GBOA-A 40
40
Ee tua-kpa-ŋmaa er Sɔ̧
1GASA WAN tɔ̧ɔ̧ ha̧ Moisɛ: 2«Tɛ kuti ɔɔ-zɛ tɛ kuti fio-zɛ, mɛ̀ bá tua-kpa-ŋmaa nɛ duk nɛ́ sa̧a̧-fara e ŋgɔn. 3Mɛ̀ bá kuɓa-nɔɔ-tɔk e kɔ̧ a̧, ɓɛɛ mɛ̀ kpé nɛ̀ babir-laa. 4Mɛ̀ bá taŋe-nyɔŋ-mɔ mbɛt tɛnɛ, ɓɛɛ mɛ̀ ɗáfí mɔ zu-a. Mɛ̀ bá dek-e-wee tɛnɛ mbɛt, ɓɛɛ mɛ̀ é wee tɛ o lamba. 5Mɛ̀ bá fara-ɗafi-sɔ̧ nɛ wa dee nɛ lɔr wen dɔɔ fuu-nyama e mgbák ti kuɓa nɔɔ-tɔk, ɓɛɛ mɛ̀ kpé nu tua nɛ babir-laa. 6Mɛ̀ é fara-dɔ-kpoo-sɔ̧ mgbák nu tua yea-a si kɔ̧ tua-kpa-ŋmaa. 7Mɛ̀ é kpáná-ndɛrɛ mgbara tua-kpa-ŋmaa in fara-ɗafi-sɔ̧, ɓɛɛ mɛ̀ á yì kɔ̧ a̧. 8Mɛ̀ é nu zala, ɓɛɛ mɛ̀ kpé nú-a nɛ babir-laa.
9«Mɛ̀ tɛ́n nɔ̧́-wan a kɔ̧ tua'i in á tɛ o mɔ nɛ ya kɔ̧ a̧‘i lɛŋ, ɓɛɛ mɛ ee a̧ in o mɔ nɛ ya kɔ̧ a̧‘i lɛŋ nɛtɛ ha̧ Sɔ̧; hegɔ‘i, mɔ‘i tɛ duk nɛ sa̧a̧-a̧. 10Mɛ̀ tɛ́n nɔ̧́ a fara-dɔ-kpoo-sɔ̧ in a tɛ o nyɛk-a lɛŋ, ɓɛɛ mɛ ee a̧ nɛtɛ ha̧ Sɔ̧; hegɔ‘i, fara-dɔ-kpoo-sɔ̧ tɛ duk nɛ sa̧a̧-a̧ nyɛmna. 11Mɛ̀ tɛ́n nɔ̧́ a tɛ kpáná-ndɛrɛ in dek-a mbɛt, ɓɛɛ mɛ ee nɛtɛ ha̧ Sɔ̧.
12«Mɛ̀ mgbɔ́ Arɔŋ in o bem kɔ‘i si nu tua-kpa-ŋmaa, ɓɛɛ mɛ̀ zúí wa. 13Hɔ-ɗoŋ-aa, mɛ̀ pí̧ laa-ɗafi-sɔ̧ tɛ Arɔŋ, mɛ̀ tɛ́n nɔ̧́ a zu-a ha̧ a̧ mɛ de tom-ɗafa'm. 14Mɛ̀ sá o bem kɔ̧-a̧, ɓɛɛ mɛ̀ á o gɔna-laa tɛ-wa; 15mɛ̀ tɛ́n nɔ̧́ a zu-wa hee ko dáà kɔ-wa ga, wen ha̧ wa mɛ de tom-ɗafa'm, ɓɛɛ hegɔ tɛna-a zu-wa'i tɛ de ha̧ wa in o bezaŋ-wa mɛ ya nɛ wi-ɗaf'am kpoo nɛ kpoo.»
16Moisɛ dee kànà mɔ lɛŋ hee mɔ'ɔ nɛ GASA WAN usa ha̧ a̧ mɛ de ga. 17A̧ baa tua'i e ŋgɔn tɛ kuti ɔɔ-zɛ tɛ kuti fio-zɛ, tɛ yiitoo pɛ gboa-a nɛ̀ nú Egiptɛ. 18Moisɛ baa tua e ŋgɔn, a̧ ee o gun-aa, in o mɔɔ-tɔna-a, a̧ gita gaŋgala, ɓɛɛ a̧ kai o mbiŋ a ŋgɔn. 19A̧ tata laa kpe nɛ zu tua'i, ɓɛɛ a̧ tɛɛ kpe ŋma mɔ zu laa'i woyo hee mɔ'ɔ nɛ GASA WAN usa ha̧ a̧ ga. 20A̧ baa sɛka-ta-heembea e kɔ̧ kuɓa, a̧ yura o dura te ká̧ kuɓa'i wen gɔa-a, ɓɛɛ a̧ e mɔɔ-kpe-nú-a sɛnɛ. 21A̧ baa kuɓa e kɔ̧ tua, ɓɛɛ a̧ ɗafi babir-laa kpe nɛnɛ, wen hu̧sa̧ kuɓa nɔɔ-tɔk hee mɔ'ɔ nɛ GASA WAN tɔ̧ɔ̧ so ha̧ a̧ ga.
22A̧ ee taŋe-nyɔŋ-mɔ sɛn kɔ̧ tua-kpa-ŋmaa nɛ war ká̧-zan-mɛ́-ŋgɔn ti babir-laa. 23A̧ aa brɛt-ɗafi-sɔ̧ zu-a ha̧ GASA WAN hee mɔ'ɔ nɛ GASA WAN tɔ̧ɔ̧ so ha̧ a̧ ga. 24A̧ ee dek-e-wee kɔ̧ tua-kpa-ŋmaa zɔk ŋmaa in taŋe-nyɔŋ-mɔ nɛ war ká̧-zan-mɛ́-ɗɔɔ, 25ɓɛɛ a̧ e wee tɛ o lamba ti GASA WAN hee mɔ'ɔ nɛ GASA WAN tɔ̧ɔ̧ so ha̧ a̧ ga. 26A̧ ee fara-ɗafi-sɔ̧ nɛ wa dee nɛ lɔr sɛn kɔ̧ tua-kpa-ŋmaa mgbák ti babir, 27a̧ dɔɔ fuu-nyama sɛnɛ hee mɔ'ɔ nɛ GASA WAN tɔ̧ɔ̧ so ha̧ a̧ ga, 28ɓɛɛ a̧ kpe nu tua nɛ babir-laa. 29A̧ baa fara-dɔ-kpoo-sɔ̧ e mgbák nu tua-kpa-ŋmaa, a̧ dɔɔ kpoo-sɔ̧ zu-a, ɓɛɛ a̧ ha̧ mɔ ha̧ Sɔ̧ hee mɔ'ɔ nɛ GASA WAN tɔ̧ɔ̧ so ha̧ a̧ ga. 30A̧ ee kpáná-ndɛrɛ mgbara tua-kpa-ŋmaa in fara-dɔ-kpoo-sɔ̧, ɓɛɛ a̧ a yì kɔ̧ a̧ wen fɔra tɛ. 31Moisɛ in Arɔŋ ká bá nɛ̀ o bem kɔ‘i tai so er in fɔr naŋ sɛnɛ. 32Ŋgimbi nɛ wa de nɛnɛ mɛ ye kɔ̧ tua-kpa-ŋmaa, kóó ha̧ wa mɛ nɛ si fara-ɗafi-sɔ̧, wa fɔra tɛ-wa hee mɔ'ɔ nɛ GASA WAN tɔ̧ɔ̧ so ha̧ Moisɛ ga. 33Moisɛ ɗafa nú-zala zik nɛ tua in fara-ɗafi-sɔ̧, ɓɛɛ a̧ kpe nú-a nɛ babir-laa. Moisɛ kaɗa o tom nɔ‘i lɛŋ.
Gasamɔ ko GASA WAN duna fara-duk ko Sɔ̧
(Zɔk Tɔra-bíí 9.15-23)
34Tura-zan zira duk zu tua-kpa-ŋmaa, ɓɛɛ gasamɔ ko GASA WAN dun tua'i.#1 Wan 8.10-11; Es 6.4; Ez 43.4-5; Tɔ̧ɔ̧ Hu̧ 15.8 35Moisɛ nyɛm so mɛ ye tua-kpa-ŋmaa na wen tura-zan kpee zu tua in gasamɔ ko GASA WAN duna tua'i. 36Ŋgimbi nɛ tura-zan kur mɛ yak, ɓɛɛ o be Israɛl kura wen gbina-a yak mbɛt. 37Kà tura-zan tɛ yak hɔ̧ɔ̧ na, wa pɛma kànà mɔ hɔ ŋgimbi n'aa tɛ ku̧naŋ yaka-a, sɛka wa kura mɛ yak ɗoŋ-aa mbɛt. 38Mɛ wese ɓɛɛ tura-zan'i duka zu tua, ɓɛɛ mɛ zɛ nɛ́ wee a̧ nyɛk tɛ tura-zan'i; o be Israɛl lɛŋ zɔka wee'i ɓɔnsɛnɛ tɛ ŋgimbi nɛɛ nɔ kɔ-wa.
Currently Selected:
GBOA-A 40: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.