MATTHIEU 21

Jesu yee Jerusalɛm hee wannu ga

(Zɔk Mk 11.1-11; Lk 19.28-40; Jn 12.12-19)

1Ŋgimbi nɛ̀ wa hɛɗa nɛ̀ Jerusalɛm, wa hɔɔ ɗoŋ tua Bɛtfage zu Kaya Te-nɔ̧́, ɓɛɛ Jesu tom o ŋma ŋgaiwi kɔ‘i yiitoo tɔ̧ nɛnɛ ha̧ wa'e: 2«Ɛ̀nɛ̀ nɛ́ tɛ be ye ti'i. Hɔa-a k’ɛ́nɛ́ hegɔ, ɓɛɛ ɛ́nɛ́ tɛ kpa nana-tuifuu nɛ̀ wa kuna, nɛ̀ be-a a̧a̧ katɛ a̧. Ɛ̀nɛ̀ búr nana-a ɓɛɛ ɛ̀nɛ̀ mgbɔ́ wa tɛnɛ ha̧‘m. 3Kà ŋma bíí nɛ́ tɔ̧ɔ̧ ŋma wen h’ɛ́nɛ́, ɓɛɛ ɛ̀nɛ̀ kífí nú ha̧ a̧‘e: ‹Nɛ́ Gasa Wan a̧ kɔ̧ɔ̧ wa,› ɓɛɛ wi’ɛi tɛ e h’ɛ́nɛ́ mɛ mgbɔ wa tɛnɛ nɛ̀ haya-a.»

4Mɔ‘i dee hegɔ ha̧ wen nɛ wi-tɔ̧-wen oi nú Sɔ̧ bàá tɔ̧ so mɛ hɔ gba̧a̧:

5«Ɛ̀nɛ̀ tɔ̧́ ha̧ boko-be Siɔŋ‘e:

Mɛ̀ zɔ́k Wannu kɔ-mɛ a̧ tɛ tɛ mɛ‘i;

a̧ nɛ́ wi-mɔka-see,

a̧ a̧a̧ zu nana-tuifuu in be-a,

bem ko saɗi-tui-mɔ.»#Zak 9.9

6O ŋgaiwi kɔ̧-a̧ nɛ̀ɛ́, ɓɛɛ de hee mɔ'ɔ nɛ̀ Jesu tɔ̧ɔ̧ ha̧ wa ga. 7Wa mgbɔɔ nana-tuifuu in be-a tɛnɛ ha̧ a̧, wa tata laa kɔ-wa gɔn see tuifuu, ɓɛɛ Jesu daŋ duk zu a̧. 8O gba gii bíí tata laa kɔ-wa sɛn yuwar, ɓɛɛ o ŋma gbin kɔ‘i nɛ́ wa̧a̧ a yuwar. 9O gba dɔka bíí nɛ̀ yaa nɛ̀ ti in o wan nɛ̀ yaa nɛ̀ ɗoŋ-aa gaia mɔ‘e:

«Bem ko David oee!

Tok- de-yoŋgo a̧ dúk zu wi nɛ̀ tɛ‘i nɛ̀ nin Gasa Wan.

Osoko ha̧ Sɔ̧, yiwese ŋgɔn mɛ!»#Gima 118.25-26

10Jesu yee Jerusalɛm, ɓɛɛ o bíí lɛŋ sakali, ɓɛɛ ak mɔ: «Wi’ɛ bɔɔ nɛ́ o?» 11Ɓɛɛ o gba giiwi kifi nú: «Mɛ̀ nɛ́ Jesu, wi-tɔ̧-wen oi nú Sɔ̧, be Nazarɛt nú Galilee mɛ.»

Jesu ndaka o wi-ɗɔr-mɔ kɔ̧́ Tua ko Sɔ̧ gbonɛ

(Zɔk Mk 11.15-19; Lk 19.45-48; Jn 2.13-22)

12Jesu yee kɔ̧́ Tua ko Sɔ̧ ɓɛɛ ndak o bíí nɛ̀ yaa hi̧i̧ ɗɔr nɛ̀ mɔ, hi̧fi nɛ̀ mɔ, gbonɛ, ɓɛɛ a̧ ndur o taŋe ko o wi-kpai-sede in o gboŋgoe ko o wi-ɗɔr-pola a nù, 13ɓɛɛ a̧ tɔ̧ ha̧ wa: «Kalata ko Sɔ̧ tɔ̧a̧‘e: ‹Wi tɛ sa Tua kɔ‘m'e tua-kɔfi-sɔ̧›, ɓɛɛ nɛ́ mɔ'ɔ n’ɛnɛ kifa a̧ e nɛ́ di̧i̧ ko o kpɔ̧i̧-gba̧a̧-nin!»#Es 56.7; Jer 7.11

14Nɛ́ mɔ'ɔ nɛ̀ o ŋma wi-boma-yí in o wi-kum nɛ̀ɛ́ tɛ Jesu kɔ̧́ Tua ko Sɔ̧ mɛ, ɓɛɛ a̧ kpasi wa. 15O gasa wan-ɗafi-sɔ̧ in o wi-usi-heembea zɔka mɔɔ-gɔn-ɗɛɗɛ-wi nɛ̀ Jesu dea'i, wa zia gaia mɔ nɛ̀ o obem gai sɛn kɔ̧́ Tua ko Sɔ̧ mbɛt tɔ̧ nɛnɛ‘e: «Bem ko David oee!» ɓɛɛ wa kpa ɗaŋsee. 16Wa tɔ̧ɔ̧ ha̧ Jesu: «Mɛ́ zii wen nɛ̀ wa tɔ̧‘i na nde?» Ɓɛɛ Jesu kifi nú‘e: «Íì, mi zia; ɓɛɛ nɛ̀ k’ɛ́nɛ́, ɛ́nɛ́ tɔr wen’ɛ nɛ̀ tɔ̧a̧‘e: ‹Mɛ dee ha̧ o bem in o zɔɗi-bem mɛ zɔn mɛ,› na nde?»#Gima 8.3

17A̧ tɔ̧ɔ̧ wen'i kaɗi, ɓɛɛ a̧ e wa duk gbo yak nɛ́ɛ̀ ɔ Betanii mɛ.

Jesu foma te-mbɔra

(Zɔk Mk 11.12-14,20-24)

18Mɛ́ tutuyɛ ŋgimbi nɛ̀ Jesu a̧a̧ tɛ sii ɗoŋ si Jerusalɛm, wɔ gbɛɛ a̧. 19Nɛ́ mɔ'ɔ n'aa zɔka ŋma te-mbɔra ká̧ war, ɓɛɛ nɛ́ si ká̧ a̧, gbakna a̧ kpaa ŋma waya-a wó, ɓɛɛ nɛ́ géé wa̧a̧-a̧ a̧ da̧a̧ sɔɔ géè. Ɓɛɛ a̧ tɔ̧ ha̧ te'i: «Kɔ-mɛ, mɛ beka wai ɓɔna ndó-ndó-ndó!» Ɓɛɛ wen'i nú-wi'i, te-mbɔra'i kora. 20O ŋgaiwi kɔ̧-a̧ zɔka mɔ‘i, ɗɛɗɛ-wa gɔna, ɓɛɛ wa tɔ̧: «Dee hee ge sɛka te’ɛ kora nɛ̀ haya-a hegɔ'ɛ ge?» 21Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́; k’ɛ̀nɛ̀ nɛ́ kɔ̧ɔ̧ ɗɔaa ha̧ Sɔ̧, nɛ̀ ŋma sii-kafɛ bo na, ɛ́nɛ́ tɛ de mɔ gan mɔ n'am dee in te-mbɔra’ɛ. Kóó ɛ́nɛ́ tɔ̧ɔ̧ ha̧ kaya’ɛ: ‹Mɛ̀ kúr, mɛ̀ gbín a ɗɔɔ gba-tɔp,› mɔ‘i tɛ de.#Mt 17.20; 1 Kɔr 13.2 22Mɔ lɛŋ n’ɛ̀nɛ̀ te kɔfi Sɔ̧ ak nɛnɛ nɛ̀ kɔ̧ɔ̧ɗɔɔwen, a̧ tɛ ha̧‘nɛ́.»

Ŋgai ko Jesu

(Zɔk Mk 11.27-33; Lk 20.1-8)

23Jesu yee kɔ̧́ Tua ko Sɔ̧ ɓɛɛ duk usi nɛ̀ mɔ. Nɛ́ mɔ'ɔ nɛ̀ o gasa wan-ɗafi-sɔ̧ in o gasawi saaye tɛ̀ɛ̀ tɛ a̧ ɓɛɛ ak a̧: «Mɔ nɛ̀ mɛ de’ɛ, mɛ de nɛ̀ ŋgai ko o? Nɛ́ o'o ha̧a̧ ŋgai’ɛ ha̧ mɛ o?» 24Ɓɛɛ Jesu kifi nú ha̧ wa: «Mi mbɛt, mi a̧a̧ nɛ̀ ŋma akamɔ kpɔk mɛ ak nɛ̀ ɛnɛ. K’ɛ̀nɛ̀ nɛ́ kifa nú ha̧‘m, ɓɛɛ sɛka'm tɔ̧ɔ̧ ndaa ŋgai kɔ‘m h’ɛ́nɛ́. 25Zuia-bíí nɛ̀ Jean duka so zui’ɛ tɛɛ nɛ̀ déè? Tɛ̀ɛ́ nɛ̀ tɛ́ Sɔ̧ náà, kóó nɛ̀ tɛ̀ bíí nde?» Ɓɛɛ wa tɔ̧ sitɛ ŋmaa: «K’ɛ̀ɛ̀ tɔ̧‘e, zuia-bíí nɛ̀ Jean zuia so'i tɛ̀ɛ́ nɛ̀ tɛ́ Sɔ̧ wó, a̧ tɛ ak yɛ‘e wen ge s’ɛɛ kɔ̧ bɔɔ ɗɔɔ wen ko Jean na ge? 26Á̧ k’ɛɛ tɔ̧‘e tɛ̀ɛ́ nɛ̀ tɛ̀ bíí wó, o bíí tɛ de wen in yɛɛ, wen wa lɛŋ iŋa'e Jean nɛ́ wi-tɔ̧-wen oi nú Sɔ̧.» 27Ɓɛɛ wa kifi nú ha̧ Jesu: «Ɛɛ iŋ k’ɛɛ na.» Ɓɛɛ Jesu tɔ̧: «Mi mbɛt, mi beka tɔ̧ ndaa ŋgai n'am de nɛ̀ mɔ‘i h’ɛ́nɛ́ na.»

Lizaŋ ko o be-wiwii yiitoo

28«Ɛ̀nɛ̀ tɔ̧́ mɔ n’ɛnɛ ta tɛ lizaŋ'ɛ ha̧‘m zii. Ŋma bíí a̧a̧ so nɛ̀ o be-wiwii kɔ‘i yiitoo; a̧ nɛ̀ɛ̀ tɛ kaya-a, tɔ̧ ha̧ a̧: ‹Bem kɔ‘m, mɛ̀ nɛ̀ɛ́ dé tom kpɛɛfɔ kɔ‘m sɔsɔɔ.› 29Ɓɛɛ bem’ɛi kifi nú: ‹Mi kɔ̧ na!› Nɛ̀ ɗoŋ, a̧ kpaia taamɔ, ɓɛɛ a̧ ba war yak si kpɛɛfɔ mɛ de tom. 30Ɓɛɛ dáa-wan’ɛi nɛ́ tɛ́ hɔ-ɗoŋ-kaya-bem ɓɛɛ tɔ̧ kale kpɔk wen'i ha̧ a̧, ɓɛɛ bem’ɛi kifi nú: ‹Íì baaba, mi tɛ nɛ.› Ɓɛɛ a̧ nɛ na. 31Mgbara o bem nɔ'ɔ yiitoo’ɛ, nɛ́ o'o zia zia wen nú dáà kɔ‘i o?» Ɓɛɛ wa kifi nú: «Nɛ́ kaya-a.» Nɛ́ mɔ'ɔ nɛ̀ Jesu tɔ̧ɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, o wi-ba-garama in o ko-de-dàlà tɛ ye tɛ Wan ko Sɔ̧ nɛti h’ɛ́nɛ́. 32Wen Jean tɛ̀ɛ́ tɛ‘nɛ́ mɛ usi deemɔ nɛ̀ yuwar-a h’ɛ́nɛ́, ɓɛɛ nɛ́ o wi-ba-garama in o ko-de-dàlà a̧ kpɛka a̧, ɛ́nɛ́ kpɛk k’ɛ́nɛ́ a̧ na. Ɛ́nɛ́ zɔka mɔ‘i mbɛt, ɓɛɛ ɛ́nɛ́ kpai duka-a k’ɛ́nɛ́ wen h’ɛ́nɛ́ mɛ kɔ̧ ɗɔaa ha̧ a̧ na.»#Lk 3.12; 7.29-30

Lizaŋ ko o ɗaŋ wi-zɔk-fɔ

(Zɔk Mk 12.1-12; Lk 20.9-19)

33«Ɛ̀nɛ̀ zíí ŋma lizaŋ woyo: Ŋma wan-tua duka so, ɓɛɛ wá fɔ-nyak-dɔ̧ɔ̧. Nɛ́ mɔ'ɔ n'aa ɓora fɔ‘i, ɓɛɛ ɗafi fara-vati-dɔ̧ɔ̧ in tua-pɛm-mɔ mbɛt. A̧ ee fɔ‘i er o bíí, ɓɛɛ nɛ́ kɔ̧-a̧ gɛnɛ si ŋma nù.#Es 5.1-2 34Ŋgimbi ɓi waya-nyak-dɔ̧ɔ̧ hɔa, ɓɛɛ wan-fɔ tom o wi-de-tom kɔ̧-a̧ sitɛ o wi nɔ‘i mɛ nɛ̀ɛ́ kai war waya-nyak-dɔ̧ɔ̧ kɔ̧-a̧ piinɛ ha̧ a̧. 35Nɛ́ mɔ'ɔ nɛ̀ o wi-zɔk-fɔ tika zu o betom nɔ‘i, ɓɛɛ mbɛr ɛ̧ɛ̧ mɛ mbɛr gbɛ; gbɛ ɓii-aa, ɓɛɛ wa yo ŋma ɓii-aa nɛ̀ ta mbɛt. 36Wan-fɔ toma o ŋma wi-de-tom nɛnɛ nɛ̀ dɔka-a gan kuti-a, ɓɛɛ o wi-zɔk-fɔ de kànà nɛ́ kale kpɔk mɔ in wa mbɛt. 37Sɔŋkur-aa, a̧ toma nɛ́ bem kɔ̧-a̧ nɛnɛ wen a̧ taa'e ndé, wa tɛ yu bem kɔ̧-a̧. 38Ɓɛɛ zɔka bem’ɛi nɛ̀ o wi-zɔk-fɔ zɔka fara tɛa-a, ɓɛɛ wa tɔ̧ ha̧ o ŋmaa: ‹Zɔ́k wi-duk-oi-dáà kɔ‘i nɛ̀ tɛ mɛ‘i! Ɛ̀nɛ̀ tɛ́ ɛ̀ɛ̀ gbɛ́ a̧ yinɛ, ɛ̀ɛ̀ káí mɔɔ-oi-dáà kɔ̧-a̧.› 39Wa baa a̧, gbur a̧ si ká̧ nú fɔ ɓɛɛ gbɛ a̧. 40Ŋgimbi nɛ̀ wan-fɔ bé tɛ̀ɛ́ hɔ, nɛ́ ge a̧ a̧ tɛ de nɛ̀ o wi-zɔk-fɔ nɔ‘i ge?» 41Wa kifa nú ha̧ Jesu: «A̧ tɛ gbɛ o ɗaŋ wi nɔ‘i yinɛ, ɓɛɛ a̧ tɛ e fɔ kɔ̧-a̧ er o wi nɛ̀ tɛ tom waya-nyak-dɔ̧ɔ̧ ha̧ a̧ tɛ ŋgimbi-a.» 42Ɓɛɛ Jesu ak wa: «Ɛ́nɛ́ tɛ tɔr wen’ɛ zaŋ Yɔramɔ hɔ̧ɔ̧ na?

‹Nɛ́ ta nɛ o wi-ba-naŋ-tua pi̧i̧ so taŋ‘i,

a̧ kifa duk nɛ́ de kina-ta-e mgbii-tua;

mɔ‘i nɛ deemɔ ko Gasa Wan,

nɛ̀ duk nɛ́ gasamɔ yí-ɛɛ lɛŋ!›#Gima 118.22-23

43Mɛ̀ nɛ́ wen hegɔ s'am tɔ̧ h’ɛ́nɛ́‘e, Sɔ̧ tɛ ba Wan kɔ‘i er'nɛ́ yinɛ mɛ ha̧ ha̧ dukbíí nɛ̀ tɛ de ha̧ tom kɔ̧-a̧ mɛ nɛ siti. [ 44Kóó o ndé nɛ̀ tɛ yo nù zu ta'i tɛ gbin, ɓɛɛ wi nɛ ta'i tɛ tik zu a̧, tɛ mbɔli.]»

45O gasa wan-ɗafi-sɔ̧ in o Fariziɛn zia o lizaŋ nɔ‘i ɓɛɛ wa iŋ‘e Jesu tɔ̧ nɛ́ wa. 46Wa kia mɛ ba a̧, ɓɛɛ nɛ́ kíì giiwi nɛ̀ zɔk a̧ hee wi-tɔ̧-wen oi nú Sɔ̧ ga a̧ de wa.

Currently Selected:

MATTHIEU 21: GB11DC

Highlight

Copy

Compare