Lǝŋni 2
2
Goŋ mai Masǝŋ mo nǝǝ kan ɓo
1Za sǝr urra ɓǝ ɓo nai mor fẽene?
Za mai a kyeɓra ɓǝ ma kol ah mor fẽene?#Yeɓ 4:25-26
2Za goŋ ɓǝǝ ne zaluu ɓǝǝ urra ɓǝ tǝ Dǝɓlii ne goŋ mai mo nǝǝ ko ɓo#2:2 Goŋ mai mo nǝǝko ɓo: Wala Mesia, tǝgba faa: Kristu.,
3Faara: Na wǝǝ suu man gin mor jol ɓǝǝra.
4Dǝɓlii kaa ɓo tǝ fakal ah coksǝŋ a syak ra ginni,
Tǝ syẽa ɓǝ ɓǝǝra.
5So Dǝɓlii faa ɓǝ nyi ra ne kpãhe,
Ɓǝ ah nǝǝ zahzyil ɓǝǝra.
6Faa: Ame kan goŋ ɓe tǝwaa ɓe matǝdaŋdaŋ ma ɗii ne Sion.
7Dǝɓ mai Masǝŋ mo nǝǝ ɓo faa:
Me 'yah cuu ɓǝ mai Dǝɓlii mo foo ɓo ka ga joŋ gin lalle.
Dǝɓlii faa nyi me: Amo ye we ɓe,
Tǝ'nahko me ciŋ pa ɓo ɓe.#Yeɓ 13:33; Yahu 1:5; 5:5
8Mo fii me, ka me nyi za sǝr daŋ nyi mo ka mo kaa ne ko,
Ka sǝr daŋ mo yea mor jol ɓo.
9Mo ga kaa goŋ tǝ ɓǝǝ ne swahe,
Mo ga dah ra tǝgbana dǝɓ moo dah ciiri.#Caŋ 2:26-27; 12:5; 19:15
10Zǝzǝ̃ǝko awe za goŋe,
We syii sokki, we laa ɓǝ lai ɓe.
11We joŋ yeɓ mor Dǝɓlii ne ɗuu galle,
12We wonsuu, we kea ge sǝŋ pel ahe,
Mor ka mo ɓaŋ kpãh tǝ ɓii ka we muŋ ka,
Mor a ɓaŋ kpãh gwari.
A pǝ'nyah wo za mai mo soɓra suu ɓǝǝ ɓo jol ahe.
Bible Moundang © Alliance Biblique du Tchad, 1996.