ROMANEN 11

Masǝŋ ɓoo za Israel ge lal a

1Me so fii kpǝ: Masǝŋ ɓoo zan ah ge ɓo lal ne? Ka nai ya! Mor ame ne suu ɓe laŋ me ye dǝɓ Israel ta, daga morsǝ̃ǝ Abraham, kǝsyil ban Benyaamin.#Fil 3:5 2Masǝŋ ɓoo zan ah mai mo nǝǝ ra ɓo kǝpel na za mǝ ah ge lal a. We tǝ ɓǝ mai Ɗerewol mo faa tǝtǝl Elias ne cok mo tǝ cen za Israel pel Masǝŋ ya ne? 3Elias faa: Dǝɓlii, ikra profetoen ɓo daŋ ɓe, dahra cok joŋ syiŋ ge lal ɓe ta, sai coŋ me ɓo syak ɓe to o, so tǝ kyeɓra me laŋ ka in pǝ wul ta.#1 ZaG 19:10,14 4Amma Masǝŋ zyii zah ah faa nyi ɗǝne? Faa: Me byak za ɓo no mor suu ɓe ujenere rǝŋ mai mo keara ge sǝŋ pel masǝŋ Ba'al ya.#1 ZaG 19:18 5Ne cok matǝ zǝzǝ̃ǝ laŋ a nai ta, coŋ za mai Masǝŋ mo joŋ gboŋgboŋ syen ra ɓo no kpǝ. 6Masǝŋ ye joŋ gboŋgboŋ suu ah syen ra ɓo, ka mor fan joŋ ɓǝǝr a. Mo ka nai ya ɓe, ka gboŋgboŋ mai Masǝŋ mo joŋ ɓo ka yea tǝgbana joŋ gboŋgboŋ ɓo ya.

7Ɗǝne? Fan mai za Israel mo tǝ kyeɓra lwaara ya. Amma sai za mai Masǝŋ mo syen ra ye lwaara to. Tǝcoŋ za ki gak ka laara mor ah ya. 8Tǝgbana Ɗerewol mo faa: Masǝŋ joŋ tǝ'yak ɓǝǝ ka mo gak laara ka, ka nahnǝn ɓǝǝ mo kwo ka, sok ɓǝǝ laŋ mo laa ka ŋhaa tǝ'nahko.#CuuƁ 29:4; Esa 29:10 9David faa:

Farel ɓǝǝ mo ciŋ mǝmmǝǝ ka gban ra tǝkine tǝdah mor ka mo lee jee ra.#Lǝŋ 69:23-24

10Nahnǝn ɓǝǝ mo coo mor ka mo kwora cok ka,

Mo ɗǝm cel ɓǝǝ ge sǝŋ cẽecẽe.

11Me so fii kpǝ: Yahuduen ɓeera tǝ ɓal ɓo ka lee ga sǝŋ lii sǝ ne? Ka nai ya! Amma mor faɓe' ɓǝǝ mo joŋra ɓo za ki lwaara ǝ̃ǝre, mor ka ɓǝ ɓǝǝ mo kǝǝ Yahuduen joŋra tǝwonni. 12Amma faɓe' mai Yahuduen mo joŋra, mo so joŋ za sǝr ɓo pǝkǝ̃ǝ pǝ tǝ'yak ɓe, syak ɓǝǝ mo so joŋ za ki ɓo pǝkǝ̃ǝ pǝ tǝ'yak ɓe, ne cok moo ga ferra zahzyil ɓǝǝ reba ah a ga yea ɗǝne?

Ə̃ǝ za mai wo ye ka Yahuduen a

13Zǝzǝ̃ǝko me tǝ faa nyi we za bai tan Masǝŋ. Ame pa pee mai mo mor za mai mo ye ka Yahuduen a, so me tǝ laa pǝ'nyah ne yeɓ ɓe ta. 14Mee gak no ɓe, me 'yah ka me joŋ zum ɓe mai ara ye mo suu ɓe ka zahzyil ɓǝǝ mo joŋ tǝwonni, mor ka za ki kǝsyil ɓǝǝ mo ǝ̃ǝra. 15Ne cok Masǝŋ mo soɓ ra nǝkahe, za sǝr lwaara jam pel ahe. Ne cok Masǝŋ moo ga nyiŋ ra a ga yea ɗǝne? Ka yea tǝgbana wul ye syemra ɓo ya ne!

16Dǝɓ mo bǝǝ tǝwaa ma kǝpel ah nyi Masǝŋ ɓe, ka tǝcoŋ ah daŋ laŋ mǝ ah ye ta. 17Za Israel tǝgbana kpuu tǝbaakãm mai mo peera ɓo pee jol ah manyeeki ah mo ŋgom ge ɓo lalle. Awe za mai we ye ka Yahuduen a, awe tǝgbana kpuu tǝbaakãm mai mo ciŋ ɓo lal hai, ŋgoŋra we ge mgbãa ɓo pǝ cok ɓǝǝra, zǝzǝ̃ǝko we tǝ lwaa bii daga wo sǝ̃ǝ ah mai moo wol kpuu tǝbaakãm mai mo waa peera ɓo pee. 18Mor ah we ka gak syẽa za mai ara mo tǝgbana jol ah mai mo ŋgomra ge ɓo lal a. We gak yii suu ɓii ɗǝne? Awe ye ka tǝ ɓaŋ sǝ̃ǝ ah ya, amma sǝ̃ǝ ah ye ɓaŋ we ɓo.

19Mo ga kyeɓ ka faa nyi me: Amma ŋgomra jol ah rai ge lal mor ka mgbãara me gŋ. 20Goŋga yo, ŋgomra ra ge lal mor ara ka ne iŋ ya. Amo nyiŋ cok ɓǝǝ ɓo zǝzǝ̃ǝ mor mo ne iŋni. Amma mo byak suu ɓo ka mo yii suu ka, mo ɗuu galle. 21Mor Masǝŋ mo soɓ Yahuduen mai ara mo tǝgbana jol kpuu matǝ kpak ah ya, ka ga soɓ laŋ mo ya ta. 22We foo, Masǝŋ a cuu ɓǝ 'nyah ah tǝkine kpãh ah gin lal ɗǝne? Ɓaŋ kpãh ɓo tǝ za mai mo joŋra faɓe' ɓo, amma a pǝ'nyah ne mo. Amma sai mo kaa pǝzyil ɓǝ 'nyah ahe. Mo ka nai ya ɓe, a ga ŋgoŋ mo ga lal tǝgbana jol kpuu ta. 23Yahuduen mo soɓra zahzyil yak ɓǝǝ ɓe, a ga mgbãa ra ga pǝ cok ɓǝǝ mai mo yeara gŋ kǝpelle, mor Masǝŋ ne swah ka mgbãa ra ga gŋ kpǝ. 24Awe za mai we ye ka yahuduen a, awe tǝgbana jol kpuu tǝbaakãm mai mo lal hai mo ŋgoŋra ge mgbãa ɓo tǝ kpuu tǝbaakãm mai mo peera ɓo pee. Masǝŋ ka mgbãa ra ga tǝ kpuu mai mo cok ɓǝǝ ye kǝpel ɓaa pǝgaɓ ya.

Ə̃ǝ za Israel tǝkine za mai mo ye ka Israel a

25Wee pa ɓe, me 'yah ka cuu goŋga mai mo muŋ ɓo syeɓ nyi we ka we tǝ, mor ka we joŋ suu ɓii na za tan fan ka. Kǝlii za Israel yerra zahzyil ɓǝǝ ɓo, amma a ga yeara ne naiko, ŋhaa ka zahban maki ah ra mo lwaara ǝ̃ǝre. 26So za Israel a ga ǝ̃ǝra. Tǝgbana Ɗerewol mo faa:

Pa ǝ̃ǝ ga gee Sion ginni.

A ga ɓaŋ ɓǝɓe' morsǝ̃ǝ Yakuɓ daŋ ga lalle.#Esa 59:20

27Ne cok me rwah faɓe' ɓǝǝ ge lal ɓe,

Me ga gbǝ zah ne ra.#Jer 31:33-34

28Yahuduen ɓoora Ɓǝ'nyah Masǝŋ ge lalle, mor ah so ciŋra za syiŋ Masǝŋ ɓo, ka ɓǝ ah mo joŋ pǝ'nyah wo ɓii za ki. Amma mo tǝ ɓǝ syen ye ɓe, Masǝŋ ye syen ra ɓo, ara ye za mai Masǝŋ mo tǝ 'yah ra mor ɓǝ pa ɓǝǝ lii ra. 29Mor Masǝŋ ka so ɗii marvǝǝ tǝ ɓǝ fan mai ako ye mo nyi ɓo ya, ka so fer ɓǝ foo ah gin tǝ za mai ako ye mo joŋ gboŋgboŋ ɗii ra ɓo ya ta. 30Pǝtãa laŋ we yea tǝ laa zah Masǝŋ ya ta, amma zǝzǝ̃ǝko we lwaa kwan syak ah ɓo mor Yahuduen mo laara zah ya. 31Nai ta, zǝzǝ̃ǝko Yahuduen ka tǝ laara zah ya mor ka Masǝŋ mo kwo syak tǝ ɓiiri, amma mor ka ara laŋ mo so lwaara kwan syak ah zǝzǝ̃ǝ nai ta. 32Mor Masǝŋ joŋ za ɓo daŋ na daŋgai bai laa zahe, so a 'yah ka kwan syak tǝ ɓǝǝ daŋ ta.

Masǝŋ pǝyǝkki

33Masǝŋ Pa joŋ malii yo, fatan ah tǝkine yella ah a pǝɗǝk pǝlli! Azu ye gak mgbai ɓǝ foo ah gin lal ne? Azu ye gak tǝ fahlii mai mo zyeɓko ɓo ne?#Esa 55:8 34Azu ye tǝ ɓǝ foo Dǝɓlii ɓo ne? Azu ye gak cuu ɓǝ nyi ko ne?#Esa 40:13 35Azu ye nyi fan nyi ko kǝpel ka mo so jin sooko pah ah ne?#Joɓ 41:11 36Mor fan daŋ ako ye joŋni, fan daŋ mo no a mor ahe, fan daŋ a wol ahe. Masǝŋ pǝyǝk ga lii ga lii. Amen.#1 Kor 8:6

Currently Selected:

ROMANEN 11: MUAR

Highlight

Copy

Compare