ƁƏ TƏƁOROO 4
4
Reba mai fatan moo gin ne ko
1Wee ɓe, we laa ɓǝ mai pa ɓii moo cuu nyi we, we ɓaŋ syiŋ ɓǝ ahe, we ga yea ne yella ka laa mor ɓǝ. 2Fan mai me tǝ cuu nyi we daŋ a pǝsãhe, we foo ɓǝ ah ra daŋ ta.
3Ne cok mai me yea yaŋ pa ɓe pǝlaŋ me jol ah vaŋno, 4pa ɓe a cuu fan nyi me, so a faa nyi me: Mo foo ɓǝ mai me faa ɓo nyi mo, mo yaŋ ɓǝ ah ka, mo ga yea wo sǝrri. 5Mo yea ne fatan tǝkine yella, mo yaŋ ɓǝ mai me faa ɓo nyi mo wala mo soɓ ɓǝ ah ɓoo ka. 6Mo soɓ fatan ɓoo ka, a ga byak mo, mo 'yah fatanne, a ga gbǝ mo kaa ne jam. 7Dǝɓ ma ne tǝtǝlli, a kyeɓ fatan kǝpel fan ki daŋ. So mo 'yah ka yea ne fan maki ah ɓe, sai mo kyeɓ yella. 8Mo 'yah fatanne, a ga joŋ mo pǝ'manne. Mo gbǝ mbaŋ, a ga joŋ mo pǝyǝkki. 9A ga yea wo ɓo tǝgbana njok yǝk ɓo.
10We ɓe, mo laa ɓǝ faa ɓe, mo gbǝ ɓǝ mai me tǝ faa nyi mo, mo ga nǝn wo sǝrri. 11Me ga cuu fatan nyi mo tǝkine fahlii kal masãhe. 12Mo tǝ syee ne fatan ɓe, fan ki ka ga cak fahlii pel ɓo ya, ne cok mo tǝ ɗuu ɓe laŋ, mo ka ɓee tǝ ɓal a. 13Cẽecẽe sai mo foo ɓǝ fan mai mo feere, fan fee ɓo mo fee ɓo, ako ye jam ɓo, mo gbǝ pǝsãhe. 14Mo ge pǝ cok mai za faɓe' mo tǝ gara gŋ ka, mo kor fan joŋ za maɓea ah ra ka. 15Mo ɗuu ɓǝɓe', mo byak suu ɓo wol ahe, mo zyii joŋ ka, mo ɓaŋ fahlii kalle. 16Za faɓe' ka gak nwãhra nǝm ya, sai ka lwaara joŋ ɓǝɓe' ɓe, a kaara ma ne nahnǝn sai ka joŋra ɓǝɓe' wo dǝɓ ɓe. 17Joŋ faɓe' tǝkine fan joŋ maɓea ah a wo ɓǝǝ tǝgbana farel ɓǝǝ ne bii zwan ɓǝǝra.
18Fahlii mai za matǝ njaŋ mo tǝ syeera gŋ a yea tǝgbana com tǝ zooni, a sǝǝ ga pelle ga pelle ŋhaa cok kwan daŋdaŋ. 19Fahlii za faɓe' a yea pǝfuu tǝgbana suŋni, a ɓeara tǝ ɓal lea ga sǝŋ, amma ka gak kwanra fan mai mo ɓeara tǝ ɓal tǝl ah ya.
20We ɓe, mo ɓaŋ syiŋ ɓǝ mai me faa ɓo nyi mo, mo gbǝ ɓǝ faa ɓe syee ne ko. 21Mo soɓ woŋ ki ne mo ka, mo foo ɓǝ ahe, mo 'yah ɓǝ ahe. 22Mor a ga nyi jam tǝkine swah nyi koo zune mo 'yah ko ɓe daŋ. 23Mo joŋ yella ne ɓǝ foo ɓo kal fan daŋ, mor ɓal syel ɓo a yea tǝgbana ɓǝ foo zahzyil ɓo. 24Mo faa ɓǝ mai mo ka ne goŋga ya ge zah ɓo ka, mo gwah ber ka, mo woŋ ki ne ɓǝ matǝ vǝrvǝrri. 25Mo soɓ nahnǝn ɓo ẽe cok ge pel ɓo jaŋjaŋ, suu ɓo laŋ mo yea mor ahe, mo maa sol ɓo ge pǝzyil ɓǝ swãa ka. 26Mo ɓaŋ syiŋ ɓǝ fan mai mo tǝ joŋni, ka koo mo tǝ joŋ fẽene daŋ, mo joŋ pǝsãhe.#Yahu 12:13 27Mo ɗuu faɓe', mo syee tǝ fahlii matǝ ɓǝrak ahe, mo soɓ ɓal ɓo cak gin tǝ fahlii masãh ah ka.
Bible Moundang © Alliance Biblique du Tchad, 1996.