛ̀ gana o oi-aa lɛŋ nɛ́ mɔ‘i. 39Ɓɛɛ yiitoo-aa nɛ̀ hɔɔ ŋmaa in a̧ nɛ́ mɔ'ɔ: Mɛ̀ kɔ̧́ ŋmà-mɛ hee kiitɛ-mɛ ga.#Lev 19.18 40Heembea nɔ‘i yiitoo'i nɛ́ gùn heembea in gùn wen nɛ̀ o wi-tɔ̧-wen oi nú Sɔ̧ tɔ̧ɔ̧ so lɛŋ.»
Mɛsii in David
(Zɔk Mk 12.35-37; Lk 20.41-44)
41Hee mɔ'ɔ nɛ̀ o Fariziɛn mɔi̧a ŋmaa ga, Jesu aka wa: 42«Tɛ́ mɔ ko Mɛsii, ɛ́nɛ́ ta bɔɔ k’ɛ́nɛ́ hee ge? A̧ nɛ́ bezaŋ o?» Wa kifa nú ha̧ a̧: «A̧ nɛ́ bezaŋ David.» 43Ɓɛɛ Jesu ak wa: «Dee bɔɔ hee ge sa Sa̧a̧ Ɔmi usa ha̧ David mɛ sa a̧‘e ndé Gasa Wan tɛ́ wen’ɛ ge:
44‹Gasa Wan tɔ̧ɔ̧ ha̧ Gasa Wan kɔ‘m:
Mɛ̀ dúk nɛ̀ war wii-er-am,
hɔ ŋgimbi n'am tɛ de ha̧ mɛ
mɛ kpa ŋgai zu o wisɛn kɔ-mɛ.›#Gima 110.1
45Kà bo'e, a̧ nɛ́ bezaŋ David, ɓɛɛ David tɛ sa bɔɔ a̧‘e ‹Gasa Wan› kɔ‘i hee ge?»
46Kóó bíí kpɔk mgbara wa nyɛm so mɛ kifi nú ha̧ a̧ na. Ɓɛɛ ɗoŋ wese'i ŋma bíí nɔ ŋgiɗi mɛ ak a̧ ɓɔna.
Currently Selected:
MATTHIEU 22: GB11DC
Highlight
Copy
Compare
Share
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
