ƐSDRAS 3
3
Ɗafa-sɔ̧ ku̧u̧ naŋ woyo
1Ŋgimbi nɛ zɛ girwɔ hɔɔ nɛnɛ, ká o be Israɛl a̧a̧ tɛ o ye kɔ‘i, dukbíí lɛŋ mɔi̧a sɛn Jerusalɛm. 2Josue bem ko Yosadak in o nya-a̧ nɛ ya nɛ́ o wi-ɗafi-sɔ̧ in Zorobabɛl bem ko Saltiɛl in o nya-a̧ kura, ɓɛɛ wa mbo fara-ɗafi-sɔ̧ ha̧ Sɔ̧ ko Israɛl wen wɛka o dɔɔ-kpoo-sɔ̧ sɛnɛ nyɛm nɛ ɗoŋ mɔ nɛ yɔra zaŋ Heembea ko Moisɛ bíí ko Sɔ̧.#Gboa-a 27.1 3Kíì o bíí nù‘i de wa dee mbɛt, ɓɛɛ kɔ-wa kànà nɛ́ mboo fara-dɔ-kpoo-sɔ̧‘i sɛn oi fara'i. Wa wɛka dɔɔ-kpoo-sɔ̧ hi̧i̧ ha̧ GASA WAN; mɛ̀ nɛ́ o dɔɔ-kpoo-sɔ̧ wan mɛ tuyɛ in mɛ ga̧a̧mɔ.#Tɔra-bíí 28.1-8 4Wa dee gbaŋa Tua-laa hee mɔ'ɔ nɛ yɔra ga, wɛk nɛ dɔɔ-kpoo-sɔ̧ dam ɗoŋ wese lɛŋ nyɛm nɛ ɗoŋ dɔka-a nɛ‘i tɛ̀ɛ́ ha̧ so.#Tɔra-bíí 29.12-38 5Wa dɔɔ kpoo-sɔ̧ wan mɛ wese lɛŋ; ɓɛɛ zu-a'i, wa tɛɛ dɔ wan mɛ mbe yí-zɛ in o wan mɛ wese gbaŋa ko GASA WAN, ká bá nɛ̀ o ha̧a̧mɔ nɛ bíí ha̧ ha̧ GASA WAN nɛ ta-tɛ.#Tɔra-bíí 28.11—29.39 6Wa ku̧u̧ naŋ dɔɔ kpoo ha̧ GASA WAN tɛ kuti ɔɔ-zɛ ko girwɔ; ká ŋgimbi'i wa tɛ e géé naŋ Tua ko GASA WAN hɔ̧ɔ̧ na.
Mboo Tua ko Sɔ̧ Jerusalɛm ku̧u̧ naŋ woyo
7Wa ha̧a̧ sede ha̧ o wi-sɛk-ta in o wi-gba-te ká bá nɛ̀ o nyɔŋmɔ in o dɔ̧ɔ̧ in o nɔ̧́ ha̧ o be Sidɔŋ in Tir wen ha̧ wa mɛ kai te-gbatui Libaŋ tɛnɛ nɛ̀ zu yì hɔ Jafa nyɛm nɛ ɗoŋ wen ko Sirus wannu Pɛrsɛ. 8Wa hɔɔ fara Tua ko Sɔ̧ sɛn Jerusalɛm dee pɛ yiitoo nɛ fio-zɛ yiitoo kaɗi, sɛka Zorobabɛl, bem ko Saltiɛl in Josue bem ko Yosadak biti ku̧ naŋ tom Tua ko Sɔ̧, ɓɛɛ o nya-wa in o wi-ɗafi-sɔ̧ in o be Levii bá nɛ̀ o bíí nɛ pia nɛ tɛ bara pii Jerusalɛm gbak wa mbɛt, ɓɛɛ wa a o wi nɛ a̧a̧ nɛ pɛ ɓu-yiitoo in gan mbɛt mgbara o be Levii zu tom Tua ko Sɔ̧‘i. 9Nɛ̀ war ko Josue in o bem kɔ‘i ká bá nɛ̀ o nya-wi gú nɛ̀ Kadmiɛl in o bem kɔ‘i nɛ duk nɛ́ o bezaŋ Juda, wa nɛka wen usa ɗoŋ tom ha̧ wi-de-tom kpɔk kpɔk nɛ de tom Tua ko Sɔ̧, wi tɔ̧ ko o bem ko Henadad, in o bem kɔ-wa, ká bá nɛ̀ nya-wa o be Levii na.
10O wi-de-tom a̧ e naŋ Tua ko GASA WAN'i, ɓɛɛ o wi-ɗafi-sɔ̧ pi̧ de laa kɔ‘i, kai o mɔɔ-dɔm kɔ‘i, ɓɛɛ gasi Sɔ̧ hee mɔ'ɔ nɛ David wannu Israɛl baa tɔ̧ so ga. O be Levii, mɛ̀ nɛ́ wen nɛ tɔ̧, o bem ko Asaf kaia kɔ‘i nɛ́ kuŋge nɛnɛ.#1 Kal Ny 25.1 11O wi-ɗafi-sɔ̧ in o be Levii nɔ‘i bia gima gasi nɛ Sɔ̧‘e:
«Sɔ̧ nɛ́ de wi,
kɔ̧ɔ̧mɔ kɔ̧-a̧ sitɛ Israɛl duk kpoo nɛ kpoo.»
Bíí lɛŋ gaia mɔ, gasi nɛ Sɔ̧, wen zu naŋ Tua ko GASA WAN nɛ wa e'i.#1 Kal Ny 16.34; 2 Kal Ny 5.13; 7.3; Gima 100.5; 106.1; 107.1; 118.1; 136.1; Jer 33.11 12O ŋma wi-ɗafi-sɔ̧, o ŋma be Levii in o ŋma gasawi nutua nɛ sɔka nɛ zɔka so kuti Tua ko Sɔ̧ nɛ duka nɛti zɔka mbe naŋ Tua ko Sɔ̧ zu gba̧‘a̧‘i, ɓɛɛ hi̧i̧ kɔ̧a̧ ger gbo, ɓɛɛ o ŋma bíí gai kɔ‘i nɛ́ mɔ nɛ desee. 13Hegɔ, wi nyɛm mɛ kɛ̧ mgbara gaia mɔ desee in hi̧a̧ kɔ̧a̧ ko o bíí na, wen giti ger bíí nɛ̀ de mɔ nyɛmna. Wi duk nɛ nyɛi̧a-a zii nɛnɛ.
Currently Selected:
ƐSDRAS 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.