ROMANEN 10
10
1Wee pa ɓe, fan mai me tǝ 'yah ne zahzyil ɓe daŋ, me tǝ pǝǝ Masǝŋ mor za ɓe Yahuduen ka mo ǝ̃ǝra. 2Me gak faa tǝ ɓǝǝra ara ne tǝwon ɓǝ Masǝŋ pǝlli, amma tǝwon ɓǝǝ ka ne yella ya. 3Mor tǝra fahlii mai Masǝŋ moo joŋ za njaŋ pel ah ne ya. A kyeɓra fahlii ka yea njaŋ ne suu ɓǝǝra, zyii syeera mor fahlii mai Masǝŋ moo joŋ za njaŋ ne ya. 4Mor Kristu ge i zah ɓǝ lai Mosus daŋ ɓe, ka koo zune mo nyiŋ ko daŋ a ga yea pel Masǝŋ njaŋ.
Ə̃ǝ a mor za daŋ
5Mor Mosus ŋwǝǝ ɓǝ ah faa: Dǝɓ mo 'yah yea njaŋ pel Masǝŋ ɓe, mo syee mor ɓǝ lai tǝkine joŋ ɓǝ mai ɓǝ lai mo faa ɓo, a ga yea ne cee mor ahe.#Lew 18:5 6Amma ɓǝ mai mo faa ɓo tǝ ɓǝ mai ka na yea njaŋ pel Masǝŋ ne iŋ a naiko: Mo faa pǝ zahzyil ɓo sõone azu ye yee ga sǝŋ ka ɓaŋ Kristu gin sǝŋ ne ka.#CuuƁ 30:12-14 7Mo so faa sõone azu yee ɗǝr ga mor sǝr sǝŋ ka ɓaŋ Kristu kǝsyil za ma wul pǝ̃ǝ gin lal ne ne ka ta. 8Amma faa ɗǝne? A faa:
Ɓǝ ah no kah ɓo, a no pǝ zah ɓo,
A no pǝ zahzyil ɓo.
Ɓǝ ah ako ye ɓǝ iŋ mai na tǝ cuuni. 9Mor mo tǝ faa ne zah ɓo pel za daŋ: Yesu Dǝɓlii yo, mo so nyiŋ pǝ zahzyil ɓo: Masǝŋ ur ko gin pǝ wul kǝsyil za ma wul ɓe, mo ga ǝ̃ǝ. 10Mor dǝɓ nyiŋ ne zahzyilli, ko dǝɓ yea njaŋ, dǝɓ faa ne zahe, ko dǝɓ ǝ̃ǝni. 11Ɗerewol faa: Koo zune mo nyiŋ ko daŋ, swãa ka ga re dǝɓ ah ya.#Esa 28:16 12Ne mai Yahuduen ne za mai mo ye ka Yahuduen a ka camcam ya, ara ne Dǝɓlii vaŋno mai moo nyi fan sãh ah daŋ nyi za mai moo ɗiira ko. 13Tǝgbana Ɗerewol mo faa: Koo zune mo ɗii tǝɗii Dǝɓlii ɓe, a ga ǝ̃ǝ.#Jo 3:5
14Amma za mai mo nyiŋra ko ya ba a gak ɗiira ko ɗǝne? So mo laara ɓǝ ah ya ɓe, a gak nyiŋra ko ɗǝne? Dǝɓ mo faa ɓǝ ah nyi ra ya ɓe, a ga laara ɗǝne? 15So za mo pee ra ya ɓe, a gak ga cuura ɓǝ ah ɗǝne? Tǝgbana Ɗerewol mo faa: Za mai moo kyãhra ne cuu ɓǝ 'nyah a pǝsãh no cam.#Esa 52:7 16Amma za daŋ nyiŋra Ɓǝ'nyah ah daŋ ya. Esaia faa: Dǝɓlii, azu ye nyiŋ ɓǝ cuu ɓuu ne?#Esa 53:1 17Mor iŋ a gin ne laa ɓǝ cuuni, ɓǝ cuu ah ɓǝ Kristu yo.
18Amma me so fii na fii: Laara ɓǝ ah ya ne? Laara sye ɓe, mor Ɗerewol faa:
Kyaŋ ɓǝǝ myah ɓo wo sǝr ne lii ah daŋ,
Ɓǝ faa ɓǝǝ zyaŋ sǝr ɓo daŋ.#Lǝŋ 19:5
19Me fii na fii kpǝ: Za Israel tǝra ya ne? Mosus faa ɓǝ ah pǝ Ɗerewol kǝpel naiko:
Me ga ur we joŋ tǝwon ne ɓǝ za mai ara ye mo ka zan a,
Me ga joŋ we ɓaŋ kpãh tǝ ɓǝ za mai mo tǝra fan ki ya.#CuuƁ 32:21
20So Esaia pee zahzyil mbaŋ faa:
Za mai mo ka tǝ kyeɓra me ya, lwaara me ɓe.
Za mai mo ka tǝ fiira me ya, me cuu suu ɓe nyi ra ɓe.#Esa 65:1
21Amma faa tǝ za Israel: Me ɓoo jol ɓo nyi za bai laa zah ne ŋwookyaŋ rai daga zah'nan dai.#Esa 65:2
Currently Selected:
ROMANEN 10: MUAR
Highlight
Copy
Compare
Share
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
