ƐSDRAS 4
4
Dora dee tom Tua ko Sɔ̧
1Ŋgimbi nɛ o wisɛn ko Juda in Bɛnjamin zia'e, o wi nɛ wa kaia so yaknɛ nɛ bara-biro mbo nɛ́ Tua ko GASA WAN Sɔ̧ ko Israɛl wó, 2wa tɛɛ kpa Zorobabɛl in o gasawi nutua Israɛl ɓɛɛ tɔ̧ ha̧ wa: «Ɛ́ɛ́ kɔ̧ɔ̧ mɛ mbo Tua’ɛ in'nɛ̀ɛ́, wen nɛ́ kpɔk Sɔ̧ n’ɛnɛ gasi, ɛ̀ɛ̀ gasi, ɗafi nɛ̀ a̧ mbɛt, ku̧u̧naŋ-a nɛ ŋgimbi nɛ Asarhadɔŋ wannu Asirii kaia nɛ̀ ɛɛ hɔ nɛnɛ hɛ̧ɛ̧.»#2 Wan 17.24-41
3Zorobabɛl in Josue gú nɛ̀ o gasawi nutua Israɛl kifa nú: «Tua'i bó nɛ́ tom k’ɛ́nɛ́ na; nɛ́ tom k’ɛɛ. Nɛ́ ɛɛ a̧ tɛ mbo Tua ha̧ GASA WAN Sɔ̧ ko Israɛl, hee mɔ'ɔ nɛ Sirus, wannu Pɛrsɛ tɔ̧ɔ̧ so h’ɛ́ɛ́ ga.»
4O bíí nù‘i pi̧i̧ kíì tɛ o be Juda, ha̧ gba̧a̧ tɛ-wa mɛ gbin, wen ká tom'i tɛɛ nɛ siti. 5Wa aa wen ha̧ o wi-tɔ̧-mbɔrɔ ko wannu mɛ dor tom Tua'i; wa dora tom'i tɛ ŋgimbi nɛ Sirus ɔɔ nɛ wan Pɛrsɛ hegɔ hɔ nɛnɛ tɛ ŋgimbi nɛ Darius baa nɛ wan Pɛrsɛ mbɛt.
Dora mboo Jerusalɛm woyo
6Zɛrzɛs baa wan, ɓɛɛ tɛ ku̧u̧naŋ pɛ ɔɔ-wan kɔ̧-a̧‘i, o wi nɔ‘i wula o be Juda in o be Jerusalɛm ha̧ a̧.#Ɛst 1.1
7Hɔ-ɗoŋ-aa, Artazɛrzɛs baa wan Pɛrsɛ, ɓɛɛ Biselam, Mitredat in Tabeɛl ká bá nɛ̀ o sɛm kɔ-wa yɔr kalata ha̧ a̧, wuli nɛ o be Jerusalɛm. Kalata'i, wa yɔra yɔra-a nɛ nú aram in yɔramɔ-a nɛ́ yɔramɔ aram mbɛt.
8Rɛhum wannu Samarii in mɔ-geŋa Simsai yɔra kalata’ɛ ha̧ wannu Artazɛrzɛs wuli nɛ o be Jerusalɛm hee mɔ'ɔ ga:
9«Ɛɛ o wi-yɔr-kalata’ɛ nɛ́ mɔɔ nɔ'ɔ: Rɛhum wannu Samarii in Simsai mɔ-geŋa, in o gbama wi-de-tom in wa lɛŋ; o wi-gɔn-kita in o betom, o gasawi Pɛrsɛ in o be Urak, o be Babilɔŋ, in o be Susa, mɛ̀ nɛ́ wen nɛ tɔ̧ o be Elam, 10ká bá nɛ̀ oi bíí lɛŋ nɛ gasa wannu Asurbanipal kaia so tɛnɛ a sɛn Samarii in nɛ kur Efrat nɛ war yee-wese.» 11Kalata nɛ wa yɔra so tom ha̧ a̧ nɛ́ mɔ'ɔ:
«Wannu Artazɛrzɛs, nɛ́ ɛɛ o wi-de-tom k’ɛ́nɛ́ nɛ ya nɛ kur Efrat a̧ tom kalata’ɛ h’ɛ́nɛ́!
12«Ɛɛ kɔ̧ɔ̧ mɛ mbaŋ tɛ wannu ndé, o be Juif nɛ pia so nɛ nù k’ɛ́nɛ́ pii Jerusalɛm tɛ yɛ hɛ̧ɛ̧ mbo nɛ́ ye-ŋgazu’ɛ in ɗaŋ ye’ɛ woyo. Wa mbo nɛ́ garo-a woyo, wa ee naŋ-a kaɗi mbɛt. 13Nɛ́ mɔ‘i ɛɛ kɔ̧ɔ̧ mɛ mbaŋ tɛ‘nɛ́ ndé, kà wa nɛ́ dee ye'i kaɗi, kà wa nɛ́ mboo garo'i kusi kaɗi, wa beka gbo garama ɓɔna, wa beka yoɓi mɔ ha̧ wannu na, wa beka yoɓi yuwar na mbɛt. Mɛ̀ nɛ́ hegɔ ye'i tɛ de ha̧ wannu mɛ ziɓi. 14Hee mɔ'ɔ n’ɛɛ zíí nɛ̀ ɛnɛ, ɓɛɛ n’ɛɛ kpɛk mɛ zii'e wa zɛkɛɗa wannu na ga, ɛɛ mbaŋ nɛ tɛ‘nɛ́ ndé, 15ɛ̀nɛ̀ kíí mɔ zaŋ Kalata Nyɛrɛ ko o zɔmdáa k’ɛ́nɛ́, ɛnɛ tɛ kpa, ɓɛɛ ɛnɛ iŋa ndé, ye’ɛ nɛ́ ye-ŋgazu nɛ mbetɛ. Nɛ́ ye nɛ̀ de so nɛ ŋgamɔ in o wannu in o zika-nù nɛ a̧a̧ katɛ a̧. Ɓeemɛ o bíí ye’ɛ a nɛ wen ha̧ o bíí ha̧ ŋgazu mɛ dɔk. Nɛ́ mɔ‘i sa ye’ɛ ɗaŋ. 16Ɛɛ mbaŋ tɛ wannu ndé, kà wa nɛ́ dee ye’ɛ kaɗi, in kà wa nɛ́ mboo garo-a kusi kaɗi, dekpaa ɛnɛ beka ɔ wan zu ŋma nù kur Efrat nɛ war yee-wese na.»
17Kifa-nú ko wannu nɛ mɔ'ɔ:
«Mi yɔr kalata’ɛ h’ɛ́nɛ́; Rɛhum in Simsai mɔ-geŋa, ká bá nɛ̀ o gbama wi-de-tom in wa lɛŋ nɛ ya Samarii in nɛ kur Efrat nɛ war yee-wese. Ga̧a̧mɔ a̧ dúk in'nɛ̀ɛ́.
18«Kalata n’ɛnɛ toma ha̧‘m, wa tɔra sɛn ti'm nɛ sa̧a̧-a̧. 19Mi toma bíí mɛ kii mɔ, ɓɛɛ ɛɛ zɔka ndé, ɓeemɛ ye'i kura so in o wannu nyɛmna; duka nɛ́ ye-fo-mɔ in ye-ŋgazu. 20O ŋgaŋa wannu ɔɔ so wan Jerusalɛm, wa ɔɔ wan zu nù kur Efrat nɛ war yee-wese lɛŋ, ɓɛɛ o bíí gbo garama ha̧ wa, o bíí yoɓi mɔ ha̧ wa, yoɓi nɛ yuwar ha̧ wa mbɛt. 21Kinii, ɛ̀nɛ̀ tɔ̧́ wa a̧ dór tom ko o wi nɔ‘i. Ká wa mbó ye'i woyo ɓɔna hɔ ŋgimbi n'am tɛ ha̧ nú‘m ha̧ wa. 22Ɛ̀nɛ̀ dé hakilo tɛ mɔ‘i wen ká wa tɛɛ ɗaŋ war wen ko wannu siti.»
23Ŋgimbi nɛ wa tɔra kalata ko wannu Artazɛrzɛs ti Rɛhum wannu Samarii in ti Simsai mɔ-geŋa in ti o sɛm kɔ-wa kaɗi, wa nɛɛ sitɛ o be Juif sɛn Jerusalɛm nɛ̀ haya-a, ɓɛɛ wa de ŋgamɔ in wa, dor nɛ tom kɔ-wa.
24Nɛ́ hegɔ a̧ wa dora nɛ tom Tua ko Sɔ̧ sɛn Jerusalɛm. Wa de tom'i na hegɔɔ hɔ tɛ yiitoo pɛ-wan ko Darius wannu Pɛrsɛ.#Ag 1.1; Zak 1.1
Currently Selected:
ƐSDRAS 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.