ƁƏ TƏƁOROO 5
5
Lai tǝ ɓǝ joŋ ɓǝǝre
1We ɓe, mo syii sok mor fatan ɓe ne yella ɓe, 2mo ga tǝ fahlii ka syee mor ɓǝ masãhe, ɓǝ faa ɓo a ga cuu, mo tǝ fan ɓo. 3Ɓǝ faa tǝkpuuzah mawin dǝɓki a yea tǝgbana tǝnjwǝǝre, zah ah moo zwan dǝɓ ne a yea pǝrwãh tǝgbana nǝmmi. 4Amma ne cok mo ur kal ɓe, dǝ̃ǝ ah a yea pǝzwakke, a soɓ mo ɓoo ne bone to. 5A ga zaŋ mo ga pǝ cok mai za wul mo gŋ ne ko, fahlii mai mo tǝ syeeko gŋ fahlii wul o. 6Ka zyii uu tǝ fahlii lwaa cee ya, zyak fahlii ah ɓo, so tǝ ɓǝ ah ya.
7Zǝzǝ̃ǝko we ɓe, mo laa ɓǝ faa ɓe, mo yaŋ ɓǝ faa zah ɓe me tǝ faa ka. 8Mo byak suu ɓo wo ŋwǝǝ ma morãiko, mo syee ge zah yaŋ ah gwari ka. 9Mo joŋ nai ya ɓe, za ki ga nyiŋra yǝk ɓo mo ne ko, mo ga wǝ ne laŋ jol za maɓea ah ra. 10Oho, za gwǝǝ ga woora joŋ ɓo daŋ kal ne ko, fan mai mo joŋ yeɓ lwaa ne daŋ a ga ciŋ mǝ za ki. 11Syem ga gbǝ mo, mo ga 'mee tǝ faswul syem ɓo mo gŋ, swah suu ɓo tǝkine swah zahsǝ̃ǝ suu ɓo daŋ ga vǝrri. 12So mo ga faa: Mor fẽe me fee fan a ne? Mor fẽe me soɓ dǝɓ ki lai me ya ne? 13Ame zyii ka laa ɓǝ za cuu fan ɓe ra ya, me syii sok mor ɓǝ faa ɓǝǝ ya. 14Ne pel nai sǝ, me lwaa me dan suu ɓe ɓo pǝ ɓǝ swãa pel za pãare.
15Mo joŋ ɓǝ sãh wo mawin ɓo, mo 'yah ko syak ah to. 16Wee mai mo bem ne ŋwǝǝ ki ka ga joŋra ɓǝ sãh wo ɓo ya. 17Wee ka syak ɓo mo giŋra ɓe, a ga gbahra jol ɓo, amma wee ma lal ka gbahra jol ɓo ya. 18Mo laa pǝ'nyah ne mawin zahlaŋ ɓo, mo kyeɓ ɓǝ ma 'nyah suu ɓo daŋ wol ahe. 19A pǝsãh ɗokɗok tǝgbana nǝǝminni, mo soɓ mo gǝrko mo, ka suu ah mo lǝǝ cok wo ɓo pǝ'nyahre, mo soɓ mo gbǝko mo ge bii ne 'yahe. 20We ɓe, mo kyeɓ ka 'yah mawin ki mor fẽene? Mo 'yah mawin dǝɓ ki ye mo gbǝ mo ge bii mor fẽene? 21Dǝɓlii a kwan fan mai daŋ dǝɓ moo joŋni. Mo tǝ ga kẽne daŋ, nahnǝn ah a kwan mo. 22Faɓe' mai dǝɓ ɓe' moo joŋni, a tǝgbana mǝmmǝǝ, faɓe' ah a so jin gban ko. 23A ga wuu, mor ka byak suu ah ya, tǝgwĩi ah mo ne pǝ'man a ga zaŋ ko ga pǝ pal ne ko.
Bible Moundang © Alliance Biblique du Tchad, 1996.