GBOA-A 39
39
Fura laa ko o wi-ɗafi-sɔ̧
(Zɔk Gboa-a 28.1-14)
1Wa fura laa nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ in nɛ yɛ́m-yɛ́m zɔ̧-laa wen dee tom fara-ɗafi-sɔ̧. Wa fura o ŋma laa e nɛtɛ mbɛt ha̧ Arɔŋ, hee mɔ'ɔ nɛ GASA WAN tɔ̧ɔ̧ so ha̧ Moisɛ ga. 2Wa dee laa nɛ‘i sa'e Efod nɛ lɔr, nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ in nɛ yɛ́m-yɛ́m zɔ̧-laa. 3Wa ɗafa lɔr lɛfɛ-lɛfɛ, ɓɛɛ wa ɓir fan nɛ ŋmaa in tu̧ zɔ̧-laa, gbɛ̧ zɔ̧-laa, gbɛ̧-a̧ zóŋ-zóŋ in nɛ yɛ́m-yɛ́m zɔ̧-laa, ɓɛɛ nɛ́ bíí nɛ iŋa tom'i a̧ dee dea-a. 4Wa fura nyak-kasa-a yiitoo e nú-a. 5Nɛ́ kpɔk tom'i a̧ wa dee nɛ kanda-hɛr zu Efod; wa dea-a nɛ lɔr, nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ, in nɛ yɛ́m-yɛ́m zɔ̧-laa nyɛm nɛ ɗoŋ mɔ nɛ GASA WAN tɔ̧ɔ̧ so ha̧ Moisɛ. 6Wa sɛka de ta nɛ tok tok kɛn-kɛn, ɓɛɛ wa sakari lɔr e wa sɛnɛ, ɓɛɛ wa gɔn dap hee gɔna dap-tumbal ga, nɛ nin o be Israɛl e sɛnɛ. 7Wa ee o ta nɔ‘i yiitoo'i tɛ nyak Efod wen ha̧ tɛ Sɔ̧ mɛ mbaŋ ɗoŋ o be Israɛl hee mɔ'ɔ nɛ GASA WAN tɔ̧ɔ̧ so ha̧ Moisɛ ga.
Dee laa-kpe-yí-ŋguɗi
(Zɔk Gboa-a 28.15-30)
8Wa fura laa-kpe-yí-ŋguɗi hee mɔ'ɔ nɛ wa fura nɛ Efod ga; wa fura nɛ lɔr, nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ in nɛ yɛ́m-yɛ́m zɔ̧-laa. 9Nɛ́ wi-iŋ-tom-aa a̧ dee dea-a. Wa goia laa'i si zu ŋmaa, ɓɛɛ dura-a in pɛsa-a nyɛm ŋmaa tɛ dɔ̧-er. 10Wa aa o be toka-ta sɛnɛ tɛ fara naar: tɛ kuti nɛka-a, wa aa nɛ ta-kui nɛ‘i sa'e sardɔan, ta nɛ yí-a ɔ tàrà nɛ‘i sa'e topaz, in tu̧ ta mít-mít nɛ‘i sa'e emerod. 11Tɛ yiitoo nɛka-a, nɛ́ gbɛ̧ ta yúŋú-yúŋú nɛ‘i sa'e ɛskarbuklɛ, tu̧ ta hee yiwese ga nɛ‘i sa'e safir, in toka-ta nɛ‘i sa'e jaspɛ. 12Tɛ taar nɛka-a, nɛ́ ŋga ta nɛ‘i sa'e agat, gbɛ̧ ta nɛ‘i sa'e kɔrnalin in ta nɛ dap-aa nɛtɛ nɛtɛ nɛ‘i sa'e ametist. 13Tɛ naar nɛka-a, nɛ́ mbui ta nɛ‘i sa'e krizolit, toka-ta kɛn-kɛn nɛ‘i sa'e beril in tu̧ ta nɛ‘i sa'e oniks; wa lɛŋ ya kɔ̧ ɓoo lɔr. 14O ta nɔ‘i lɛŋ nɛ́ ɓu-zua-yiitoo hee duk o be Israɛl ga. Wa gɔna dap duk o be Israɛl kpɔk kpɔk zu o ta nɔ‘i hee mɔ'ɔ nɛ‘i gɔn nɛ dap tumbal ga. 15Wa ɓaɓa sa̧a̧ lɔr e zu laa-kpe-yí-ŋguɗi. 16Wa ɗafa mɔɔ-ga̧i̧-kana yiitoo nɛ lɔr in kana-lɔr yiitoo, ɓɛɛ wa e o kana nɔ‘i sɛn mgbii laa-kpe-yí-ŋguɗi nɛ ŋgɔn yiitoo. 17Wa pi̧i̧ nu ɓaɓa-lɔr'i sɛn nu kana nɛ ga̧i̧ mgbii laa-kpe-yí-ŋguɗi nɛ war ŋgɔn. 18Oi nu ɓaɓa-lɔr yiitoo'i wa hɛra tɛ o mɔɔ-ga̧i̧-kana yiitoo mbɛt, ɓɛɛ wa lati tɛ o nyak Efod nɛ kɔ̧ a̧. 19Wa dee ŋma kana-lɔr yiitoo, ɓɛɛ wa ga̧i̧ mgbii laa-kpe-yí-ŋguɗi nɛ war fara nɛ ndaɗa ŋmaa in Efod nɛ kɔ̧ a̧. 20Wa duia o ŋma kana-lɔr yiitoo woyo e tɛ o nyak Efod nɛ war ɗɔɔ nɛ ti, nyɛm nɛ fara hɛra-a sɛn zu kanda Efod. 21Ɓɛɛ wa kun laa-kpe-yí-ŋguɗi nɛ o kana-a tɛ o kana Efod nɛ tu̧ zɔ̧-laa wen ha̧ laa-kpe-yí-ŋguɗi mɛ duk zu kanda Efod wen ká a̧ tɛɛ yu zu-a. Wa dee mɔ‘i nyɛm nɛ ɗoŋ mɔ nɛ GASA WAN tɔ̧ɔ̧ so ha̧ Moisɛ.
Fura o ŋma laa ko o wi-ɗafi-sɔ̧
(Zɔk Gboa-a 28.31-43)
22O wi-tok-laa fura laa nɛ‘i tɛ pi̧ Efod zu a̧‘i nɛ tu̧ zɔ̧-laa. 23Wa gɔna ger laa'i tan see-a, ɓɛɛ wa tok nú-a zik lɛŋ nɛ̀ garaazi ha̧ a̧ mɛ duk nɛ ndota-a wen ká tɛɛ a̧k. 24Wa fura o ŋma be mɔ nɛ hɔɔ ŋmaa in o waya kóɓò zik nɛ naŋ-a kpa lɛŋ nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ, in nɛ yɛ́m-yɛ́m zɔ̧-laa. 25Wa duia o be mana nɛ sa̧a̧ lɔr, ɓɛɛ wa a zaŋ nɛ ŋmaa in o fura be mɔɔ nɔ‘i nɛ hɔɔ ŋmaa in be waya kóɓò zik ká̧ naŋ-a lɛŋ. 26O fura be mɔɔ nɔ‘i in o be mana nɔ‘i nɛka naŋ gasa laa ko wi-ɗafi-sɔ̧ zik kpa, nyɛm nɛ ɗoŋ mɔ nɛ GASA WAN tɔ̧ɔ̧ so ha̧ Moisɛ.
27Wa toka ŋma gɔna be laa yɛ́m-yɛ́m ha̧ Arɔŋ in o bem kɔ‘i. 28Wa dee mɛtɛwol in mɔɔ-hɛr-zu ká bá nɛ̀ laa mɛ ɗɔɔ nɛ yɛ́m-yɛ́m zɔ̧-laa. 29Wa dee o kanda nɛ yɛ́m-yɛ́m zɔ̧-laa, nɛ tu̧ zɔ̧-laa, nɛ gbɛ̧ zɔ̧-laa, in nɛ gbɛ̧-a̧ zóŋ-zóŋ. Nɛ wi-iŋ-tom-aa a̧ dee dea-a, nyɛm nɛ ɗoŋ mɔ nɛ GASA WAN tɔ̧ɔ̧ so ha̧ Moisɛ. 30Wa duia sa̧a̧ lɔr hɔ ŋmaa in do-te mɛ usi'e mɔ‘i nɛ́ ko GASA WAN, ɓɛɛ wa yɔr mɔ zu-a hee mɔ'ɔ nɛ‘i yɔr nɛ mɔ tɛ tumbal'ɛ ga. Yɔramɔ‘i nɛ mɔ'ɔ: «Mɔ nɛ duk nɛ sa̧a̧-a̧ wen GASA WAN,» 31ɓɛɛ wa kun tu̧ nyak sɛnɛ wen hɛra-a tɛ mɛtɛwol hee mɔ'ɔ nɛ GASA WAN tɔ̧ɔ̧ so ha̧ Moisɛ ga.
Kaɗa tom
(Zɔk Gboa-a 35.10-19)
32Nɛ́ hegɔ a̧ tom tua-kpa-ŋmaa kaɗa nɛnɛ. O be Israɛl lɛŋ dee kànà tom hee mɔ'ɔ nɛ GASA WAN usa ha̧ Moisɛ ga. 33Ɓɛɛ wa gɔ tua-kpa-ŋmaa in o mɔ-aa lɛŋ sitɛ Moisɛ: kiitɛ tua in o mɔ-aa lɛŋ, o boi-kɔk-mɔ, o mɔɔ-tɔna-a, o gaŋgala, o mbiŋ in o gun-aa; 34mɔɔ-kpe-zu-a nɛ‘i dee nɛ ndàrá sami nɛ‘i gbɛ̧ɛ̧ gbɛ̧ɛ̧, mɔɔ-gu-zu-a nɛ‘i dee nɛ ŋga ndàrá, in babir-laa mɛ kɔ̧ a̧; 35kuɓa nɔɔ-tɔk, o te gɔa-a in o mɔɔ-kpe-nú-a; 36taŋe-nyɔŋ-mɔ in o nyɛk-a lɛŋ, ká bá nɛ̀ brɛt nɛ‘i ha̧a̧ ha̧ Sɔ̧; 37dek-e-wee nɛ‘i dee nɛ sa̧a̧ lɔr, o lamba, o mɔ-aa in nɔ̧́ wen ee wee sɛnɛ mbɛt; 38fara-ɗafi-sɔ̧ nɛ‘i dee nɛ lɔr, nɔ̧́-wan, fuu-nyama wen doa-a in babir-laa-kpe nu tua; 39fara-ɗafi-sɔ̧ nɛ‘i dee nɛ ndɛrɛ, sina-ndɛrɛ yí-a, o te gɔa-a in o nyɛk-a lɛŋ, ká bá nɛ̀ kpáná-ndɛrɛ in dek-a; 40o laa-kpe-nú-zala, o mbiŋ-a, o gun-aa, babir-kpe nu tua-zala, o nyak-aa, o te-mgboia-a in o nyɛk-de-tom kɔ̧ tua-kpa-ŋmaa; 41o laa-ɗafi-sɔ̧ wen dee tom kɔ̧ sa̧a̧-fara, o laa nɛ‘i ee nɛtɛ ha̧ Arɔŋ, wi-ɗafi-sɔ̧, in o laa nɛ o bem kɔ̧-a̧ tɛ pi̧ ŋgimbi ɗafa sɔ̧. 42O be Israɛl dee kànà tom'i lɛŋ nyɛm nɛ ɗoŋ mɔ nɛ GASA WAN usa ha̧ Moisɛ. 43Moisɛ zɔka tom nɛ wa dee lɛŋ; a̧ zɔka'e wa dee kànà mɔ nyɛm nɛ ɗoŋ mɔ nɛ GASA WAN usa. Ɓɛɛ Moisɛ tok de yoŋgo zu wa.
Currently Selected:
GBOA-A 39: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.